Astanada zamanaui ülgıdegı tūrǧyn üiler jeterlık. Solardyŋ bırı – «Nova sity» tūrǧyn üi keşenı. Būl – «Otau group» qūrylys kompaniiasy salyp jatqan nysan.
Bas qalada qoltaŋbasy bar
Qazırgı uaqytta atalmyş nysannyŋ teŋ jartysy ǧana salynǧan. Qūrylys alaŋynda joba jetekşısınıŋ orynbasary Şoqan İbraevpen tıldestık. Onyŋ aituynşa, būl jerde aldaǧy uaqytta «Nova sity» yqşam audany paida bolmaq. Ülken parking salynyp, osy aumaqta mektep te boi kötermek.
– Būl nysandy saludy 2016 jyldyŋ 19 şıldesınde bastaǧan edık. Ekı jyldyŋ ışınde 12 üi paidalanuǧa berıldı. Osy aidyŋ soŋyna qarai taǧy ekı üidıŋ qūrylysy tolyqtai aiaqtalady. Jospar boiynşa 2020 jylǧa deiın mūnda 24 üi salynuy tiıs, – deidı ol.
Aita ketu kerek, Şoqan İbraev – qūrylys salasynda 1987 jyldan berı eŋbek etıp kele jatqan täjıribelı maman. Negızgı mamandyǧy – qūrylysşy. Eŋbek jolyn qalaqşy, monolitşı bolyp bastaǧan ol özınıŋ tuǧan jerı Ekıbastūz ben Semei qalasynda da uchaske basşysy, prorab, brigadir bolyp bıraz jyl qyzmet etken. 2000 jyldardan berı Astananyŋ da salynuyna özındık üles qosyp keledı. «Nūrsaia-2», «Grand Astana», «Kampus» siiaqty köptegen tūrǧyn üi keşenderı men qūrylysy aiaqsyz qalǧan qaladaǧy bırqatar problemaly nysandardy da saluǧa injenerlık salasy boiynşa basşylyq etken İbraev – 30 jylǧy eŋbek ötılınde marapatqa da kende emes, türlı medaldar men alǧys hattardyŋ iegerı.
Bes adamdy qūtqarǧan jūmysşylar
«Nova sity» tūrǧyn üi keşenınıŋ qūrylys alaŋynda ekı auysymda jüzdegen adam jūmys ısteidı. Solardyŋ ışınde bılektı ǧana emes, jürektı jıgıtter de az emes. Aǧymdaǧy jyldyŋ nauryz aiynda atalmyş tūrǧyn üi keşenınıŋ bırınıŋ 7-qabatynda ört şyǧyp, qyzyl jalynǧa ainalǧan päter ışınde şiettei üş bala men olardyŋ anasy jäne äjesı qalyp qoiǧan. Tüskı üzılıste jürgen monolitşı Ruslan Berıkov pen Aqylbek Jaqaiymov, Ädılbek Daǧystan jäne tereze ornatuşy Jasūlan Baiseiıtov pen injener Ruslan Jalbaqov örttı baiqaǧanda bırden oqiǧa ornyna jügırıp baryp, qūtqaruşylar kelgenşe 5 adamdy 6-qabattyŋ terezesınen aman alyp şyqqan. Olardyŋ būl erlıgı üşın Astana äkımı Äset İsekeşev qūrylysşylardy «Belsendı azamat» estelık müsınderımen jäne alǧys hattarmen marapattap, aqşalai syiaqy tabystaǧan bolatyn. Sonymen qatar, qūtqaruşylardy Astana qalasy Tötenşe jaǧdailar departamentınıŋ basşysy Barat Dūzaqbaev «Tötenşe jaǧdaidaǧy erlıgı üşın» tösbelgısımen marapattaǧan-dy.
Qazırgı uaqytta qos Ruslan men Jasūlan tüngı auysymda jūmys ıstep jürgendıkten, qūrylys alaŋynda tek monolitşıler Aqylbek pen Ädılbektı ǧana jolyqtyrdyq. Olardy sol kezdegı oqiǧa turaly sözge tartyp, jūmystary jaily tıldestık.
– Ört bolyp jatqanda oilanyp tūratyn uaqyt bolmady. Köz aldymyzǧa öz otbasylarymyz elestedı. Oqiǧa ornyna bırden jügırıp bardyq. 7-qabattaǧy päterge kök tütınnen kıre almadyq. Sodan 6-qabatqa tüsıp, adamdardy terezeden köterıp aldyq. Qūdaiǧa şükır, olardyŋ bärı dın aman qaldy, – deidı Ädılbek.
Ädılbek pen Aqylbektıŋ qūrylysta jūmys ıstep jürgenderıne 6 jyldan asypty. Jūmys auyr bolsa da, olar osy salaǧa äbden beiımdelıp alypty.
– Negızı, asabalyq, änşılık önerım bar. Bıraq qūrylystan näpaqamdy tauyp, otbasymdy asyrap otyrmyn. Qūrylys qyzyǧy men qiyndyǧy qatar jüretın jūmys qoi. Qystyŋ aiazy men jazdyŋ aptabynda da jūmys ısteimız. Biıktıkke de köz üirenıp qaldy. Köp qabatty üidıŋ töbesınde tūryp, monolit qūiamyz. Keide qalypty asyǧa tarsyldatyp jatqanymyzda denemızge balǧa da tiıp ketedı. Alaida et qyzumen eşteŋe bılınbeidı, – degen Aqylbek būl jūmystyŋ özıne ūnaitynyn aitady.
Qūryş bılektı qūrylysşylardy käsıbi merekelerımen qūttyqtai otyryp, olardyŋ ısterıne sättılık, eŋbekterıne jemıs tıledık.
