مۇمكىندىگى شەكتەۋلى بالالاردى قوعامعا بەيىمدەۋگە, وزىنە-ءوزى قىزمەت ەتۋگە ۇيرەتىپ, قامقورلىق كورسەتۋ ماقساتىندا ارناۋلى الەۋمەتتىك قىزمەتكەرلەر تاعايىندالادى. گۇلجان اقىلبەكقىزى – الماتى اۋدانى اكىمدىگىنە قاراستى مۇگەدەك بالالارعا ۇيدەن قىزمەت كورسەتۋ ءبولىمىنىڭ الەۋمەتتىك قىزمەتكەرى.
جالپى كوپشىلىك بىلە بەرمەيتىن, كوپ ەلەنبەسە دە قوعامدا ەرەكشە ورنى بار, الەۋمەتتىك قىزمەت كورسەتۋشىلەردى ءوز تاۋقىمەتىن ارقالاعان وتباسىلار مەن قوعام اراسىن جالعاعان ءۇمىت كوپىرى دەسە دە بولعانداي. ولاردىڭ قارلىعاشتىڭ قاناتىمەن سۋ تاسىعانداي كومەگى قامكوڭىل انا مەن مۇگەدەك بالانىڭ ومىرىنە ىزگىلىك شۋاعىن سەۋىپ جۇرگەنىن باعالايتىندار كەمدە-كەم. گۇلجان – وسى سالانىڭ بەلدى مامانى. ۇلكەن جۇرەكتى جاندار عانا تاۋەكەل ەتەتىن بۇل ىسپەن اينالىسۋى دا كەزدەيسوق ەمەس-ءتى. العاشىندا پەداگوگ-پسيحولوگ ماماندىعىنا سايكەس كەلگەن سوڭ, اتقارۋعا كىرىسكەن. ۋاقىت وتە كەلە مۇگەدەك بالالارمەن جۇمىسى ادەتتەگى مىندەتتىڭ اۋقىمىنان اسىپ, ولاردىڭ بەيداۋا ومىرىنە بويلاي باستادى. ونىڭ ادامي جاۋاپكەرشىلىگى, كىسىنىڭ قايعىسىنا ورتاقتاسا ءبىلۋ قاسيەتى «مەن بولماسام, كىم ەندى؟!» دەگەن ساۋالدىڭ جاۋابىن تابۋىنا تۇرتكى بولدى. ولاردىڭ تاۋقىمەتىنە تەرەڭ بويلاعان سايىن تاڭداۋىنىڭ دۇرىس ەكەنىنە كوزى جەتتى. مىنا دۇنيەگە جارىمجان بولىپ كەلگەن جانداردىڭ جانىنا شۋاق بولىپ قۇيىلىپ, سارىلىپ كۇتىپ وتىرعان سابيلەردى تاستاپ كەتە الماسىن ءتۇسىندى.
جاراتۋشى ءبىر قولىمەن السا, ەكىنشى قولىمەن جارىلقايتىن سياقتى. كەمتار پەرىشتەلەردىڭ ءبىرىنىڭ ءتىلى, ءبىرىنىڭ كوزى, ەندى ءبىرىنىڭ ەستۋ قابىلەتى بولماسا دا باسقا ءبىر دارىنىن استا-توك ەتىپ جاراتادى ەكەن. ولارمەن ارالاسقان سايىن, ءوزىنىڭ دە ەرىك-جىگەرى شىڭدالىپ, ءومىردىڭ ءمانىن ۇققانداي بولادى. ولاردىڭ ومىرگە قۇشتارلىعى گۇلجاندى دا جىگەرلەندىرەدى.
بۇگىندە الەۋمەتتىك قىزمەتكەر مىندەتىنىڭ قىزمەتىنىڭ دە ءمانى وزگەرگەن. كوپ ادام ناۋقاستىڭ ءۇيىن جيناپ, اسىن ءپىسىرىپ بەرەدى دەپ ويلايدى. الايدا گۇلجاننىڭ مىندەتى وزگەشە. ول ءوزىنىڭ قاراۋىنداعى التى بالانىڭ ۇيلەرىنە اپتاسىنا ەكى رەت بارادى. ەسىكتەن كىرە, جابىرقاۋ جانداردىڭ جۇزىنە كۇلكى ءۇيىرتىپ, جانىن جادىراتۋعا تىرىسادى. ءبىر جارىم ساعاتتىڭ ىشىندە بالانىڭ كۇندەلىكتى تىرلىگىن تۇرلەندىرىپ, قامكوڭىل انالارىنا دەمەۋ بولا بىلەدى. كەيدە سابيلەردى سەرۋەنگە الىپ شىعادى, قالا باسسەيندەرىنە اپارىپ, شومىلدىرادى. بىرگە وتىرىپ مۋزىكا تىڭداپ, ەندى بىرىمەن سۋرەت سالادى. دۇنيەدە ءسابيدى, اسىرەسە كەمتار جاندى الداي المايسىڭ. كوڭىلىنە بىردەڭە جاقپاسا, ىقىلاسىڭنىڭ شىنايى ەكەنىن سەزىنبەسە تومسىرايىپ قالاتىنى بار.
«وسىدان بىرنەشە جىل بۇرىن قاراۋىمدا ءبىر مىلقاۋ بالا بولدى. ويىنداعىسىن جەتكىزە الماسا ىزالانىپ, قولىنا تۇسكەن زاتپەن تەرەزەنىڭ اينەگىن سىندىرا باستايدى ەكەن. بىردە سول بالانىڭ ءۇيىنىڭ تۇسىنان ءوتىپ بارا جاتىپ, ونىڭ تەرەزەنىڭ الدىندا تۇرعانىن كوردىم. تانىپ, قولىمدى بۇلعاپ جونىمە كەتە بەردىم. بىرنەشە كۇننەن كەيىن ءتيىستى ۋاقىتتا وسى ۇيگە قايتا باس سۇقتىم. اناسى قۋانىپ الدىمنان شىقتى. سويتسە, وتكەن جولى بالانىڭ اشۋلانىپ, تەرەزەنى قيراتقالى تۇرعان ءساتى ەكەن, كوشەدە ءوتىپ بارا جاتقان مەنى كورىپ, رايىنان تەز قايتىپتى. سودان بەرى قيت ەتسە, تەرەزەنى شاعىپ تاستايتىن ادەتىن تاستاپتى. ول ەندى سول تەرەزەگە قاراپ, مەنى توسادى ەكەن. وسىنداي بەيكۇنا سابيلەردىڭ مەنىڭ جولىما قاراپ, سارىلىپ كۇتەتىنى ەسىمە تۇسكەندە جۇرەگىم شىمىرلاپ, قويا بەرەدى», – دەيدى گۇلجان اقىلبەكقىزى.
تۇلا بويىندا تيتىمدەي جاساندىلىق جوق, ادامعا جاقسىلىق جاساعىسى كەلىپ ەلپىلدەپ تۇراتىن كىشىپەيىل جان, ەلوردامىزدىڭ الەۋمەتتىك قىزمەتكەرى گۇلجان – وسىنداي شەكسىز مەيىرىم يەسى.
