Алдағы жылы Астанада өтетін «ЭКСПО-2017» халықаралық мамандандырылған көрмесі Қазақстанның тәуелсіздік жылдарындағы экономикалық жетістіктерін ғана емес, елдің бай тарихы мен мәдениетін төрткүл әлемге паш етуі тиіс. Мемлекетіміздің әр аймағында ұлтымыздың өткен жолынан сыр шертетін, шетелдіктерді қызықтыратын тарихи мекендер баршылық. Ел ішінен қазақ халқының тамырын тереңнен тартатын өнерімен қонақтарды тамсандыратын өнерпаздар да табылары сөзсіз.
ҚОНАҚТАР КҮЛЛІ ҚАЗАҚСТАНДЫ АРАЛАЙДЫ
Ірі халықаралық шараны ұйымдастырушылар да сол мақсатты көздеп, көрме қатысушылары мен қонақтарына өңірлерге сапарларды дайындап қойыпты. Жақында ҚР Инвестициялар және даму министрі мен ҚР Мәдениет және спорт министрінің бірлескен бұйрығымен туристік бағдарлар тізбесі бекітілді. Оған жалпы алғанда Астана мен Алматы қалалары мен еліміздің он төрт облысын қосқанда 73 маршрут енгізілді. Бұл дегеніміз – меймандар Қазақстанның бүкіл аймағын аралайды деген сөз. «Атың барда жер таны желіп жүріп» деп қазақ айтпақшы, қонақтар көрме өтетін кезеңде ұйымдастырушылар сайлап берген көлікпен Алтайдан Атырауға дейін көсіліп жатқан ұланғайыр даламызды көріп қалады.
«Туристік сапарлар Астанадан бастау алады. Елорданың еншісіне 6 бағдар тиіп отыр. Ал ең көп маршрут мыңжылдық тарихы бар Алматы қаласына бұйырды. Алатау баурайындағы әсем шаһар бойынша 19 бағдар белгіленді. Қалған маршруттар облыстардың еншісінде» дейді ҚР Инвестициялар және даму министрлігі Туризм индустриясы департаментінің директоры Марат Иғали.
Оның айтуынша, туристік негізгі бағдарларды анықтау мақсатында аталмыш департамент «Астана-ЭКСПО-2017» ҰК» АҚ мен облыс әкімдіктерімен бірлескен жұмыстарды жүргізді. Бұл маршруттарды белгілегенде, туристік сапарларды сәтті ұйымдастыруға жол ашатын басты талаптар да назарға алынды.
САПАРЛАР АСТАНАДАН БАСТАЛАДЫ
«Көрме қатысушылары мен қонақтары ең алдымен Астанаға келіп, «ЭКСПО-2017» кешенін аралауы тиіс. Оларға ұсынылатын бағдарлама да тарихи, мәдени және сәулеттік тұрғыдан мазмұнды, ұлттық бояуы қанық болуы керек. Өңірлердегі туристік нысанның жайынан хабар беретін ақпараттық анықтаманы да қызықты етіп ұсынуға тиістіміз. Туристік бағдарға этно және экотуризм элементтері енгізілуі қажет. Туравтобустарға арналған тұрақтардың болуын да естен шығармадық. Туристік нысандарға апаратын жолдарда нысанның қайда орналасқанын көрсететін белгі де орнатылуы керек. Музейлер аудиогидтермен қамтамасыз етілуі тиіс. Экскурсия жүргізетін гидтер шет тілдерінде сөйлей біліп, олардың біліктілігі де жоғары болғаны жөн деп отырмыз. Кейбіреулерге ұсақ боп көрінетін мәселелерге де назар аудардық. Атап айтсақ, туристік автобустарды теледидар мен аудиогидтермен жабдықтауды, туристік топтарды синхронды аударманың жеке қабылдағыштарымен қамтамасыз етуді, тоқтайтын жерлерде телефонды қуаттандыратын жерлердің, қоғамдық дәретханалардың болуына дейін ойластырып қойдық. Сондай-ақ, қазақ, орыс және ағылшын тілдеріндегі веб-сайтты жасауды да шештік» дейді М.Иғали.
Көрмеге қатысушылар мен қонақтар сапарларға жеңіл автокөліктермен, автобустармен, теміржол мен әуе қатынасы арқылы шығады. Кейбір жерлерде жаяу, салт атты және велосипедпен де жүре алады. Оларға тау өзендері мен жасанды каналдармен жүру үшін үрленетін үлкен қайықтар – рафтинг те ұсынылады.
ЕЛ ЖҮРЕГІ ЕЛОРДА
ҚР Инвестициялар және даму министрлігі Туризм индустриясы департаментінің директоры айтқандай, Астана қаласы бойынша алты туристік бағдар белгіленген. Ұйымдастырушылар алдымен көрмеге қатысушылар мен қонақтарға елорданың ажарын айшықтайтын көрікті орындарды аралатады. Олардың қатарына «Хан Шатыр» сауда-ойын-сауық орталығы, «Астана-Бәйтерек» монументі, «ЭКСПО» көрме кешені кіріп отыр. Осы жерден шығып, «Бурабай – Қазақстанның маржаны» бағдарламасымен қонақтарды бұл курортқа апару көзделуде. Ал одан кейін Алматыға гранд-тур ұйымдастырылмақ.
Екінші кезеңде қонақтар «Думан» ойын-сауық орталығына, Астаналық циркке, «Атамекен» Қазақстан картасы» этно-мемориалдық кешеніне, Астананың орталық саябағына барады. Әрі қарай «Астана-Опера» мемлекеттік опера және балет театрын, «Ғашықтар» саябағын, «Нұр Астана» мешітін көреді. Сондай-ақ, оларға «Мәңгілік ел» триумф аркасын, «Қазақ елі» монументін, «Нұржол» сулы-нулы желекжолы бойындағы барлық әсем ғимараттарды көрсету жоспарлануда. Әрине, ҚР Тұңғыш Президенті – Елбасының кітапханасы, «Әзірет Сұлтан» мешіті, Тәуелсіздік сарайы, ҚР Ұлттық музейі, Бейбітшілік және келісім сарайы, «Президенттік» саябағы, Министрліктер үйі, «Ақорда» Президент резиденциясы, «Қазақстан» орталық концерт залы да көрсетіледі.
Қалған төрт бағыт, сәйкесінше, «Елорда, сенің ашылуың», «Kazakhstan Switzerland», «Sights of the capital of Kazakhstan» және «Астана – еліміздің жүрегі» атауларын алған. Бұл бағдарларда да көрме қатысушылары мен қонақтарына ұсынылатын көрікті жерлер баршылық. Бір сөзбен айтқанда, көрме кезінде елорданың сәні мен мәні жарасқан барлық орындар паш етіледі.
БАЯНАУЫЛ, БІР ШЕТІ ҚАРҚАРАЛЫ
Басқа облыстарды айтатын болсақ, Ақмола өңірінде қонақтар Бурабай шипажайына қоса, Қорғалжын қорығына барады. Қарағандының Қарқаралысы мен Керекудің Баянауылына сапар шегеді. Жалпы алғанда, еліміздің оңтүстігі мен солтүстігіндегі, батысы мен шығысындағы, орталығындағы барша тарихи жерлерді көреді. Бұл тұрғыдан алғанда, «ЭКСПО-2017» халықаралық көрмесі Қазақстандағы туризмнің дамуына да өзінің үлкен үлесін қоспақ. Шындығын айтқанда, қазақстандықтардың өздерінің де елімізде көретін жерлер көп. Сондықтан көрме уақытындағы туристік сапарлар баршаға қызықты болады деп ойлаймыз. Ат-бабаларымыз «Балқан, Балқан, Балқан тау, ол да біздер көрген тау» деп айтатындай, біраз жерді көретін күндерге баршамызды жеткізсін.
Аманғали ҚАЛЖАНОВ
