ەلوردادا قالا تازالىعىنىڭ ساقتالۋىن قاداعالاۋعا قاتىستى كەزەكتى رەيد ءوتتى
استانا قالاسى تابيعي رەسۋرستار مەن تابيعات پايدالانۋدى رەتتەۋ باسقارماسى, «استانا ەكو-پوليگون نس» مەملەكەتتىك كوممۋنالدىق كاسىپورنى قىزمەتكەرلەرى جانە ءتارتىپ ساقشىلارى قالا تازالىعىنىڭ ساقتالۋىن قاداعالاۋعا قاتىستى كەزەكتى رەيد وتكىزىپ, ءبىراز زاڭ بۇزۋشىلىق دەرەكتەرىن انىقتادى.
ارنايى مامانداردان قۇرالعان جۇمىس توبى اۋەلى ماعجان جۇماباەۆ جانە ا 97 كوشەسى قيىلىسىنداعى جاڭادان سالىنىپ جاتقان قۇرىلىس نىساندارىنا تابان تىرەدى. بۇل جەردەن دە سول ۇيرەنشىكتى ءۇردىس – تاۋ بولىپ ۇيىلگەن قۇرىلىس قالدىقتارى, كىلكىگەن سۋعا تولى اۋلا مەن مي باتپاقتى تىزەدەن كەشىپ جۇرگەن قۇرىلىسشىلارعا كۋا بولدىق. ياعني, ەشقانداي سانيتارلىق تالاپتار ساقتالماعان. كەرەك بولسا, ماڭايدان قوقىس تاستايتىن ارنايى جاشىكتەر دە جوق بولىپ شىقتى.
كوپ ۇزاماي ەكولوگيا دەپارتامەنتىنىڭ ماماندارى قۇرىلىسقا جاۋاپتى مەردىگەرلەردى انىقتاپ تا ۇلگەردى. بۇل جەردە مەملەكەتتىك باعدارلاما بويىنشا بەرىلەتىن ۇيلەر بوي كوتەرۋى ءتيىس ەكەن. قۇرىلىس جۇمىستارىن «فەررۋم» جانە «نوماد-ستروي» كومپانيالارى جۇرگىزىپ جاتىر. ال ىشكى اباتتاندىرۋ جانە ينجەنەرلىك جۇيە جۇمىستارى «سارى جايلاۋ» فيرماسىنا جۇكتەلىپتى. «وزدەرىڭىز كورىپ تۇرعانداي, بۇل كومپانيالاردىڭ ەشقايسىسى دا سانيتارلىق تالاپتاردى ساقتاپ وتىرعان جوق. قۇرىلىس قالدىقتارى مەن ينەرتتى زاتتاردى قالاي بولسا سولاي توگە بەرگەن. زاڭ بويىنشا مۇنداي قۇرىلىس قالدىقتارىنىڭ بارلىعى ارنايى پوليگونعا توگىلۋى ءتيىس. قورشاۋ دا تارتىلماعان. قۇرىلىس اۋماعىنا كىرىپ-شىعاتىن جولداردىڭ ەشقايسىسىنا تاس توسەلمەگەندىكتەن, ماڭايدىڭ بارلىعى بالشىقپەن بىلعانىپ جاتىر. تەكسەرۋ بارىسىندا انىقتالعان جايتتار بويىنشا حاتتاما جاسالىپ, ءۇش كومپانيانىڭ باسشىلىعىن اكىمشىلىك جازاعا تارتامىز. دەر كەزىندە قوقىستى تازارتىپ, جولدارعا تاس توسەتۋ تۋرالى قۇرىلىس باسقارماسىنا تالاپ-حات تۇسىرەمىز» دەدى الماتى اۋداندىق ءىىب تابيعاتتى قورعاۋ پوليتسياسىنىڭ ينسپەكتورى ۆلاديمير كولياگين.
سانيتارلىق تالاپتارعا ءاتۇستى قاراعان بۇل كومپانيالار بۇعان دەيىن دە بىرنەشە رەت اكىمشىلىك جازاعا تارتىلىپ, 500 مىڭ تەڭگە كولەمىندە ايىپپۇل سالىنعان ەكەن. ماڭايدى قوقىستان تازارتىپ, قۇرىلىس جۇمىستارىن زاڭعا سايكەس جۇرگىزۋ تۋرالى ەسكەرتۋ بەرىلگەن. الايدا, ەش ناتيجە شىقپاي وتىر.
رەيد بارىسىندا اۋماعىن قوقىس توگەتىن شاعىن پوليگونعا اينالدىرىپ العان تاعى بىرنەشە دەرەك انىقتالدى. ءماسەلەن, وڭتۇستىك-شىعىس اۋدانىنداعى بالقانتاۋ كوشەسى بويىندا ورنالاسقان تەحنيكالىق قىزمەت كورسەتۋ ورتالىعىنىڭ جۇمىسشىلارى ەسكى كولىك قالدىقتارىن نىسان اۋماعىنا ۇيە بەرگەن. ناتيجەسىندە تقس ارتىنداعى الاڭقايداعى ۇيىندىلەر كىشىگىرىم تاۋعا اينالۋعا شاق قالعان.
ءتارتىپ ساقشىلارى بۇل جەردە ءبىر ەمەس, بىرنەشە زاڭ بۇزۋشىلىق بولعانىن ايتادى. بىرىنشىدەن, كاسىپكەردىڭ بيزنەسى زاڭسىز بولىپ شىقتى. ياعني, تىركەلمەگەن. ەكىنشىدەن, سىرتقى كورىنىسى قۇرىلىس-ساۋلەت تالاپتارىنا ساي ەمەس. ۇشىنشىدەن, نىساننىڭ ماڭايى قوقىستان كوز اشپايدى. شىققان قاتتى قالدىقتار مەن تەحنيكا بولشەكتەرىن اۋلا ارتىنا اپارىپ توگە بەرەدى. انىقتالعان فاكتىلەر بويىنشا حاتتاما تولتىرىلىپ, ءتارتىپ بۇزعان كاسىپكەرگە 30 ايلىق ەسەپتىك كورسەتكىش كولەمىندە ايىپپۇل سالىندى.
ايتپاقشى, بۇل نىسانعا دا سانيتارلىق تالاپتاردى ورىنداماعانى ءۇشىن بۇعان دەيىن بىرنەشە رەت ايىپپۇل سالىنىپتى. سونىمەن قاتار, بىرنەشە زاڭسىز ماقساتتا پايدالانىلىپ وتىرعان جەر ۋچاسكەسىن زاڭداستىرىپ الۋ تۋرالى ۇسىنىس تا بەرىلگەن. الايدا ۋچاسكە يەسى بۇل ۇسىنىستارعا پىسقىرىپ تا قاراماعان. بولماعان سوڭ ءتارتىپ ساقشىلارى ءىرى كولەمدە ايىپپۇل سالىپ, ءىسىن سوتقا جىبەرەدى. وسىدان سوڭ سوتتىڭ شەشىمىمەن زاڭسىز تابىس تاۋىپ وتىرعان نىساندى ءسۇرىپ تاستاۋ تۋرالى قاۋلى شىققان. بىراق سوت شەشىمى ءالى ورىندالماي وتىر.
«استانا ەكو-پوليگون نس» جشس ديرەكتورىنىڭ ورىنباسارى دۋلات ءوسكەنباەۆتىڭ ايتۋىنشا, بۇگىندە قالامىزدا رەسمي تىركەۋدە تۇرعان 800 مىڭنان استام ادامنىڭ تەك 600 مىڭى تازارتۋ مەكەمەلەرىمەن شارت جاساسقان ەكەن. «ياعني, 200 مىڭداي ادام قوقىسقا اقشا تولەمەيدى. تۇسەتىن اقشا مەن جۇمسالاتىن قارجىنىڭ ەسەبى كەلمەيدى. وسىنداي سەبەپتەرمەن تازارتۋ مەكەمەلەرىنىڭ بەرەشەگى كوبەيىپ جاتىر» دەيدى ول.
بۇركىت نۇراسىل
