قازىرگى ۋاقىتتا قازاقستان پاۆيلونىنىڭ تۇجىرىمداماسى بەكىتىلگەن. وعان «بولاشاق ەنەرگياسىنىڭ مۇراجايى» دەگەن تۇجىرىمداما ۇسىنىلدى. الىپ شار ءتارىزدى عيمارات 7 قاباتتان تۇرادى. ءار قابات عارىش, كۇن, بيوماسسا, جەل, سۋ جانە كينەتيكالىق ەنەرگياعا ارنالادى. ال سەگىزىنشى قابات «استانا – بولاشاقتىڭ قالاسى 2050» ەكسپوزيتسياسىنا ارنايى بولىنگەن.
اتالمىش سفەرانىڭ تومەنگى تابانىنداعى 5 مىڭ شارشى مەتر اۋماقتا ۇلتتىق پاۆيلون بولادى. پاۆيلون «قازاقستانمەن تانىسۋ» جانە «جاسامپازدىق ەنەرگياسى» اتتى ەكى باستى ايماققا بولىنەدى.
پاۆيلوننىڭ ءبىرىنشى بولىمىنە لاندشافت, مادەنيەت, تاريح, قازاقستاننىڭ وتكەنى مەن بولاشاعى تۋرالى قويىلادى. ماماندار «جاسامپازدىق ەنەرگياسى» ايماعىنىڭ كونتەنتىن قالىپتاستىرۋ جۇمىستارى ەنەرگەتيكا مينيسترلىگىمەن بىرلەسىپ جاسالادى دەيدى.
كورمەگە وتاندىق عالىمداردىڭ ۇزدىك جوبالارىن, ەلباسىنىڭ ەنەرگەتيكا جانە قورشاعان ورتانى قورعاۋ سالالارىنداعى باستامالارىن, «جاسىل ەكونوميكانىڭ» رەسپۋبليكا ايماقتارىندا جەمىستى جۇزەگە اسىرىلعان جوبالارىن قويۋ كوزدەلگەن.
سونىمەن قاتار, «بولاشاقتىڭ ەنەرگياسى» كورمەسىن جان-جاقتى تانىستىرۋدى كوزدەيتىن 2 تاقىرىپتىق پاۆيلون قۇرىلادى. ەگەر قازاقستان پاۆيلونىندا كورەرمەن تابيعاتتىڭ تىلسىم كۇشىنەن تۋعان بارلىق جاڭعىرتپالى ەنەرگيا تۇرلەرىمەن تانىساتىن بولسا, تاقىرىپتىق پاۆيلونداردا مەيماندارىمىز ەنەرگيا ەۆوليۋتسياسىن, ونىڭ بۇگىنى مەن بولاشاعىن تانىپ تۇسىنۋگە, 21 عاسىردىڭ ەنەرگەتيكالىق قيىندىقتارىن بايقاۋعا, تەحنولوگيالىق جانە زياتكەرلىك جەتىستىكتەردى ەلەستەتۋگە, پلانەتامىزعا وراسان زور اسەر ەتەتىن ەنەرگيا تۇتىنۋ ماسەلەسىن كورۋگە مۇمكىندىك الادى.
ۇزدىك تاجىريبەلەر ايماعى
ۇزدىك تاجىريبەلەر ايماعى پاۆيلونى كورمەنىڭ تاقىرىپتىق مازمۇنىن بارىنشا اشادى. مۇندا جاڭعىرتپالى ەنەرگيا كوزدەرىن ءوندىرۋ, ساقتاۋ مەن تاسىمالداۋ سالاسىنداعى 30-عا جۋىق ۇزدىك الەمدىك تاجىريبەلەرى تانىستىرىلادى.
الدىڭعى قاتارلى شەشىمدەر مەن تەحنولوگيالار 5 نەگىزگى كاتەگوريالارعا ءبولىنگەن. ولار:
- جاڭعىرتپالى جانە بالامالى ەنەرگيا;
- ەنەرگيالىق تيىمدىلىك;
- ەنەرگيانى ساقتاۋ;
- ەنەرگيانى ءبولۋ جانە تاسىمالداۋ;
- تابيعات بايلىقتارىن ۇتىمدى پايدالانۋ.
ىرىكتەۋدى حالىقارالىق ىرىكتەۋ كوميتەتى جۇزەگە اسىرادى. كوميتەت قازىرگى تاڭدا جاساقتالعان, ونىڭ قۇرامىنا الەمدىك ەنەرگەتيكا سالاسىنىڭ اتاقتى قايراتكەرلەرى جانە كورنەكتى عالىمدار كىرگەن. ولاردىڭ اراسىندا بىرنەشە نوبەل سىيلىعىنىڭ ساڭلاقتارى دا بار.
قوعامدىق ايماقتار
كورمە تاقىرىبىن اشاتىن سوڭعى الاڭ «قوعامدىق ايماقتار» دەپ اتالادى.
تىركەۋ قۇجاتتاماسىنا سايكەس, ەكسپو-2017 تاقىرىپتىق مازمۇنى پاۆيلوندار اياسىمەن شەكتەلمەي, سونىمەن بىرگە كورمە كەشەنىنىڭ اشىق ايماقتارىمەن تولىقتىرىلۋ كەرەك.
قوعامدىق ايماقتار «بولاشاق ەنەرگياسىنىڭ» كونتسەپتۋالدى نەگىزدەرىنە ارنالادى دا, سونىڭ ناتيجەسىندە ەكسپو تاقىرىبىن ودان ءارى اشاتىن بولادى.
كورمە كورەرمەندەرىنە ارناپ جايلى, رەكرەاتسيالىق ايماقتار قۇرۋ جوسپارلانعان, وندا قوناقتار تىنىعۋمەن بىرگە ەكسپو تاقىرىبى بويىنشا قوسىمشا قىزىقتى اقپارات الىپ, تاقىرىپتىق ەكسپوزيتسيالار مەن قازاقستاندىق جانە حالىقارالىق سۋرەتشىلەر ينستاللياتسيالارىن, ينتەراكتيۆتى وبەكتىلەردى كورە الادى.
مادەني شارالار مەكەنى
2017 جىلى استانا ەلدىڭ مادەني ءومىرىنىڭ ەپيتسەنترى مەن الەمنىڭ ەڭ ءىرى الاڭدارىنىڭ بىرىنە اينالادى. مۇندا ۇلتتىق جانە الەمدىك مادەني تەندەنتسيالارعا جاراساتىن بىرەگەيلى ءارى جان-جاقتى باعدارلاما ۇسىنىلادى.
كورمەنىڭ مادەني-ويىن-ساۋىق باعدارلاماسى ەكسپو-2017 مازمۇنىنىڭ نەگىزىنە الىنعان «بولاشاق ەنەرگياسى» تاقىرىبىن قامتيدى.
كورمە اۋماعىنداعى مادەني-ويىن-ساۋىق باعدارلاما, اشىلۋ مەن جابىلۋ سالتاناتى, كۇندەلىكتى شەرۋ, كەشكىلىك كورىنىس جانە ت.ب. ارنايى شارالار ۇيىمداستىرىلادى. سونىمەن بىرگە, باعدارلامانىڭ باعدارلى مادەني ءىس-شارالارى – اكادەميالىق, ۇلتتىق ونەر ويلاستىرىلعان.
ۇلتتىق كۇندەردى قالاي ۇلىقتايمىز؟
ەكسپو-2017 كورمەسىنە قاتىساتىن كەز كەلگەن مەملەكەتكە ۇلتتىق كۇندەر, مادەني ءىس-شارالار, شوۋ وتكىزۋ مۇمكىندىگى بەرىلەدى. ۇلتتىق كۇندەردى ەكسپو پلازادا وتكىزۋ جوسپارلانعان.
ءىس-شارالار حالىقارالىق قاتىناستار مەن مادەني الماسۋعا جاعداي جاساۋ ءۇشىن يكەمدەلىپ وتەدى. ۇلتتىق كۇندەر باعدارلاماسىنا كەلەسىدەي راسىمدەردى ەنگىزۋ ۇسىنىلۋدا: ۇلتتىق تۋدى كوتەرۋ جانە مەملەكەتتىك ءانۇراندى ورىنداۋ, رەسمي تۇلعالاردىڭ باياندامالارىن تىڭداۋ, سۋرەتكە ءتۇسۋ, قوناقتار كىتابىنا تىركەۋ.
شارانىڭ شارىقتاۋ شەگىندە قاتىسۋشى-مەملەكەتتىڭ مادەنيەتى تانىستىرىلادى. ۇلتتىق مۋزىكالىق كونتسەرتتەر, قاتىسۋشى-مەملەكەتتىڭ ۇلتتىق بي ونەرىن كورسەتەتىن باعدارلامالار, كورىنىستەر, شوۋ, ت.ب. قويىلادى.
قاتىسۋشىلارعا سونىمەن بىرگە اتاقتى ارتىستەر مەن باسقا ونەر وكىلدەرىن شاقىرۋ ۇسىنىلادى. مۇنداي جاعدايدا ءىس-شارالاردىڭ ءتۇرى مەن اۋقىمىنا بايلانىستى ولار امفيتەاتر, ەنەرگيا حولى, كونگرەسس نەمەسە ونەرلەر ورتالىعىندا وتەدى.
جالپى, بارلىق ءىس-شارالار 6 الاڭدا: كونگرەسس ورتالىق, ەنەرگيا حولى, ونەرلەر ورتالىعى, ۇلتتىق كۇن ساحناسى جانە كورمە اۋماعىندا وتەدى. كۇللى الاڭدار جوعارى تەحنيكالىق دەڭگەيدە جاراقتالعاندىقتان, كەيىنگى تەحنولوگيالاردى پايدالانىپ, بىرەگەي جانە تارتىمدى كورىنىس ۇيىمداستىرۋعا بولادى.
ءىس-شارالاردان باسقا, نەگىزگى كونتسەرت الاڭدارىندا كورەرمەن ءۇشىن دۇنيەجۇزىنە ايگىلى ديۋ سولەي تسيركىنىڭ قويىلىمدارىن تاماشالاۋعا, لۋنا-ساياباققا بارۋعا, شەتەلدىك قوناقتارعا ەتنو-قالاشىقتا تۇرمىسپەن, قولدانبالى ونەرمەن, ۇلتتىق ويىندار جانە ادەت-عۇرىپپەن تانىسۋعا, ۇلتتىق دامنەن اۋىز تيۋگە مۇمكىندىك بەرىلەدى.
كەرەك دەرەك
- امفيتەاتر – رەسمي, ءىرى كونتسەرتتىك جانە تەاترلانعان مادەني-بۇقارالىق ءىس-شارالاردى وتكىزۋگە ارنالعان اشىق الاڭ. سىيىمدىلىعى – 12 مىڭ ادامعا دەيىن, ونىڭ ىشىندە 2,5 مىڭ وتىراتىن ورىندار.
- كونگرەسس ورتالىق – كورمە اۋماعىنان تىس جەردە ورنالاسقان, بىراق جاياۋ جۇرگەنگە جاقىن جابۋلى كەشەن. ول كونفەرەنتسيا, فورۋم, سەمينار, كونتسەرتتىك شوۋ وتكىزۋگە ارنالعان. سىيىمدىلىعى – 3 مىڭ ادامدىق زال.
- ەنەرگيا حولى – مىڭ ادام سىياتىن كونتسەرت زالى. قازىرگى ورىنداۋ ونەرىنىڭ بارلىق تۇرلەرىن (دجاز, قازىرگى بالەت, كامەرالى ونەر) كورسەتۋگە ارنالعان.
- ونەرلەر ورتالىعى – كورمە كورەرمەندەرىنىڭ ءداستۇرلى جانە قازىرگى زامانعى ۇزدىك كوركەم مادەنيەت ۇلگىلەرىمەن تانىساتىن, قازاقستاننىڭ قولدانبالى جانە بەينەلەۋ ونەرىنىڭ; قازىرگى قازاقستاندىق جانە حالىقارالىق سۋرەتشىلەردىڭ كورمەسى; تاقىرىپتىق وقىتۋ ماستەر-كلاستارى; كينو كورسەتىلىمى مەن تەاتر قويىلىمى; سونىمەن بىرگە كوركەم سالانىڭ جەتەكشى وكىلدەرىمەن شىعارماشىلىق كەزدەسۋلەر مەن لەكتسيالار جوسپارلانعان ورىن.
- ۇلتتىق كۇن ساحناسى (ەكسپو پلازا) – رەسمي قاتىسۋشىلاردىڭ ۇلتتىق كۇندەرى, وبلىستار مەن استانا, الماتى قالالارىنىڭ مادەنيەت كۇندەرى اياسىندا كونتسەرت وتكىزۋگە ارنالعان توبەسى جابىق, جەڭىل جيىلاتىن ساحنا. سىيىمدىلىعى – 500 وتىراتىن ورىن.
- قوعامدىق كوشە ايماعى – مادەني-ويىن-ساۋىق (كوشە تەاترلارى), مادەني-ءبىلىم بەرۋ (بالالار مەن ەرەسەكتەرگە ارنالعان ينتەراكتيۆتى ماستەر-كلاستار).
- ەكسپو اۋماعى – بۇقارالىق باعدارلامالاردى: كوشە كورىنىستەرىن, كۇندەلىكتى شەرۋ مەن قاتىسۋشى-ەلدەردىڭ ءىس-شارالارىن وتكىزۋگە ارنالعان كورمە اۋماعى.
گۇلميرا ايماعانبەت
