حالىقتى جۇمىسپەن قامتۋعا بايلانىستى ەلىمىزدە كوپتەگەن شارالار مەن مەملەكەتتىك باعدارلامالار جۇزەگە اسىرىلىپ جاتىر. سوعان قاراماستان, بۇل ماسەلە ءالى دە كۇن تارتىبىندە تۇر. ونىڭ سەبەپتەرى كوپ. مامانداردىڭ ەڭبەك نارىعىنداعى سۇرانىسقا سايكەس كەلمەۋى, مامان يەلەرىنىڭ تالاپقا ساي ەمەستىگى – ماسەلەنىڭ ءبىر قىرى عانا. استاناداعى «ەل قاناتى» قوعامدىق قورى ەڭبەك نارىعىنا قانداي ماماندىقتار قاجەتتىگى, قازىرگى تۇلەكتەردىڭ كاسىبي ساپاسى جونىندە ارنايى زەرتتەۋ جۇرگىزىپتى. وندا جۇمىسسىزدىق ماسەلەسىندەگى بىرقاتار تۇيتكىلدەردىڭ ءتۇيىنى تارقاتىلعان.
«ەل قاناتى» قوعامدىق قورى پرەزيدەنتى اسلانبەك جاقىپتىڭ ايتۋىنشا, ولار الدىمەن ءارتۇرلى كومپانيا باسشىلارى, جەكە كاسىپكەرلەر – بارلىعى ەكى مىڭنان اسا جۇمىس بەرۋشى اراسىندا ەلىمىزدەگى كادر تاپشىلىعى ءجونىندە ساۋالداما جۇرگىزگەن. ساۋالداماعا قاتىسۋشىلاردىڭ باسىم بولىگى استانالىقتار بولىپتى. رەسپوندەنتتەردىڭ 50,6 پايىزى ەلىمىزدە ماماندار تاپشىلىعى جوق دەپ ەسەپتەيدى ەكەن. بىراق, 32,6 پايىزىنىڭ پىكىرى كەرىسىنشە.
جۇمىس بەرۋشىلەردىڭ پىكىرىنشە, ەلىمىزدە ەڭ قات بولىپ وتىرعان ماماندار – ينجەنەرلەر (13,8 پايىز) مەن دارىگەرلەر (12,8 پايىز). سودان كەيىن قۇرىلىسشىلار, باعدارلاماشىلار, مۇعالىمدەر مەن وقىتۋشىلار ەكەن.
ال, «وقۋ ورىندارىندا دايارلانىپ شىعاتىن تۇلەكتەردىڭ كاسىبي ءبىلىمى قازىرگى ەكونوميكا تالاپتارىنا ساي ما؟» دەگەن ساۋالعا 44,5 پايىزى «كوپ جاعدايدا سايكەس كەلە بەرمەيدى» دەپ جاۋاپ بەرگەن. «سوندىقتان ماماندار دايارلاۋ ساپاسىنا وقۋ ورىندارى ايرىقشا كوڭىل بولۋگە ءتيىس» دەيدى جۋرناليستەرمەن وتكەن ءباسپاسوز ءماسليحاتىندا «كاسىپقور حولدينگى» ۇاق ستۋدەنتتەرمەن جۇمىس جونىندەگى دەپارتامەنتىنىڭ ديرەكتورى توعجان جۇماعۇلوۆا. ونىڭ ايتۋىنشا, جۇمىس بەرۋشىلەردىڭ 63 پايىزى تۇلەكتەردىڭ بىلىمىنە, كاسىبي دايارلىعىنا كوڭىلى تولمايتىن كورىنەدى.
ەڭبەك نارىعىنداعى سۇرانىسقا بولاشاق مامانداردىڭ تاڭداۋى سايكەس كەلە مە؟ «ەل قاناتى» قوعامدىق قورى بۇل ساۋالدى ەلىمىزدىڭ سەگىز وڭىرىنەن 2 مىڭداي رەسپوندەنتكە كولدەنەڭ تارتىپ, ارنايى ساۋالداما جۇرگىزگەن. «بۇرىنعىداي ەمەس, بۇگىندە جاستار ەلىمىزدىڭ ەڭبەك نارىعىنا تەحنيكالىق مامان يەلەرى قاجەت ەكەنىن تۇسىنگەن سەكىلدى. ساۋالداماعا قاتىسقان استانا مەن الماتى جانە قاراعاندى قالاسىنداعى جوعارى سىنىپ وقۋشىلارى مەن تۇلەكتەردىڭ كوپشىلىگى تەحنيكالىق سالانى ءجون كورەتىنىن ايتىپتى. تەك 6,1 پايىزى عانا قۇقىقتانۋ مەن مەملەكەتتىك قىزمەت جانە مەملەكەتتىك باسقارۋدى قالايتىنىن جەتكىزگەن» دەيدى قور جەتەكشىسى اسلانبەك جاقىپ.
الەۋمەتتىك ساۋالداما ءناتيجەلەرى بەكەردەن-بەكەر جۇرگىزىلگەن جوق. جيىندا ءسوز العان ءبىلىم جانە عىلىم مينيسترلىگى جاستار ءىسى جونىندەگى كوميتەتتىڭ باس ساراپشىسى دامير مەڭدىعاليەۆتىڭ ايتۋىنشا, ساۋالداما قورىتىندىلارى مينيسترلىك تاراپىنان ەسكەرۋسىز قالمايدى. اسىرەسە, تۇلەكتەردىڭ ەڭبەك نارىعىنا ساي ساپالى مامان بولىپ شىعۋىنا مينيسترلىك ەرەكشە كوڭىل بولەتىن بولادى.
