Елордада «25 жұлдызды күн» шеңберінде бірнеше салтанатты шараның ұйымдастырылуына Қазақстан халқы Ассамблеясы мұрындық болды. Соның бірі – №3 мектеп-гимназияда оқушылар арасында «Біз – бір ағаштың бұтақтарымыз!» тақырыбымен өткізілген достық сабағы.
Мерекелік сабақта поляк, неміс, шешен-ингуш, татар мектептерінің белсенділері өнер көрсетті. Балалар отансүйгіштік және халыққа құрмет тақырыптарында өлеңдер оқып, мақал-мәтелдер айтты, өз тілдерінде әндер орындады.
Елорда тұрғындары мен қонақтары үшін ұйымдастырылған ұлттық тағамдар мен тәттілермен толтырылған мерекелік дастарқан, қолданбалы өнер бұйымдарының көрмесі мерекенің көркін қыздыра түсті.
Сонымен қатар, Астана қаласы әкімдігінің жанындағы «Қоғамдық келісім» мекемесінде этномәдени бірлестіктердің Қазақстан Республикасының тәуелсіздігі жылдары қол жеткізген жетістіктерінің көрмесі өтті.
Келушілер елордадағы этномәдени бірлестіктердің күнделікті еңбегімен танысуға мүмкіндік алды.
Кездесуде Қазақстан халқының бірлігі мен келісімін нығайтудағы ҚХА-ның рөлі, жастарды патриоттық және рухани-адамгершілік тәрбиесіне қатысты мәселелер талқыланды.
