بۇگىن «جاستار» تەاترىندا ەل تاۋەلسىزدىگىنىڭ 25 جىلدىعى جانە استانا كۇنى مەرەكەسىنە ارنالعان «ازاتتىق اياسىندا» اتتى رەسپۋبليكالىق جىر ءمۇشايراسىندا توپ جارعان اقىنداردى ماراپاتتاۋ ءراسىمى ءوتتى. استانا قالاسى اكىمدىگىنىڭ قولداۋىمەن التى جىلدان بەرى ءوتىپ كەلە جاتقان جىر دوداسىنا بيىل 102 اقىن قاتىستى. ونىڭ 12-سىنە جۇلدە بەرىلدى.
– ءمۇشايرانى ۇيىمداستىرۋداعى ماقساتىمىز – جاڭا زاماندى, تاۋەلسىزدىكتى, ەلىمىزدىڭ باس قالاسى – استانانى جىرلاۋ. ەلباسىمىزدىڭ باسشىلىعىمەن ايشىقتالعان قازاقستان تاريحىنداعى جارقىن بەلەستەردى جىر تىلىمەن كەستەلەۋ. سول ارقىلى جاستاردى پاتريوتتىققا, وتانسۇيگىشتىككە شاقىرىپ, ولارعا تاۋەلسىزدىكتىڭ قادىرىن ۇعىندىرۋ, – دەيدى ۇيىمداستىرۋشى تاراپتان بەلگىلى اقىن, مەملەكەتتىك سىيلىقتىڭ لاۋرەاتى, جازۋشىلار وداعى استانا قالالىق فيليالىنىڭ توراعاسى نەسىپبەك ايتۇلى.
سونىمەن, مەملەكەتتىك سىيلىقتىڭ لاۋرەاتى, بەلگىلى جازۋشى قاجىعالي مۇحامبەتقالي باستاعان قازىلار القاسى ءبىرىنشى بايگەنى «استانامەن سىرلاسۋ» ولەڭدەر توپتاماسى ءۇشىن بەلگىلى قالامگەر ادىلبەك ىبىرايىمۇلىنا بەرىپ, قانجىعاسىنا 1 ملن 200 مىڭ تەڭگەنى بايلادى. ەكى ەكىنشى ورىن جۇلدەسى – 900 مىڭ تەڭگەدەن «نۇرلى كوش» ولەڭى ءۇشىن دۇكەن ءماسىمحانۇلى جانە «بەردىعوجا ءباھادۇر» جىرى ءۇشىن داۋلەتكەرەي كاپۇلى الدى. ءۇشىنشى ورىندار ايماقتارعا كەتتى. اتاپ ايتساق, ونى اقتوبەلىك باۋىرجان باباجانۇلى, الماتىلىق نۇروللا ساعاتباەۆ جانە قاراعاندىلىق اسەت امانجولوۆ ءبولىستى. ولاردىڭ ارقايسىسىنا 500 مىڭ تەڭگەدەن بەرىلدى. سونداي-اق, ءۇش استانالىق اقىن – نۇرلان قالقا, ولجاس قاسىم, ەربول الشىنباي, جانە مەدەت بوجان مەن سەمەيلىك اقىن ارمان شەريزات 150 مىڭ تەڭگەلىك ىنتالاندىرۋ سىيلىقتارىن ولجالادى. ساكەن سەيفۋللين مۋزەيى تاعايىنداعان ارنايى سىيلىقتى استانالىق اقىن ەسەنگەلدى ءسۇيىنوۆ العانىن ايتا كەتەيىك.
ماراپاتتاۋ راسىمىندە جۇلدەگەر اقىندار جىر توگىپ, انشىلەر ەلدىكتى اسقاقتاتاتىن اندەرگە سالدى.
امانعالي قالجانوۆ
