БЮДЖЕТ ҚАРАЖАТЫ БАЙЫПТАЛДЫ
Астана қалалық мәслихатының Экономика, өнеркәсіп және кәсіпкерлік мәселелері жөніндегі тұрақты комиссиясының кезекті отырысында 2017-2019 жылдарға арналған қала бюджетінің жобасы талқыланды.
Экономика және бюджеттік жоспарлау басқармасы басшысының орынбасары Гүлнар Жүсіпова Сәулет және қала құрылысы, Кәсіпкерлік және өнеркәсіп басқармасы, Инвестициялар және даму басқармасы және Астана қаласы бойынша Тексеру комиссиясының алдағы үш жылдық бюджеттерінің жобасына талдау жасады.
Баяндамашы алдағы жылдары да шағын және орта бизнестің өркендеуіне ерекше назар аударылатынын айтты. Осыған байланысты түрлі әкімшілік кедергілерді қысқартып, төлемге қабілетті сұраныс жасап, «Бизнестің жол картасы-2020» бағдарламасы бойынша тікелей қаржылай қолдау көрсетілетін болады. Егер болжау сандарға сөз берсек, келесі жылы шағын және орта бизнес саласындағы тауар өндірісінің көлемі 3541 млрд теңгеге жетпек. Бюджетте жоспарланғандай, кәсіпкерлер үшін белгіленген қаражат банк кредиттері бойынша пайыздық мөлшерлеменің бір бөлігін субсидиялау, банк кредиттері бойынша ішінара кепілдік беру сияқты қаржыландыру көздері ескерілген.
Инвестициялар және даму басқармасы бойынша Астана қаласының 2017-2019 жылдарға арналған бюджетінде 3 417 605 мың теңге жобаланған. Ол үш кезеңде, ағымдағы алты бағдарламаның шеңберінде жүзеге асырылады. Астананың жаңа елорда ретіндегі халықаралық беделін көтеруге, оның гүлденуіне, қаланың инновациялық дамуын қамтамасыз ету үшін қаржы қарастырылған. Туризм қызметін жетілдіру үшін де бюджеттен қомақты қаржы жоспарланып, оның көлемі 438 441 мың теңгені құрап отыр.
Сәулет және қала құрылысы басқармасы жергілікті деңгейде сәулет және қала құрылысы саласындағы мемлекеттік қызметті жүзеге асырады. Осы бағыттағы қызметтің шығындарын есептеген баяндамашы жоспарланған қаражатқа талдау жасап, алдағы үш жылда игерілетін қаржының болжалды нәтижесіне тоқталды.
Айгүл УАЙСОВА