ەلورداداعى قر ۇلتتىق اكادەميالىق كىتاپحاناسىندا ەكونوميست, ساراپشى, «استانا اقشامى» گازەتىنىڭ تۇراقتى اۆتورلارىنىڭ ءبىرى ەربوسىن نۇرمۇحانۇلىنىڭ «شاعىن بيزنەس شاڭ قاۋىپ قالماسىن» كىتابىنىڭ تۇساۋى كەسىلدى.
«وتانداستار قورى» كوممەرتسيالىق ەمەس اكتسيونەرلىك قوعامى ۇيىمداستىرعان بۇل مادەني باسقوسۋدى قر پرەزيدەنتىنىڭ كەڭەسشىسى ماقسات سقاقوۆ جۇرگىزدى. قارا سوزگە كەلگەندە سۋ جورعاداي كوسىلەتىن ول ەربوسىن نۇرمۇحانۇلىنىڭ ادامگەرشىلىك, كىسىلىك بولمىسى مەن ەكونوميكا سالاسىنداعى ەلەۋلى ەڭبەكتەرىنە توقتالا كەلىپ, تۇساۋى كەسىلىپ وتىرعان كىتاپتىڭ ەلىمىزدىڭ ەكونوميكاسىن دامىتىپ, شاعىن بيزنەسكە سەرپىن بەرۋگە سەپتىگى تيەتىن قۇندى تۋىندى ەكەنىن ايرىقشا اتاپ وتسە, «وتانداستار قورى» كوممەرتسيالىق ەمەس اكتسيونەرلىك قوعامىنىڭ پرەزيدەنتى ابزال ساپاربەكۇلى جاڭا كىتاپتى وقىرمانعا پايداسى تيەتىن كىتاپ دەپ اتادى.
– قازاقتا «ەلگە ەل قوسىلسا – قۇت» دەگەن اتالى ءسوز بار. ەربوسىن نۇرمۇحانۇلى – شەتەلدەن اتاجۇرتقا ورالىپ, ءبىلىمى مەن تاجىريبەسىن ەل ەكونوميكاسىن وركەندەتۋگە جۇمساپ, كاسىبىن دوڭگەلەتىپ جۇرگەن ازاماتتىڭ ءبىرى. كاسىپكەرلىكپەن قاتار قوعامدىق ومىرگە دە بەلسەنە ارالاسىپ, كورگەنى مەن كوكەيگە تۇيگەنىن ەل دامۋىنا سەپتىگى تيەر ۇسىنىس-پىكىرلەرىن مەرزىمدى باسىلىم بەتتەرىندە ۇزبەي جاريالاپ كەلەدى. مىنە, سول ماقالالاردىڭ دەنى ءبىز تۇساۋىن كەسىپ وتىرعان جيناقتان كورىنىس تاۋىپتى. وتانعا ۇلەس قوسۋ دەگەن وسى ەمەس پە؟! ايتارى بار ازاماتتىڭ بۇل كىتابىنان ويلى وقىرماننىڭ ماڭىزدى دا پايدالى اقپاراتتار الاتىنىنان كۇمانىمىز جوق, – دەدى ابزال ساپاربەكۇلى.
اۆتوردىڭ 50 جاسقا تولعان مەرەيتوي قۋانىشىنا وراي جارىق كورگەن كىتاپقا ەربوسىن نۇرمۇحانۇلىنىڭ «استانا اقشامى», «ەگەمەن قازاقستان» سياقتى ەلىمىزگە تانىمال گازەتتەر مەن «اباي» پورتالى سياقتى سايتتاردا جاريالانعان ماقالالارى ەنگىزىلگەن. اتى ايتىپ تۇرعانداي, كىتاپتىڭ نەگىزگى مازمۇنى شاعىن بيزنەستى دامىتۋ, مەملەكەتتىك ساتىپ الۋعا قاتىستى مەحانيزمدى رەتتەۋ جاعىنداعى ۇتىمدى ۇسىنىستار مەن شەتەلدىڭ وزىق تاجىريبەلەرى تانىستىرىلعان.
