«باقىتتى بالالىق شاق» اتتى Universl Pictures كومپانياسىنىڭ جىلدا وتكىزەتىن بايقاۋىنا بيىل استانالىق التى جاسار بيبيماريام وماروۆا قاتىستى. قاتىسىپ قانا قويماي, قانجىعاسىنا قوماقتى جۇلدەنى بايلاي كەلدى. ول بايقاۋدا 6 جانە 14 جاس ارالىعىنداعى انشىلەر نوميناتسياسىندا ءبىرىنشى ورىندى جەڭىپ الدى.
مامىردىڭ 22-25 ارالىعىندا وتكەن اتالمىش بايقاۋعا الەمنىڭ ءار ەلىنەن 55 ءبۇلدىرشىن جينالعان. بۇل بايقاۋعا دەگەن بالالاردىڭ زور تالپىنىسىن كورسەتسە كەرەك. مۇنداي ونەر دوداسىندا توپ جارىپ, جەڭىمپاز اتانۋ ءبيبىماريام ءۇشىن توسىن سىي بولعان كورىنەدى.
دەگەنمەن, ءۇش جاسىنان باستاپ ءتۇرلى دايارلىق توپتارىندا اكتەرلىق شەبەرلىكتى, ۆوكالدى ۇيرەنىپ جۇرگەن بالعىن بوبەك ءوز قاتارلاستارىنان وق بويى وزىق ەكەندىگىن الەمدىك دەڭگەيدە دالەلدەپ بەردى.
اتا-اناسى ءۇشىن دە مۇنداي جەڭىس ۇلكەن مارتەبە ەكەندىگىن مويىنداي كەلە ءسوز بۇيداسىن قولىنا اناسى پەريزات الدى. بالانى تەك مەكتەپكە, بالاباقشا اپارىپ اكەلۋدىڭ ءوزى كەيدە قيىندىق تۋدىرىپ جاتادى.
ال, ونى ونەرگە باۋلۋ, ونىڭ تالانتىن وسىنداي ءسابي كۇنىنەن اشۋعا ۇمتىلۋ وڭاي ەمەس ەكەنى راس. بىراق ءبىز قىزىمىزدىڭ ەرەكشە ەڭبەكقور ەكەندىگىن بايقاپ, ونى ءتۇرلى كۋرستارعا جازدىرتتىق. ول ءوز بەتىمەن سان الۋان تىلدەردەگى اندەردى جاتتاپ الىپ ايتۋعا اۋەستەنەتىن.
سول اۋەستىگىن ساحناعا الىپ شىعۋىنا مۇمكىندىك جاسادىق≫, – دەيدى كىشكەنتاي جۇلدىزدىڭ اناسى.
گولليۆۋدقا بارىپ, ونەردەگى العاشقى بيىگىن باعىندىرعان تومپيعان بيبيماريام اكەسى مارات وماروۆتىڭ «تالانت» ونەر ورتالىعىندا ءتالىم الادى. التى جاسىندا
ءارتۇرلى ونەر سالاسىنان ءدارىس الىپ ۇلگەرگەن دارىندى قىزعا وسى جەڭىسىنەن كەيىن شەتەلدىك كومپانيالاردان بىرنەشە ۇسىنىستار ءتۇسىپتى. «Wolt Disney» كومپانياسى ونىڭ ارتىستىگىنە قىزىعىپ, ءبىر جىلعا شارت جاساسۋعا پەيىلدى ەكەندىكتەرىن دە بىلدىرگەن. الايدا ءتىلى قازاقشا سىنعان قازاقتىڭ قىزى اعىلشىنشا سويلەمەگەندىكتەن ءتىل ۇيرەنۋگە مۇقتاجدىعىن العا تارتىپتى.
تەگىنە تارتىپ تۋعان ارقالى قىزدىڭ كەلەشەگىنەن ءۇمىتىن ۇكىلەپ وتىرعان اتا-اناسى ءۇشىن دە مۇنداي بايقاۋدان جۇلدەلى ورالى ۇلكەن ابىروي.
– ساحناعا شىعۋ قانشالىقتى قورقىنىشتى بولدى؟ – دەگەن ساۋالعا كوزى مولدىرەگەن بيبيماريام:
– ەش قورىقپادىم, – دەپ جاۋاپ قاتتى.
– ال, كەلەشەكتە كىم بولعىڭ كەلەدى؟ – سۇراققا:
– اكتريسا بولامىن, – دەپ نىق جاۋاپ بەردى.
بۇلدىرشىنگە سۇراقتارعا جاۋاپ بەرگەننەن گورى ساحناعا شىعىپ ءان سالعان الدەقايدا وڭاي بولعان سىڭايلى. ويتكەنى, لوس-اندجەلەستە جاسالعان بەينەباياننان بايقاعانىمىزدا, ول ءوزىن وتە ەركىن, تاكاپپار, ءارى جۇلدىز رەتىندە ۇستايدى ەكەن.
ءبىر ايتا كەتەرلىگى, ونىڭ جەڭىسىنىڭ جەمىسىن ەندى تەك ءوزى ەمەس, «تالانت» ورتالىعىنىڭ جاس ونەرپازدارى دا بولىسەتىن بولدى.
ويتكەنى, بيبيماريامعا كوڭىلى تولعان «New York Film Academy» كومپانياسى استاناعا ءوزىنىڭ وكىلىن James Osegbemeh مىرزانى ارنايى جىبەرىپ وتىر. ول وسى ورتالىق نەگىزىندە قالاۋى بار بالالارعا اعىلشىن ءتىلى مەن اكتەرلىق شەبەرلىكتەن ءدارىس وقيتىن بولادى.
«بيبيماريام – زاتى ەرەكشە قىز. ونىڭ ونەرگە دەگەن قۇلشىنىسىنا تاڭ قالماۋ مۇمكىن ەمەس. جالپى, قازىرگى كەزدە قازاقستاننىڭ حالىقارالىق كينويندۋسترياعا قادام جاساۋى – قۇپتارلىق جاعداي. سىزدەردىڭ ەلدەرىڭىزدىڭ مۇمكىندىگى مول دەپ ەسەپتەيمىن» دەدى افريكان جىگىت اۋدارماشىعا قاراپ وتىرىپ.
«وسى مۇمكىندىكتى استانانىڭ ءار بالاسى پايدالانا الادى. بالالارىڭىزدى ءبىزدىڭ ورتالىققا اكەلىڭىزدەر» دەدى ءسوز سوڭىندا مارات وماروۆ.
شىنار ءابىلدا
