جاردەماقى كوبەيە مە؟
ماجىلىستە دەپۋتات ەرلان سمايلوۆ بالا كۇتىمى مەن كوپبالالى وتباسىلارعا بەرىلەتىن جاردەماقىنى كوبەيتۋدى ۇسىندى.
ونىڭ ايتۋىنشا, ازىق-تۇلىك, كوممۋنالدىق قىزمەت ءتاريفى ۇدايى قىمباتتاپ, ءومىر سۇرۋگە قاجەت دۇنيەلەر قۇنى ءوسىپ بارا جاتقان جاعدايدا مۇگەدەكتىگى بار ادامدار, بالا تۋىنا بايلانىستى دەمالىستا وتىرعان انالار, كوپبالالى وتباسىلار, زەينەتكەرلەر ءۇشىن مەملەكەتتىك جاردەماقى مەن زەينەتاقى مولشەرىنىڭ ارتۋى – اسا ماڭىزدى ماسەلە.
– پرەزيدەنت قاسىم-جومارت توقاەۆتىڭ شەشىمى بويىنشا 2022 جىلعى 1 قاڭتاردان باستاپ ەڭ تومەنگى جالاقى قازىرگى 42500 تەڭگەدەن 60 مىڭ تەڭگەگە نەمەسە 41 پايىزعا وسەدى. الايدا ەڭبەك جانە حالىقتى الەۋمەتتىك قورعاۋ مينيسترلىگى مۇگەدەكتىگى بار ادامداردىڭ, ءبىر جاسقا دەيىنگى بالا كۇتىمىنە بايلانىستى ۇيىندە وتىرعان انالاردىڭ, كوپبالالى وتباسىلاردىڭ جاردەماقىسىن, سونىمەن قاتار ەڭ تومەنگى زەينەتاقىنى ۇلعايتۋ ماسەلەسىن قاراستىرىپ جاتقان جوق, – دەيدى دەپۋتات.
ونىڭ سوزىنشە, 2022-2024 جىلدارعا ارنالعان بيۋدجەت جوباسىندا مينيسترلىك الەۋمەتتىك جاردەماقىنىڭ بارلىق ءتۇرىن 2022 جىلعى 1 قاڭتاردان باستاپ 5 پايىزعا ارتتىرۋدى جوسپارلاپ وتىر. بىراق بۇل كولەم ينفلياتسيانىڭ ستاتيستيكالىق ءوسىمى تۇگىلى, ازىق-تۇلىك پەن كيىمنىڭ, ءتۇرلى قىزمەتتەر مەن تاريف باعاسىنىڭ شىعىنىن جاپپايدى.