بيىلعى بالالار جىلى اياسىندا ءارى ۇلىستىڭ ۇلى كۇنى قارساڭىندا ەسىل اۋدانى, اققۇم كوشەسى, 17-ۇيدە «اقجول» اتتى اۋلا كلۋبى ەسىگىن ايقارا اشتى.
اۋلا كلۋبىنىڭ اشىلۋ سالتاناتىنا «نۇر-سۇلتان قالاسى جاستار ساياساتى ماسەلەلەرى باسقارماسى» مم باسشىسى قايرات قامباروۆ, «استانا جاستارى» جاستار رەسۋرستىق ورتالىعىنىڭ وكىلدەرى جانە وسى ءۇيدىڭ تۇرعىندارى قاتىستى.
– قازاقستان پرەزيدەنتى قاسىم-جومارت توقاەۆ حالىققا جولداۋىندا اتاپ وتكەندەي, قازىرگى تاڭدا بالالاردىڭ ەنەرگياسى مەن قىزىعۋشىلىعى دۇرىس جولعا باعىتتالۋى كەرەك. ويتكەنى بالالار – ءبىزدىڭ مەملەكەتىمىزدىڭ بولاشاعى. ال ءبىزدىڭ نەگىزگى ماقساتىمىز – وسكەلەڭ ۇرپاقتىڭ دامۋىنا, ءتالىمدى تاربيە الۋىنا ۇلەس قوسۋ, – دەدى ق.قامباروۆ.
ەلىمىزدە بالالاردىڭ دامۋىنا ەرەكشە نازار اۋدارىلىپ كەلەدى. بۇل باعىتتا ەلوردادا قىرۋار جۇمىس اتقارىلىپ جاتىر. جاستار ساياساتىنىڭ باستى باعىتتارىنىڭ ءبىرى دە وسكەلەڭ ۇرپاقتىڭ سالاۋاتتى ءومىر سالتىن ۇستانىپ, ەلىنە ەسەلى ەڭبەك ەتەتىن دەنى ساۋ ازامات بولىپ وسۋىنە سەپتىگىن تيگىزەتىن ءارتۇرلى مۇمكىندىكتەردى جاساۋ.
بالالاردىڭ جان-جاقتى قابىلەتتى بولىپ وسۋىنە ىقپال ەتىپ قانا قويماي, وسكەلەڭ ۇرپاقتىڭ الەۋەتىن اشۋعا مۇمكىندىك بەرەتىن جانە بالاقايلاردىڭ بوس ۋاقىتىن ءتيىمدى وتكىزۋ ماقساتىندا اشىلعان «اقجول» اۋلا كلۋبىندا شاحمات, دويبى, بەينەلەۋ ونەرى, قولونەر, دومبىرا, گيتارا, ۆوكال سياقتى سەكتسيالار جۇمىس ىستەيدى. قازىردىڭ وزىندە مۇندا كەلۋگە نيەتتىلەر قاراسى كوپ ەكەن. ولاردىڭ وزدەرىنە ۇنايتىن سپورت تۇرلەرىمەن اينالىسىپ, ونەر ۇيرەنۋلەرىنە بارلىق مۇمكىندىكتەر قاراستىرىلعان. وسى اۋلا كلۋبىنا قاتىسقان بالالاردىڭ كۇنى ەرتەڭ ەلىمىزدىڭ دامۋى مەن گۇلدەنۋىنە ۇلەس قوساتىنىنا سەنىمىمىز مول.
ءاسيا نۇربەكقىزى
