ۇبت-عا دايىندىق قالاي ءجۇرىپ جاتىر؟
ءاسيما بيمەندينا,
استانا قالاسى ءبىلىم باسقارماسىنىڭ باستىعى:
بيىل استانا مەكتەپتەرىن 3988 تۇلەك ءتامامدادى. ولاردىڭ 3 652-ءسى ۇلتتىق بىرىڭعاي تەست تاپسىرۋعا دايىندىق جۇرگىزۋ ۇستىندە. 178 وقۋشىمىز – «التىن بەلگىدەن» ۇمىتكەر. ال, قالعان وقۋشىلار – حالىقارالىق وليمپيادا جەڭىمپازى رەتىندە گرانتقا يە بولعاندار نەمەسە شەتەلدىك جوعارى وقۋ ورىندارىنا ءتۇسۋ ءۇشىن ءداستۇرلى ەمتيحان تاپسىراتىندار. وسى ورايدا, استانادا وليمپيادالار مەن عىلىمي سايىستار جەڭىمپازدارى سانىنىڭ ارتىپ كەلە جاتقاندىعىن ايتا كەتۋ كەرەك.
جالپى, ەلوردادا ۇبت تاپسىرۋعا ءوتiنiش بەرۋشiلەردiڭ سانى دا جىل وتكەن سايىن كوبەيىپ كەلەدى. بۇل – مۇعالىمدەردىڭ جەمىستى ەڭبەگىنىڭ, وقۋشىلاردىڭ سىناققا دەگەن جاۋاپكەرشىلىكتى سەزىنۋىنىڭ ناتيجەسى.
جانات ايتوۆا,
ع.ورمانوۆ اتىنداعى №7 مەكتەپ-گيمنازيانىڭ ديرەكتورى:
ءبىزدىڭ مەكتەپتەن بيىل 103 تۇلەك قانات قاعىپ ۇشقالى وتىر. ءبارى دە ۇلتتىق بىرىڭعاي تەستىلەۋگە قاتىسادى. سىناققا 10-15 كۇن قالعاندا ءوزىم وقۋشىلارمەن ارنايى كەزدەستىم. پسيحولوگيالىق تۇرعىدان ازدى-كوپتى كەڭەسىمدى بەردىم. جالپى, ۇبت ادامنىڭ تاعدىرىن شەشپەيدى. سوندىقتان, ەمتيحانعا كىرەر الدىندا وقۋشىنىڭ ءوزىن ەركىن ۇستاعانى, ساۋالدارعا جاۋاپ بەرەردە شەشىمىن سەنىمدى, سانالى تۇردە جاساعانى ابزال. وقۋشىلارعا وسىنى ۇعىندىرۋعا تىرىسامىن. بيىل ءبىزدىڭ ۇجىم «مىڭ بالا» جوباسىنىڭ اياسىندا تەستىلەۋگە وتە ۇلكەن دايىندىق جۇرگىزدى. ءبىتىرۋشى 103 تۇلەكتىڭ ارقايسىسىنا ءبىر مۇعالىم, ءبىر اتا-انانى جاۋاپتى ەتىپ بەلگىلەدىك. ولار وزدەرىنىڭ حال-قادەرىنشە ءبولىپ بەرىلگەن وقۋشىنى تەست سۇراقتارىنا جان-جاقتى دايىندادى. مەن وسى مەكتەپتى قابىلداپ العان العاشقى جىلى, ياعني, 2008 جىلى تەستىلەۋدىڭ ورتاشا بالى 61-ءدى قۇراپ, قالاداعى 77 مەكتەپتىڭ اراسىنان 26 ورىندى يەلەنسەك, بىلتىرعى كورسەتكىش 86 بالدى قۇراپ, 12-ورىننان كورىندىك. بيىل بۇدان دا جوعارى كورسەتكىشتى باعىندىرىپ, العاشقى وندىقتان كورىنەمىز دەگەن ءۇمىتىمىز بار.
ساۋالنامانى ازىرلەگەن شىنار دوسان
