…1980 jylǧy Mäskeude ötken Olimpiada oiyndarynan keiın boks üiırmelerıne qazaq balalary qaptap kele bastady. Şarşy alaŋda keremet ädısımen, mänerımen közge tüsken Serık Qonaqbaev sekıldı bolamyn dep talpynǧan jasöspırımnıŋ bırı Erbolat Aşimov edı.
Ol kezde Astana ırgesındegı İnternasionalnyi kentınen qalaǧa bır-aq avtobus jüretın. Qala men kenttıŋ arasy alys emes. Erbolat boks seksiiasyna jazylǧaly osy ekı ortada kün saiyn jüretın bolyp aldy. Bala bolyp bır şarşadym demeidı. Jattyǧudan bır qalmaidy. Künde keşkısın terlep-tepşıp keletın ūlyna äkesı Oljabai bırde «Balam-au, jalyqqan joqsyŋ ba, künde qalaǧa barasyŋ, şarşap-şaldyǧyp kelesıŋ, osyny qoisaŋ qaitedı… Mynau aǧaŋ da özımen qoimai kıp-kışkentai senı de jelıktırıp jürgen…» dep ekı ūlyna bıraz äŋgımesın aitqan da bolatyn. Äke sözınıŋ jany bar edı. Erbolatty boksqa jetektep aparǧan aǧasy Janbolat bolatyn. Alaida, aitqan betınen qaitpaityn Erbolat sol bette «Joq, äke, boksty qoimaimyn! Men qinalyp jürgen joqpyn. Maǧan şarşy alaŋda aiqasqan ūnaidy» dep äkesıne oiyndaǧysyn bükpei aityp saldy. Sodan keiın salmaqty da saliqaly äkesı de, aiauly anasy Mairaş ta boks jaily aitudy doǧaryp, qaita ūldarynyŋ ūmtylysyna qoldau bıldıre bastady.
Alǧaşqy bapkerı Ämır Äubäkırov kiıktıŋ asyǧyndai Erbolatqa ülken senımmen qarady. Bapkerge, äsırese, şäkırtınıŋ mınezı ūnaityn. Qyzuqandy bolatyn. Şarşy alaŋǧa şyqqanda janary ottai janatyn. Özıne soqqy alǧandy ūnatpaityn. Al soqqy alsa qarymta qaitarǧanşa ekpını basylmaityn. Jeŋıl salmaqta aiqasqan, şar bolattai şyp-şymyr jıgıttıŋ boksyna janküierler qyzyǧa qaraityn.
Bylǧary qolǧapqa arbalǧan Erbolat jyl ötken saiyn şeberlıgı şyŋdalyp, täjıribesı tolysa tüstı. Jasöspırımder men jastar arasyndaǧy respublikalyq jarystardan jüldesız qaitpaityn boldy. Ol kezde, iaǧni ötken ǧasyrdyŋ seksenınşı jyldary Sovet odaǧynda sporttyq ataqqa qol jetkızu oŋai emes-tın. «KSRO chempionatyn ūtqannan Europa chempiony bolu jeŋıl» deitın söz sol kezde tegın aitylmaityn.
Erbolat Aşimov bırneşe ret respublika chempionatynda jüldegerler qatarynan körıngenı üşın KSRO sport şeberlıgıne kandidat degen ataqqa ie boldy. Endı eresekter jarysyna tüsem dep jürgenınde äskerge şaqyru aldy.
…1985 jyldyŋ köktemınde öz qatarlastarynan qalmai Qaruly küşterdıŋ qataryna qosyldy. Alǧaşqyda alysqa ūzaǧan joq. Otardaǧy äskeri-oqu bölımşesıne tüstı. Serjant ataǧyn alǧannan keiın Qyrǧyzstanda ornalasqan M.Frunze atyndaǧy gvardiialyq 282-şı motoatqyştar polkınıŋ bırınşı tau batalonyna attandy. Mūnda tauly jaǧdaidaǧy soǧys qimyldaryna daiyndyqtan öttı. Künı-tünı tau şatqaldaryndaǧy jattyǧularǧa qatysty. 1986 jyldyŋ säuır aiynda polk basşylyǧy būiryǧymen Auǧanstanǧa jol tartty.
Bala kezınen şarşy alaŋda şyŋdalǧan, äskeri oquda da üzdık bolǧan jas jauyngerdıŋ qabılet-qarymyn Kabul qalasyndaǧy Bas äskeri keŋesşılık basşylyǧy bırden aŋǧardy. Ony bailanys qyzmetıne alyp qaldy. Osylaişa, Erbolat üşın jauapty qyzmet bastalyp kettı. Bırtındep soǧys jaǧdaiyna etı üirengen jas serjantty basşylyq Gerat provinsiiasyna jıberudı ūiǧardy. Būl kezde atalmyş provinsiia aumaǧynda modjahedter tarapynan Keŋes äskerlerı men Auǧanstan halyq armiiasyna qarsy şabuyldar küşeiıp, köptegen jauyngerler qaza bolǧan qiian-keskı oqiǧalar oryn alǧan. Būl jönınde joǧarǧy äskeri qolbasşylyq ta, qatardaǧy jauyngerler de habardar bolatyn. Erbolat bolsa Auǧanstan halyqtyq armiiasynyŋ 17-şı jaiau äsker diviziiasyna jauapty äskeri keŋesşınıŋ oqqaǧary ärı jürgızuşısı mındetın atqaruǧa kırıstı. Däl osy kezde Erbolat Auǧanstan soǧysynyŋ alapatyn jan-jüregımen sezındı. Alaida, soǧys jūmsaq bolǧandy jaqtyrmaitynyn qazaq jauyngerı jaqsy tüisınetın. Sondyqtan ol qandai qiyndyq bolsa da qaiyspauǧa tyrysty. Oqqa ūşyp qaza bolǧan, jaraqattan janaiqaiy şyrqyraǧan maidandas sarbazdardy körgen saiyn köŋılı qūlazyp ketetın. Bıraq ol soǧystyŋ özı ömır üşın aiqas ekenın tereŋınen tüsıngen edı. Osy qaǧidattan ainymai, Otan aldyndaǧy jauyngerlık antyn adal atqara bıldı. Äskeri basşylyq ta Aşimovtyŋ jauyngerlık erlıgın baǧalady. Ol bırneşe medaldarmen marapattaldy. Elgezek te aqjarqyn azamat bügınde Astana qalasynyŋ Auǧanstan soǧysy mügedekterı men ardagerlerı odaǧy, QR Auǧanstan soǧysy jäne aşyq qaqtyǧystar ardagerlerı odaǧy ūiymdary aiasynda jürgızıletın qoǧamdyq şaralarǧa belsendı qatysyp jür. Maidandas dostary bolsa «Erbolat bızdıŋ patriot» dep qūrmet tūtady.
Äskerden aman-esen oralǧan Erbolat jauynger aldymen joǧary oquǧa tüsudı maqsat ettı. «Talaptyǧa nūr jauar» degen emes pe, Astanadaǧy Euraziia gumanitarlyq universitetınde oqyp, zaŋger mamandyǧyn aldy. Odan keiın Qaraǧandy ekonomikalyq universitetın tämamdady. Alaida, boksqa degen qūştarlyǧy öz degenın ıstetpei qoimady. Erbolat üşın ter müŋkıgen sport zaly, şarşy alaŋdaǧy şaiqastar, jüldege talastyrǧan jarystardyŋ orny bölek edı. Aqyry jüregınıŋ ämırıne könıp boksqa qaita oraldy. Aldymen «Kökşe» universitetınıŋ dene şynyqtyru jäne sport fakultetıne oquǧa tüsıp, bokstan jattyqtyruşy mamandyǧyn alyp şyqty. Diplomyn alǧan soŋ täjıribelı sport mamany Mūrat Mūstafin jetekşılık etetın Astanadaǧy №3 Olimpiadalyq rezervtegı balalar men jasöspırımder sport mektebınde jattyqtyruşy bolyp ıske kırıstı. «Ūiada ne körseŋ, ūşqanda sony ılesıŋ» demekşı, Erbolattyŋ tūŋǧyşy İliias jasöspırımder men jastar arasyndaǧy respublikalyq jäne halyqaralyq jarystarda top jarsa, Temırlany men kenjesı Mansūr bügınde äkelerınen tälım alyp jür. Al süigen jary Tatiana bolsa, äkelı-balaly sportşylar äuletınıŋ basty janküierı bolyp keledı.
E.Aşimov bapker bola jürıp töreşılık qyzmettı de qatar alyp jürdı. Tabiǧatynan ädıldıktı qalaityn, soǧys alapatyn körgen, bokstyŋ qyr-syryn meŋgergen azamattyŋ şarşy alaŋdaǧy töreşılık jasauyna boks federasiiasy tarapynan joǧary baǧa berılıp, ol respublikalyq jarystarǧa qyzmet körsete bastady. Käsıbi şeberlıktı jetıldıru seminarlaryna qatysyp, tiıstı sertifikattarǧa ie boldy. Bügınde Astana qalalyq boks federasiiasy töreşıler alqasynyŋ töraǧasy mındetın de atqarady. Özıne jüktelgen senımdı aqtai bılgen Erbolat Aşimov soŋǧy jyldary eresekter arasyndaǧy Qazaqstan chempionaty men «A» klasty halyqaralyq turnirlerde qazylyq jasap jür. Jaqynda AİBA-nyŋ halyqaralyq därejedegı töreşısı ataǧyn da aldy.
Bala kezınen boksqa arbalǧan Erbolat Oljabaiūly jaqynda taǧy bır quanyşqa keneldı. Olimpiada jüldegerı Marina Volnova jüldesı üşın ötken halyqaralyq turnir barysynda bokstan Qazaqstannyŋ memlekettık jattyqtyruşysy Bolat Abdrahmanov respublikalyq boks federasiiasy atynan bır top mamandarǧa «Qazaqstan boksyna 85 jyl» atauly medaldaryn saltanatty jaǧdaida tabys ettı. Mereiı ösken azamattar qatarynda astanalyq Erbolat Aşimov ta boldy. Olimpiada chempiony Ermahan İbraiymovtyŋ qolynan alǧys hat aldy.
Jauynger-internasionalist, sportşy, bapker ärı töreşı azamattyŋ aq joly ūzaǧynan süiındırsın.