Astana qalasynyŋ äkımı Baqyt Sūltanovtyŋ töraǧalyǧymen elorda tūrǧyndarynyŋ ömır sapasyn jaqsartuǧa arnalǧan jūmys tobynyŋ otyrysy boldy. Otyrysta şahar basşysy osy tarapta atqarylyp jatqan şaralarǧa toqtaldy.
«Bügınge deiın audan äkımderı men basqarma basşylary tūrǧyndardy qabyldap, olardyŋ jaǧdaiymen jaqyn tanysty. Sol boiynşa az qamtylǧan otbasylar turaly derekter qory qūrylyp, bıraz mäseleler saraptaldy. Bırınşı kezekte kömekke mūqtaj otbasylarǧa azyq-tülık, kömır jäne mektepke qajettı qūral-jabdyqtar jetkızılıp, aqparattyq-tüsındıru jūmystary jürgızıldı. Demeuşıler men erıktıler audan äkımşılıkterınıŋ uaqytşa tūrǧyn jailar men jeke üilerge gaz analizatorlaryn ornatu bastamasyn qoldap otyr. Sondai-aq ärbır otbasyny qoldauǧa jeke jospar jasaldy» dedı äkım.
13 aqpannan bastalǧan «Aşyq esık» aptalyǧy 22 aqpanǧa deiın jalǧasady.
Tūrǧyndardy qabyldau kezınde köp köterılgen mäselenıŋ bırı – baspana jaǧdaiy. Sondyqtan qala äkımı jauapty mamandarǧa naqty tapsyrmalar jüktedı. Mäselen, öz orynbasary Asqar Ämringe: «Sızge eskı jäne apattyq jaǧdaidaǧy tūrǧyn üilerdı süru, üleskerlerge kömek körsetu üşın qūrylǧan instituttardy bırıktıru esebınen qosymşa resurstardy qaraudy tapsyramyn. Sondyqtan osy ekı baǧyt boiynşa biudjetten qarjy qarastyryp, qalanyŋ şetkı tūrǧyn alaptaryn eskı jäne apattyq jaǧdaidaǧy üilerdı süru baǧdarlamasyna qosu qajet. Bälkım, mūny qoldanystaǧy qalanyŋ şetkı alaptaryn qaita jaŋartu jönındegı baǧdarlamaǧa tolyqtyrular engızu arqyly jasau kerek şyǧar. Bız az qamtylǧan jäne sonyŋ ışınde köpbalaly otbasylardy munisipaldyq tūrǧyn üimen qamtamasyz etuımız kerek» degen Baqyt Tūrlyhanūly sözın odan ärı jalǧap: «Adamdarǧa jalǧa berıletın munisipaldy tūrǧyn üilerdıŋ qoljetımdılıgı de kürdelı ekendıgın tüsınemız. Mäselen, päter aluǧa nesie räsımdeu üşın azamattardyŋ tabysy oǧan jete bermeidı. Sondyqtan adamdardyŋ uaqytşa jailar men jataqhanalarda nemese zaŋsyz salynǧan nysandardaǧy bölmelerdı 15-20 myŋ teŋgege jaldap tūryp jatqanyn körıp otyrmyz» dedı ol.
Sondai-aq, otyrys barysynda şahar basşysy «Jūmyspen qamtudyŋ jol kartasy» men «Biznestıŋ jol kartasy» baǧdarlamalarynyŋ mümkındıkterın paidalana otyryp, qiyndyqqa tap bolǧan otbasyǧa äleumettık qoldau men atauly äleumettık kömek körsetudı mındettedı. Qala tūrǧyndarynyŋ tölem qabılettılıgın arttyru qajettılıgıne de basa män berıldı.
Baqyt Sūltanov orynbasary Malika Bektūrovaǧa köpbalaly otbasy müşelerın joǧary jalaqy töleitın jūmyspen qamtamasyz etu mümkındıgın qarastyrudy tapsyrdy. «Eger bılımı jetkılıksız bolsa, onda azamattyŋ bılıktılıgın arttyrudy qamtamasyz etıp, sodan keiın jūmysqa ornalasu şarasyn qolǧa alu qajet. Jäne qolda bar aqparattyŋ negızınde kömek körsetu, sonyŋ ışınde tūrǧyn üi sertifikattaryn tapsyrudy ūsynu üşın resurstardy jūmyldyru algoritmın äzırleudı jükteimın» dedı ol.
Sonymen qatar elorda basşysy audan äkımderı men basqarma basşylaryna «Aşyq esık» aptalyǧy aiasynda tūrǧyndarmen jeke kezdesuler ötkızudı jalǧastyra beru kerek ekenın aitty. «Köpbalaly otbasylar men basqa da azamattar tüsırgen barlyq aryzdar men ötınışterdı jedel türde jüiege tüsırıp, ony taldap, Ükımet janyndaǧy jūmys tobynyŋ qarauyna joldau qajet» dedı Baqyt Sūltanov.
