Кеше Астана қалалық мәслихатының кезектен тыс сессиясында елорданың 2018-2020 жылдарға арналған бюджеті нақтыланды. Сондай-ақ, мәслихат депутаттары 2016-2020 жылдарды қамтыған қаланы дамыту жоспарына енгізілген өзгерістерді мақұлдады. Күн тәртібінде басқа да бірқатар мәселе қаралды. Сессияға Астана әкімінің орынбасары Ермек Аманшаев қатысты.
Негізгі баяндаманы жасаған қалалық Стратегиялық және бюджеттік жоспарлау басқармасының басшысы Расул Оразғұлов басқармаларға бөлінген қосымша қаржы көлемін, бұл қаржы бағытталатын жұмыстарды атап өтті.
Оның айтуынша, қаланың кіріс бөлігі 2 млрд 659 млн теңгеге ұлғайды. Бұған қоса, бюджетті толық әрі нәтижелі игеру мақсатында белгілі бір бюджеттік бағдарламаларға бөлінген қаржы қайта қаралып, 10,1 млрд теңге қала дамуындағы маңызды бағыттарға жұмсалады.
Білім басқармасына 1 млрд 370,9 млн теңге көлемінде қосымша қаржы бөлінеді. Бұл қаржының ең қомақты бөлігі мұғалімдердің жалақысын өсіруге бағытталады. Сондай-ақ, 1-4-сынып оқушыларын тамақтандыруға қосымша қаржы қарастырылған. Бөлініп отырған қаржы балалар үйі ғимаратын жөндеуге, техника алуға, мектепалды даярлыққа жұмсалмақ.
Қоғамдық денсаулық сақтау басқармасына балалардың жұқпалы ауруханасының автономды жылыту жүйесіне, мүмкіндігі шектеулі балаларға арналған көліктерді алуға 97,6 млн теңге бөлініп отыр.
Қалада мүгедектер саны 220 адамға көбейді. Оларды шипажайларға жіберу, баспанаға зәру жандарға тұрғын үй сертификатын тапсыру, көмекке мұқтаж адамдарға жәрдем беру, т.б. осы сияқты жұмыстарды атқаруға Жұмыспен қамту және әлеуметтік қорғау басқармасына 369,7 млн бөлу қарастырылды.
Өзге басқармаларға, аудан әкімдіктеріне не үшін қосымша қаржы бөлінгенін баяндаған Р.Оразғұлов еліміздің 2025 жылға дейінгі стратегиялық даму жоспарын іске асыруға бағытталған стратегиялық карта әзірленгенін, соған сәйкес 2016-2020 жылдарға арналған Астананы дамыту жоспарына өзгерістерді енгізу қажеттілігі туындағанын айтты. Жалпы алғанда, елорданы дамыту жоспарындағы 125 индикатордың 34-іне өзгеріс енгізілгенін, 4 индикатор оңтайландыру аясында жойылғанын жеткізді.
Жақында мұғалімдерге, дәрігерлерге, полиция қызметкерлеріне баспана алу үшін 1 млн теңге көлемінде әлеуметтік көмек беру ұйғарылды. Құрылыс және тұрғын үй саясаты басқармасының басшысы Руслан Ахметов тиісті ережені бекітуді сұрады. Сондай-ақ, ол М.Жұмабаев даңғылын А.Байтұрсынов көшесінен бастап №44 көшеге дейін салуға және оңтүстік-батыс айналма жолының құрылысын жүргізуге жалпы 0,0590 га құрайтын екі жер телімін мемлекет мұқтаждығы үшін сатып алуға 134 млн теңге қарастырылғанын айтты. Депутаттар бұл шешімдерді бірауыздан мақұлдады.
Сәулет, қала құрылысы және жер қатынастары басқармасының басшысы Бақтыбай Тайталиев паркингтердің салықтық базалық ставкалары туралы баяндады.
