وسى اپتادا مەملەكەت باسشىسى نۇرسۇلتان نازارباەۆ جۇمىس ساپارىمەن رەسەي فەدەراتسياسىنا باردى. ساپار اياسىندا ول ۇقشۇ ۇجىمدىق قاۋىپسىزدىك كەڭەسىنىڭ وتىرىسىنا قاتىستى.
سەسسيا بارىسىندا قازاقستان, رەسەي, ارمەنيا, بەلارۋس, قىرعىزستان, تاجىكستان باسشىلارى ۇجىمدىق قاۋىپسىزدىك شارت ۇيىمىنىڭ جاۋاپكەرشىلىگى ايماعىنداعى حالىقارالىق جاعدايدىڭ وزەكتى ماسەلەلەرىن تالقىلادى. ۇيىمنىڭ وتكەن كەزەڭدەگى قىزمەتىنىڭ قورىتىندىلارى شىعارىلىپ, 2013 جىلعا ارنالعان نەگىزگى مىندەتتەرى انىقتالدى.
وتىرىستىڭ قورىتىندىسى بويىنشا مەملەكەت باسشىلارى 2004 جىلعى 18 ماۋسىمداعى ۇجىمدىق قاۋىپسىزدىك شارت ۇيىمى اياسىنداعى قۇپيا اقپاراتتىڭ ساقتالۋىن ءوزارا قامتاماسىز ەتۋ تۋرالى كەلىسىمگە وزگەرىستەر ەنگىزۋ تۋرالى حاتتاماعا قول قويدى, سونداي-اق, بىرقاتار وزگە شەشىمدەر قابىلداندى. ۇيىم قابىلداعان تارتىپكە سايكەس, كەزەكتى سەسسياارالىق كەزەڭدەگى توراعالىق قىرعىز رەسپۋبليكاسىنا اۋىستى.
ۇقشۇ ۇجىمدىق قاۋىپسىزدىك كەڭەسىنىڭ كەلەسى وتىرىسى 2013 جىلى مامىر ايىندا بىشكەك قالاسىندا وتەتىن بولادى.
مەملەكەت باسشىسى نۇرسۇلتان نازارباەۆ جوعارى ەۋرازيالىق ەكونوميكالىق كەڭەستىڭ وتىرىسىنا قاتىستى, رەسەي فەدەراتسياسىنىڭ پرەزيدەنتى ۆلاديمير پۋتينمەن كەزدەسىپ, ەكى جاقتى ىنتىماقتاستىقتى دامىتۋ بارىسىن, سونداي-اق, حالىقارالىق كۇن تارتىبىندەگى وزەكتى ماسەلەلەردى تالقىلادى. بىرقاتار رەسمي قۇجاتتارعا قول قويدى.
