استانا-ترياتلون پاركى اشىلدى
كەشە ەلوردادا ەرەكشە سپورت نىسانى – استانا-ترياتلون پاركى اشىلدى. استانا قالاسىنىڭ اكىمى اسەت يسەكەشەۆ جاڭا كەشەننىڭ اشىلۋ سالتاناتىنا قاتىسىپ, وسى كۇنگە ورايلاستىرىلعان اۋەسقوي ۆەلوسيپەدشىلەردىڭ جارىسىنا ستارت بەردى.
استانا باسشىسى سپورت كەشەنىنىڭ ستريت ۆوركاۋت الاڭقايىن ارالاپ كورىپ, سپورت كەشەنىن بالالارعا ارنالعان الاڭدارمەن تولىقتىرىپ, تەننيس كورتى مەن جەڭىل اتلەتيكالىق مانەج اشۋعا بولاتىنىن ايتتى.
ال, قالا اكىمىنىڭ ورىنباسارى ەرمەك امانشاەۆ «استانا-ترياتلون پاركى استانالىقتار مەن قالا قوناقتارىنىڭ سۇيىكتى سپورت الاڭىنا اينالىپ, سالاۋاتتى ءومىر سالتىن جاقتايتىندار وسىندا كەلىپ سپورتپەن اينالىساتىن بولادى» دەگەن ءۇمىتىن ءبىلدىردى.
ات شاپتىرىم القاپتى الىپ جاتقان سپورت نىسانى سالاماتتى ءومىر سالتىن قولدايتىندار ءۇشىن تاماشا تارتۋ بولدى. سپورت كەشەنىن تۇرعىزعان BI Group قۇرىلىس كومپانياسىنىڭ باسشىسى ايدىن راحىمباەۆ بۇل كەشەندى قالا كۇنىنە ارنايى تارتۋىمىز دەپ باعالاسا, مارافونشى مارات جىلانباەۆ مۇنداي سپورت نىسانى تەك قانا ەلىمىزدە ەمەس, تمد ەلدەرى بويىنشا تۇڭعىش اشىلىپ وتىرعانىن اتاپ ءوتتى. جەلاياق سپورتشى جاڭا كەشەنىنىڭ جاياۋ جۇگىرۋگە ارنالعان جولدارى بارلىق تالاپتارعا ساي كەلەتىنىن ايتتى.
– ەندى ترياتلونمەن اينالىسۋعا بارلىق مۇمكىندىك بار. الداعى ۋاقىتتا سپورتتىڭ وسى تۇرىمەن اينالىساتىنداردىڭ قاتارى كوبەيەتىن بولادى. ال مىڭداعان اۋەسقويلار ءۇشىن بۇل نىسان تاپتىرمايتىن سپورت الاڭىنا اينالادى دەپ ويلايمىن, – دەدى قر كاسىبي جانە اۋەسقوي ترياتلون فەدەراتسياسىنىڭ پرەزيدەنتى, ۇلتتىق قۇرامانىڭ باس جاتتىقتىرۋشىسى مۇراتحان توقمادي.
وسىلايشا, استانا كۇنى مەرەكەسى ۇستىندە حالىققا پايدالى تاعى ءبىر سپورت كەشەنى پايدالانۋعا بەرىلدى.