1 قازان كۇنى قازاقستان رەسپۋبليكاسىنىڭ ۇلتتىق اكادەميالىق كىتاپحاناسىندا اقىن, فيلولوگيا عىلىمىنىڭ كانديداتى مارجان ەرشۋدىڭ «ەرىك قۇرمانعاليەۆ» اتتى كىتاپ-البومىنىڭ تۇساۋكەسەرى وتەدى.
قازاقستاننىڭ حالىق ءارتىسى ەرىك قۇرمانعاليەۆ اتىراۋ وبلىسىنىڭ جىلىوي اۋدانىندا دۇنيەگە كەلگەن, سيرەك كەزدەسەتىن داۋىسقا يە, تاماشا تالانت يەسى ەدى. كەزىندە ول تۋرالى ن.دورلياك, ا.لاەرتسكي, د.بەرتمان سياقتى مۋزىكا الەمىنە كەڭىنەن تانىمال ونەر قايراتكەرلەرى: «ونىڭ داۋسىندا ادامدى سيقىرلاپ, باۋراپ الاتىن تابيعات بەرگەن ايرىقشا قۇدىرەت بار» دەپ جەتە باعالاعان ەدى.
مىنە, سول كوزىنىڭ تىرىسىندە تالاي قيىنشىلىقتارعا تاپ بولىپ, ءومىرىنىڭ سوڭعى جىلدارى ەلدەن جىراق جالعىزدىق كەشكەن قازاق ءانشىسى تۋرالى اۆتور تەبىرەنىستى ويلارىن جيناق ەتىپ جارىققا شىعارىپ وتىر.
فوتوسۋرەتتەرمەن كوركەمدەلگەن كىتاپ-البومدا الەمدىك مۋزىكا تاريحىندا اتى التىن ارىپتەرمەن جازىلىپ قالعان ەرىك قۇرمانعاليەۆتىڭ وتباسى, اتا-اناسى, تۋعان جەرى, وسكەن ورتاسى, ونەردەگى جەتىستىكتەرى مەن ومىردەگى ساتسىزدىكتەرى تۋرالى شىنايى باياندالادى.
«ۆوكال ونەرىندەگى ەرەكشە قۇبىلىس بولعان ەرىك قۇرمانعاليەۆ – ايرىقشا تاعدىر كەشكەن ءانشى. ءتىلى باسقا, ءداستۇرى بولەك التى قۇرلىقتىڭ ادامدارى وعان, ونىڭ انشىلىگىنە تابىنا ءارى تاڭدانا قارادى. ەرىك ءبىر عانا حالىقتىڭ پەرزەنتى بولسا دا, ونىڭ انشىلىك ميسسياسى وتانىنان شىعىپ, تاۋلاردان اسىپ, مۇحيتتاردان ءوتىپ, بۇكىل الەمنىڭ الابىن ارالىپ كەتتى, اتاعى شارتاراپقا جايىلدى…
…ەرىكتىڭ سالعان ءانى ماعان قاتتى اسەر ەتتى. قايتا-قايتا تىڭداي بەردىم. ەرىكتىڭ انىمەن تاڭىم اتىپ, كۇنىم باتقانداي. ەرىك تاقىرىبىنا مەن وسىلاي كەلدىم» دەيدى مارجان اعىنان جارىلىپ.
ساعي ورال
