Mümkındıgı şekteulı balalardy qoǧamǧa beiımdeuge, özıne-özı qyzmet etuge üiretıp, qamqorlyq körsetu maqsatynda arnauly äleumettık qyzmetkerler taǧaiyndalady. Güljan Aqylbekqyzy – Almaty audany äkımdıgıne qarasty mügedek balalarǧa üiden qyzmet körsetu bölımınıŋ äleumettık qyzmetkerı.
Jalpy köpşılık bıle bermeitın, köp elenbese de qoǧamda erekşe orny bar, äleumettık qyzmet körsetuşılerdı öz tauqymetın arqalaǧan otbasylar men qoǧam arasyn jalǧaǧan ümıt köpırı dese de bolǧandai. Olardyŋ qarlyǧaştyŋ qanatymen su tasyǧandai kömegı qamköŋıl ana men mügedek balanyŋ ömırıne ızgılık şuaǧyn seuıp jürgenın baǧalaityndar kemde-kem. Güljan – osy salanyŋ beldı mamany. Ülken jürektı jandar ǧana täuekel etetın būl ıspen ainalysuy da kezdeisoq emes-tı. Alǧaşynda pedagog-psiholog mamandyǧyna säikes kelgen soŋ, atqaruǧa kırısken. Uaqyt öte kele mügedek balalarmen jūmysy ädettegı mındettıŋ auqymynan asyp, olardyŋ beidaua ömırıne boilai bastady. Onyŋ adami jauapkerşılıgı, kısınıŋ qaiǧysyna ortaqtasa bılu qasietı «men bolmasam, kım endı?!» degen saualdyŋ jauabyn tabuyna türtkı boldy. Olardyŋ tauqymetıne tereŋ boilaǧan saiyn taŋdauynyŋ dūrys ekenıne közı jettı. Myna düniege jarymjan bolyp kelgen jandardyŋ janyna şuaq bolyp qūiylyp, sarylyp kütıp otyrǧan säbilerdı tastap kete almasyn tüsındı.
Jaratuşy bır qolymen alsa, ekınşı qolymen jarylqaityn siiaqty. Kemtar perıştelerdıŋ bırınıŋ tılı, bırınıŋ közı, endı bırınıŋ estu qabıletı bolmasa da basqa bır darynyn asta-tök etıp jaratady eken. Olarmen aralasqan saiyn, özınıŋ de erık-jıgerı şyŋdalyp, ömırdıŋ mänın ūqqandai bolady. Olardyŋ ömırge qūştarlyǧy Güljandy da jıgerlendıredı.
Bügınde äleumettık qyzmetker mındetınıŋ qyzmetınıŋ de mänı özgergen. Köp adam nauqastyŋ üiın jinap, asyn pısırıp beredı dep oilaidy. Alaida Güljannyŋ mındetı özgeşe. Ol özınıŋ qarauyndaǧy alty balanyŋ üilerıne aptasyna ekı ret barady. Esıkten kıre, jabyrqau jandardyŋ jüzıne külkı üiırtıp, janyn jadyratuǧa tyrysady. Bır jarym saǧattyŋ ışınde balanyŋ kündelıktı tırlıgın türlendırıp, qamköŋıl analaryna demeu bola bıledı. Keide säbilerdı seruenge alyp şyǧady, qala basseinderıne aparyp, şomyldyrady. Bırge otyryp muzyka tyŋdap, endı bırımen suret salady. Düniede säbidı, äsırese kemtar jandy aldai almaisyŋ. Köŋılıne bırdeŋe jaqpasa, yqylasyŋnyŋ şynaiy ekenın sezınbese tomsyraiyp qalatyny bar.
«Osydan bırneşe jyl būryn qarauymda bır mylqau bala boldy. Oiyndaǧysyn jetkıze almasa yzalanyp, qolyna tüsken zatpen terezenıŋ äinegın syndyra bastaidy eken. Bırde sol balanyŋ üiınıŋ tūsynan ötıp bara jatyp, onyŋ terezenıŋ aldynda tūrǧanyn kördım. Tanyp, qolymdy būlǧap jönıme kete berdım. Bırneşe künnen keiın tiıstı uaqytta osy üige qaita bas sūqtym. Anasy quanyp aldymnan şyqty. Söitse, ötken joly balanyŋ aşulanyp, terezenı qiratqaly tūrǧan sätı eken, köşede ötıp bara jatqan menı körıp, raiynan tez qaitypty. Sodan berı qit etse, terezenı şaǧyp tastaityn ädetın tastapty. Ol endı sol terezege qarap, menı tosady eken. Osyndai beikünä säbilerdıŋ menıŋ jolyma qarap, sarylyp kütetını esıme tüskende jüregım şymyrlap, qoia beredı», – deidı Güljan Aqylbekqyzy.
Tūla boiynda titımdei jasandylyq joq, adamǧa jaqsylyq jasaǧysy kelıp elpıldep tūratyn kışıpeiıl jan, elordamyzdyŋ äleumettık qyzmetkerı Güljan – osyndai şeksız meiırım iesı.
