جاسىراتىنى جوق, بۇگىنگى تاڭدا تاعدىر تاۋقىمەتىنە ءتۇسىپ, ءومىردىڭ قيىن جاعدايىنا دۋشار بولعان جاندار از ەمەس. استانا قالاسى اكىمدىگىنىڭ «ومىرلىك قيىن جاعدايدا قالعان ادامداردى الەۋمەتكە قوسۋ ورتالىعى» كوممۋنالدىق مەملەكەتتىك مەكەمەسى بەلگىلى تۇراعى جوق ادامدارعا كومەك كورسەتىپ كەلەدى.
مەكەمەنىڭ الەۋمەتتىك پاترۋل قىزمەتى كۇندەلىكتى قالا ىشىندە رەيد جۇرگىزىپ تۇرادى. ارنايى كەستەگە سايكەس بەلگىلەنگەن باعدار بويىنشا كۇنبە-كۇن, ەرتەلى-كەش قالا ارالاپ, قينالىپ جۇرگەن جانداردى انىقتاپ, ولاردى ءوز كەلىسىمدەرىمەن ورتالىققا جەتكىزىپ وتىرادى.
جاقىندا كەزەكتى رەيدكە شىققان الەۋمەتتىك قىزمەتكەرلەرى تاڭعى ساعات توعىزدار شاماسىندا «استانالىق بازار» ماڭىنان تۇرلەرى سولعىن, جابىرقاۋ جۇرگەن قىرىق بەس-ەلۋلەر شاماسىنداعى ەكى ازاماتتى بايقايدى. ۇتقىر الەۋمەتتىك پاترۋل قىزمەتكەرلەرى ولارعا جاقىنداپ, ءجون سۇراستىرعاندا, وزدەرى بولجاعانداي, ولاردىڭ باسپانالارى جوق ازاماتتار ەكەنى بەلگىلى بولادى. ەكەۋى دە استاناعا جۇمىس ىزدەپ كەلگەن كورىنەدى.
ورتالىقتىڭ الەۋمەتتىك قىزمەتكەرى نۇرتاس راحمەتۋللاەۆ بۇلارعا ءمان-جايدى ءتۇسىندىرىپ, مەكەمەنىڭ قىزمەتىمەن تانىستىرىپ, قولدارىنا انىقتامالىق بۋكلەتتەردى ۇسىنادى. اياق استىنان وزدەرىنە دەگەن مۇنداي قايىرىمدىلىق پەن قامقورلىقتى كۇتپەگەن ازاماتتار ءسال ابىرجىپ قالسا دا, سالدەن كەيىن سوزگە كەلمەستەن ورتالىققا بارۋعا كەلىسىمدەرىن بەرەدى.
وسىنداي جاعدايداعى ادامدار «الەم» بازارىنىڭ ماڭىنان دا كەزدەسەدى. بۇلارمەن دە مەكەمە قىزمەتكەرلەرى اڭگىمەلەسەدى. ءسويتىپ باسپاناسىز جۇرگەن تاعى 4 ازامات وزدەرىنە ۇسىنىلعان جاعدايدان باس تارتپاي, قىزمەت الۋعا كەلىسىمدەرىن بەرىپ, ورتالىققا جەتكىزىلەدى. ولاردىڭ بارلىعى دا قول-اياقتارى ساۋ, 35-55 ارالىعىنداعى ازاماتتار بولا تۇرسا دا, نە ۇيلەرى, نە جۇمىستارى جوق تۇلعالار بولىپ شىقتى.
«كۇندەلىكتى رەيدتەر كەزىندە باسپاناسىز, جۇمىسسىز ادامداردى جيناپ, ورتالىققا تاپسىرىپ وتىرامىز. ارينە, ءاربىر ادام ءوز تاعدىرىنا ءوزى يە عوي. ەگەر ەرىنبەي-تالماي, ىزدەنىپ تالاپتانسا كەز كەلگەن ادامنىڭ ەكى قولىنا ءبىر جۇمىس تابىلادى دەپ ويلايمىز. دەگەنمەن, ءبىز ەشقاشاندا قاراۋسىز قالدىرا المايمىز. ولارعا ءجون كورسەتۋ, الەۋمەتكە قوسۋ – ءبىزدىڭ مىندەتىمىز. قىزمەت الۋشىلاردىڭ اراسىنداعى كەيبىرى – ءتۇرلى تاعدىر تاۋقىمەتىنە تۇسكەندەر, تۋىستارىنىڭ قاراۋىنسىز قالعاندار, مۇگەدەكتەر ءبىزدىڭ مەكەمەنى وزدەرى تاۋىپ كەلگەندەر. ءبىز ءوز تاراپىمىزدان ولاردى دۇرىس ومىرگە بەيىمدەۋگە تىرىسامىز» دەيدى ۇتقىر الەۋمەتتىك پاترۋل قىزمەتىنىڭ جەتەكشىسى, تۇنگى كەلۋشىلەر ءبولىمىنىڭ باسشىسى جايدار شالعىنباەۆ.
نۇربەك جاقانوۆ,
جۋرناليست
