ELDIŊ EREN ERLERI
Eldıŋ mereiın, memlekettıŋ märtebesın, halyqtyŋ abyroiyn, ūlttyŋ namysyn köteruge kelgende sport saiypqyrandary aldymen eske tüsıp jatady. Bıle bılsek, būl — zaŋdylyq. Osy oraida, äsırese, Olimpiada oiyndarynda jüldeger atanǧan sportşylarymyzdy batyrǧa balap jatamyz. Şynymen de törtkül dünienıŋ kıl myqtylary bäsekege tüsetın alaman saiysta top jaru naǧyz erlık emes pe?!
Aita bergımız keledı, biyl Londonda ötken HHH jazǧy Olimpiada oiyndarynda Qazaqstan sportşylary būryn el tarihynda bolmaǧan jetıstıkke qol jetkızdı. Jetı – altyn (!), bır – kümıs, bes – qola medal! Eldık bäsekede bükıl dünie jüzı boiynşa 12-şı orynnan körındık. Būl – täuelsız el bolǧaly qol jetkızgen tolaǧai tabysymyz. Mıne, osylaişa eldık abyroiymyzdyŋ asqaqtauy sol saiypqyran sportşylarymyzdyŋ arqasy. Sondyqtan da Olimp şyŋyn baǧyndyrǧan är sportşymyz el maqtanyşy, halqymyzdyŋ batyrlary bolyp qala bermek.
Londonda dübırlı doda bastalǧan sätte-aq qazaq janküierlerı qalpaǧyn aspanǧa atyp quanyşqa bölenedı dep kım oilaǧan?! Oilasaq ta, oilamasaq ta, qazaq elınıŋ naǧyz bır patriot sportşysy Aleksandr Vinokurov velojarysta şaşasyna şaŋ jūqtyrmai, Olimpiada chempiony ataǧyn jeŋıp aldy. Osydan 12 jyl būryn Sidnei oiyndarynda kümıs jüldeger bolǧan ataqty sportşymyzdy sol kezeŋde şetelderge şaqyrǧandar da bolǧan edı. Alaida, ol «Tuǧan elın eşqaida aiyrbastamaimyn» dep Qazaqstan tuy astynda saiystarǧa qatysa berdı. Söitıp, özınıŋ sporttyq ǧūmyryna London olimpiadasynyŋ altynymen nükte qoidy.
Bükıl älem janküierın asqan küşımen, asa salqynqandy mınezımen taŋǧaldyrǧan auyr atletşı qyzymyz Zülfiia Chinşanlo Olimpiada chempiony ǧana bolyp qoimai, älem jäne Olimpiada rekordtaryn jaŋartyp jıberdı. Zülfiia London törınde qazaqtyŋ tuyn jelbıretkende barşa qazaqstandyqtar quanyşqa bölengenı sözsız. Sol jeŋısten keiın chempion qyzymyz «Men älı talai jarysta Qazaqstan tuyn biıkten jelbıretemın» degen edı. Sol kezde-aq onyŋ da naǧyz patriot ekenıne şübäsız sengenbız, sene bermekpız de.
Şarşy alaŋnyŋ şyn şeberı Serık Säpiev Olimpiada chempiony ataǧymen bırge eŋ üzdık boksşyǧa berıletın Barker kubogyn qosa ūtyp aluy naǧyz erlık desek jarasady. Ekı dürkın älem chempiony bolǧan Serıktıŋ būl jeŋısı qazaq sportynyŋ tarihi jetıstıgı boldy desek te bolady. Al taǧy bır patriot sportşymyz İlia İlin de Qazaqstan sportyna ölşeusız üles qosty. İlia ekı dürkın Olimpiada chempiony atanǧan äzırge jalǧyz qazaqstandyq sportşy bolyp otyr.
Olim altynyn jeŋıp alǧan jeŋıl atlet Olga Rypakova, auyr atletter Maia Maneza men Svetlana Podobedova da Qazaqstan mereiın köteruge orasan üles qosqandaryn airyqşa atap ötemız. Öitkenı, būl sportşylardyŋ bärı qazaq elınıŋ atyn da, abyroiyn da törtkül düniege tanytty. Būl – ülken jeŋıs, būl – eren erlık.
Ökınışke qarai, kei jaǧdaida osyndai ataqty sportşylarmyz turaly köŋılge kırbıŋ tüsıretın jaittar da bolyp jatady. Mäselen, özınıŋ tuyp-ösken jerıne baryp kelgen Zülfiia Chinşanlony «Qytaiyna qaita ketedı» dep jazǧyrǧandar tabylsa, Vinokurovtyŋ osydan ekı jyl būrynǧy bır jeŋısın satyp aldy degen şeteldık mamandardyŋ pıkırın jaŋalyq aşqandai jariialaǧandar da az bolmady. Al, şyn mänınde osy ekı sportşy da keleşekte tek Qazaqstan namysyn qorǧaitynyn talai märte aitqany esımızde. Solai bolyp ta qalmaq. Sondyqtan el mereiın ösırgen chempiondarymyz turaly jalǧan emes, jaǧymdy pıkırımızdı saqtap jüreiıkşı degım keledı.
London olimpiadasynda Qazaqstan tuyn biıkten jelbıretken saiypqyran sportşylarymyzdyŋ jeŋıstı dästürı 2016 jyly Braziliiada ötetın Olimpiada oiyndarynda jalǧasyn tabady degen senımdemız. Jeŋımpazdar dästürı jeŋısterge bastai bersın!
Ǧalym QOJABEKOV