جاستاردىڭ كۇشى – ءبىلىمى مەن بىرلىگىندە
كەشە تاۋەلسىزدىك سارايىندا مەملەكەت باسشىسى, «نۇر وتان» پارتياسىنىڭ توراعاسى نۇرسۇلتان نازارباەۆتىڭ قاتىسۋىمەن «ەلباسىمەن بىرگە – جاڭا جەڭىستەرگە!» اتتى جاستار فورۋمى ءوتتى.
ەلىمىزدىڭ بولاشاعى – بۇگىنگى جاستار. ولار ءبىلىمدى, پاراساتتى, وتانسۇيگىش سەزىمىن جۇرەگىنە ۇيالاتقان ازاماتتار بولسا, قازاقستاننىڭ كەلەشەگى دە سەنىمدى قولدا. ەلباسى وسكەلەڭ ۇرپاق الدىندا تاۋەلسىزدىكتىڭ قادىرىنە جەتۋ, تۋعان ەلى مەن جەرىن ءسۇيۋ, تاريحتان تاعىلىم الۋ ماسەلەلەرى توڭىرەگىندە كەلەلى اڭگىمە ءوربىتتى.
بۇل فورۋمنىڭ ماقساتى – جاڭا جاھاندىق جاعدايدا ەلىمىزدىڭ دامۋىنداعى جاستاردىڭ ءرولىن ايقىنداۋ ەكەندىگىن اتاپ وتكەن مەملەكەت باسشىسى قازاق ەلىندە جاسالىپ وتىرعان جاقسىلىقتار مەن جەتىستىكتەردىڭ ءبارى جاستاردىڭ يگىلىگىنە ارنالعانىن ەسكە سالدى. «ءبىز اتا-بابامىزدان ميراس بولىپ قالعان اتامەكەنىمىزدى تاۋەلسىز ەل ەتتىك. تۇرمىسى شالقىپ, ءتۇتىنى ءتۇزۋ شىققان باقۋاتتى مەملەكەتكە اينالدىردىق. كۇللى دۇنيە ءجۇزى قازاق دەگەن ەلدىڭ بار ەكەنىن ءبىلدى. مۇنداي تاۋەلسىز ەلدە ءومىر ءسۇرۋ – ۇلكەن باقىت. ونىڭ قادىرىنە جەتۋ – ءوز قولدارىڭىزدا. ەندىگى سەندەردىڭ الدارىڭدا تۇرعان نەگىزگى مىندەت – تۇراقتىلىقتىڭ تۇعىرى – تاتۋلىق پەن بىرلىكتى تۇمارداي ساقتاۋ. ول ءۇشىن ارقايسىمىز, اسىرەسە, سىزدەر, جاستار, وزدەرىڭىزگە جۇكتەلگەن تاريحي جاۋاپكەرشىلىكتى سەزىنە بىلۋلەرىڭىز كەرەك. جاستار تاۋەلسىزدىكتى كوزدىڭ قاراشىعىنداي قورعاپ, ەلدىگىمىزدىڭ تۇعىرىن بيىكتەتە ءتۇسۋى قاجەت» دەدى پرەزيدەنت.
جيىنعا قاتىسۋشىلار ەلباسىنىڭ اۋزىنان ۇلتتىق تاريح قۇندىلىقتارى جونىندە دە تاعىلىمدى اڭگىمە تىڭدادى. ول قازاقتىڭ تامىرى تەرەڭ تاريحى ازات ەل بولۋىمىزدىڭ ءىرگەتاسى بولعانىن اتاپ ءوتتى. ۇلى قۇندىلىقتاردى ۇلىقتاي ءبىلۋ – ءاربىر جاستىڭ, ءاربىر پرەزيدەنتتىڭ, بارشانىڭ جاۋاپكەرشىلىگى. بيىل قازاق حاندىعىنىڭ 550 جىلدىعى اتالىپ ءوتۋىنىڭ ءوزى ۇلكەن مانگە يە. سوندىقتان جاس ۇرپاق تاريحتان تاعىلىم الا وتىرىپ, ءوز مەملەكەتىن جاقسارتۋدى ويلاپ, ونىڭ وركەندەۋىنە ۇلەس قوسۋى ءتيىس. جاستاردىڭ ارقايسىسى قازاقستاننىڭ ۇلتتىق يدەياسى – ماڭگىلىك ەلدى ىسكە اسىرۋعا بەلسەنە اتسالىسۋى كەرەك. ول ءۇشىن جاستار جان-جاقتى ءبىلىم الۋعا ۇمتىلعانى ابزال. «جاستاردىڭ كۇش-جىگەرى – ءبىلىمى مەن بىلىگىندە, ءبىرلىگى مەن وتانسۇيگىشتىگىندە. وسى قاسيەتتەردى بويىنا جيناعان جاستارى بار ەلدىڭ بولاشاعى دا جارقىن» دەدى نۇرسۇلتان نازارباەۆ.
بۇگىندە ەلىمىز الەمنىڭ وزىق وتىز ەلىنىڭ قاتارىنا قوسىلۋعا تالپىنىپ وتىرعانى بەلگىلى. بۇل مۇراتقا جەتۋ ءۇشىن ەكونوميكانى, يننوۆاتسيالىق تەحنولوگيانى دامىتۋدىڭ ماڭىزى زور. ەلباسىنىڭ ايتۋىنشا, ەكونوميكا دامۋى توقتاعان كەزدە, مەملەكەتتiڭ العا جىلجۋى دا توقتايدى. باسەكەگە قابىلەتسىز ەكونوميكا كوپ ۇزاماي قۇلدىرايدى. تاريح ەكi باعانى عانا بiلەدi: نە جەڭەسiڭ, نە جەڭiلەسiڭ. سوندىقتان دامىعان ەلدەر كوشىنەن قالماي, مەملەكەتىمىز العا دامۋى ءۇشىن جاستار ەرىنبەي وقىپ, قاجىرلى ءارى ءتيىمدى ەڭبەكتەنۋى كەرەك. ول ءۇشىن ەلىمىزدە بارلىق مۇمكىندىك قاراستىرىلعان. ەلدىڭ الدىنا قويىپ وتىرعان باستى ماسەلە دە – ازاماتتاردى جۇمىسپەن قامتۋ. قالعانىن سانالى ادام ءوزى-اق جاساپ الادى.
جاستار فورۋمىنا ەلىمىزدىڭ تۇكپىر-تۇكپىرىنەن كەلگەن 2 مىڭداي دەلەگات قاتىستى. ولاردىڭ قاتارىندا «جاس وتان» جاستار قاناتى وڭىرلىك فيليالدارىنىڭ وكىلدەرى, جاستار ۇيىمدارىنىڭ كوشباسشىلارى, شىعارماشىل, عىلىمي, جۇمىسشى, اۋىل ورەندەرىنىڭ وكىلدەرى جانە بەلگىلى قازاقستاندىق سپورتشىلار بار.
فورۋم قورىتىندىسى بويىنشا قاتىسۋشىلار قازاقستان جاستارىنا ارناپ «ەلباسىمەن بىرگە – جاڭا جەتىستىكتەرگە!» ۇندەۋىن قابىلدادى.
قىمبات توقتامۇرات