Астанадан ауылға дейін…
Астана
Алдағы 19-20 қазанда елордада жастардың денсаулығына және сапалы білім алуына арналған халықаралық конференция өтеді. Оған мемлекеттік органдардың, халықаралық және үкіметтік емес жастар ұйымдарының өкілдері, сондай-ақ отандық және әлемнің 37 елінен саяси сарапшылар қатысады.
Ақтөбе облысы
Елбасы Ақтөбе облысына барған сапарында аймақтағы бес нысанды аралап, өңірде атқарылып жатқан жұмыстарға оң баға берді.
Алматы
ҚР Терроризмге қарсы орталығының ұйымдастыруымен Алматы қаласының халықаралық әуежайы аймағында «Дабыл-Антитеррор – 2018» республикалық жедел-тактикалық оқу жаттығуы өтті.
Маңғыстау облысы
Өңірде «7-20-25» ипотекалық тұрғын үй несиелеу бағдарламасы негізінде екінші деңгейлі банктермен 1,6 млрд теңгеге 194 өтінім қолдауға ие болды.
Қостанай облысы
Арқалық қаласында бір көп қабатты тұрғын үйді өрт шалып, одан 40 адам қауіпсіз жерге көшірілген. Өрт шыққан пәтерден 5 бала құтқарылған. Алдын ала болжам бойынша, өрт газ баллоны редукторының ақауынан болған.
Қызылорда облысы
Қызылордада көгалдағы хоккейден ел біріншілігі басталды. Чемпионаттың шешуші айналымында Жамбыл, Қызылорда облыстарынан, Орал, Қаратау, Шу қалаларынан және Сырдария, Қазалы аудандарынан төрт жас ерекшелігі бойынша 7 команда сынға түседі.
Солтүстік Қазақстан облысы
Облыс орталығында Қожаберген жыраудың еңселі ескерткіші ашылды.
Павлодар облысы
Павлодар қаласында Бұқар жыраудың 350 жылдығына орай Қарағанды облыстық тарихи-өлкетану музейінің «Арқаның асыл мұрасы» атты көрмесі өтуде.
Түркістан облысы
Шардара қаласында алғаш рет «Safari Shardara» халықаралық түйешілердің фестивалі өтеді. Қонақтар Қызылқұм өңірінің табиғатымен танысып, түрлі ойын-сауықтар мен спорттық жарыстарды тамашалайды. Сондай-ақ фестиваль аясында автокөліктердің құмдағы жарысы мен композициялық «Rock racing» шоуы ұйымдастырылады.