ەركەعالي راحماديەۆ اتىنداعى مەملەكەتتىك اكادەميالىق فيلارمونيا ۇجىمى قوس كونتسەرت ۇسىندى. العاشقىسى – «سارىارقا» حالىق مۋزىكا انسامبلىنىڭ «سول ءبىر كەز» اتالعان كەشىندە رەترو اندەر شىرقالدى. ال ەكىنشىسىندە كامەرالىق حور «تال بەسىكتەن – جەر بەسىككە…» اتتى تەاترلاندىرىلعان قويىلىم كورسەتتى.
ەسكى بولسا دا, ەشقاشان ەسكىرمەيتىن ەستى اندەر كەشىندە حالىق اندەرى, ءشامشى قالداياقوۆ, ءابىلاحات ەسپاەۆ, اسەت بەيسەۋوۆ, ەسكەندىر حاسانعاليەۆ, جاقسىگەلدى سەيىلوۆ, تولەگەن مۇحامەدجانوۆ سىندى قازاقتىڭ كورنەكتى كومپوزيتورلارى مەن يسااك دۋناەۆسكي, ۆلاديمير شاينسكي, الەكساندر زاتسەپين سەكىلدى كەڭەس جانە ورىس سازگەرلەرىنىڭ تۋىندىلارى شىرقالدى. سونداي-اق ەلگە سۇيىكتى فيلمدەردىڭ اندەرى مەن اۋەندەرى قالىقتادى. اتاپ ايتقاندا, «تاقيالى پەرىشتە», «ماحاببات بەكەتى», «كاۆكاز تۇتقىنى», «ى» وپەراتسياسى», «ساتتىلىك دجەنتەلمەندەرى», «يۆان ۆاسيلەۆيچ ماماندىق اۋىستىرادى», ت. ب. كينولاردىڭ شىعارمالارى شارىقتادى.
كەشتە «سارىارقا» انسامبلىمەن قازاقستاننىڭ ەڭبەك سىڭىرگەن قايراتكەرلەرى ازامات جىلتىرگوزوۆ, ارايلىم راقىمقىزى, ۇلىقپان جولداسوۆ, سۆەتلانا ايتباەۆا, التىناي جوراباەۆا, مادەنيەت سالاسىنىڭ ۇزدىگى نۇراي تاناباەۆ, ەستاي مۇقاشەۆ, زارينا وماروۆا, جاقسىگەلدى ماياساروۆ, نۇربول بالاپانوۆ, اقبوتا قۇسنادين, فاريدا جولداسوۆا, ت. ب. انشىلەر مەن «الەم» زاماناۋي بي بالەتى ونەر كورسەتتى.
«تال بەسىكتەن – جەر بەسىككە…» – قازاقتىڭ ءداستۇرلى ادەت-عۇرپىنا نەگىزدەلگەن حور قويىلىمى. قويىلىمدا قازاق حالقىنىڭ دانالىعىن, كەڭ پەيىلىن, قوناقجايلىعىن, فيلوسوفياسى مەن دۇنيەتانىمىن اشاتىن سالت-داستۇرلەر مەن ادەت-عۇرىپتاردىڭ وزىندىك كەشەنى دراماتۋرگيالىق تۇرعىدا قۇرىلعان.
حور ارتىستەرى ۇلتتىق كيىمدە, ۇلتتىق ناقىشتاعى ساحنادا ولەڭدەردى كوركەمدەپ وقىپ, داۋلەتكەرەيدىڭ «قاماجاي», «قوسالقا», «قۋىرماش», ە.حاسانعاليەۆتىڭ «كەلشى, كەلشى, بالاشىم», قۇرمانعازىنىڭ «بالبىراۋىن», «ون التى قىز» جانە ت. ب. حورعا ارناپ وڭدەلگەن قازاقتىڭ حالىق اندەرى مەن قازاق كومپوزيتورلارىنىڭ شىعارمالارىن ورىندادى.
كونتسەرتكە كامەرالىق حوردىڭ ورىنداۋشىلارى – جۇبانىش زەتوۆا, ينديرا ايتبەرگەن, ابىلاي ەربولات, ەركەبۇلان ابدىقالىقوۆ, ءمادي ايتاسوۆ, باقىتگۇل شاكىم, عازيزا جۇسىپبەكوۆا, حالىق ءانى ءبولىمىنىڭ ارتىستەرى – مادەنيەت سالاسىنىڭ ۇزدىگى دانيار مۇقان, ساۋلەجان تاعزيا, وزگەرىس شەرىكباي قاتىستى. جەتىگەن پارتياسىن «سارىارقا» حالىق مۋزىكاسى ءانسامبلىنىڭ ءارتىسى, مادەنيەت سالاسىنىڭ ۇزدىگى قاراگوز گاسيموۆا ورىندادى.
