ەلىمىزدە ميلليونعا جۋىق ادام باسپانا تۇرعىزۋعا جەر تەلىمىن بەرۋدى وتىنگەن. استانادا دا جەكە تۇرعىن ءۇي سالۋعا جەر سۇرايتىندار كوپ. بۇل تۋرالى ەلوردا اكىمىنىڭ سايتىنا وتىنىشپەن حات جازعاندار قاتارى جەتىپ ارتىلادى.
استانا قالاسى جەر قاتىناستارى باسقارماسىنىڭ دەرەگىنە سۇيەنسەك, جىل باسىنان بەرى ەشكىمگە ەشقانداي جەر بەرىلمەگەن. كەلەسى جىلى دا بۇل ماسەلە قاراستىرىلمايدى. سەبەبى, قالاعا تيەسىلى اۋماقتا ينجەنەرلىك-كوممۋنيكاتسيالىق جەلىلەرمەن قامتاماسىز ەتىلگەن ارنايى جابدىقتالعان الاڭدار جوق.
سۇبەلى ءسوز
نازىمبەك كەنجەباەۆ,
استانا قالاسى جەر قاتىناستارى باسقارماسى باستىعىنىڭ ورىنباسارى:
– جەكە تۇرعىن ءۇي قۇرىلىسىن سالۋعا جەر تەلىمدەرىن ءبولۋ – بۇگىنگى تاڭداعى كۇرمەۋى قيىن ەڭ وتكىر ماسەلەلەردىڭ ءبىرى. وسى باعىتتا ءبىزدىڭ تۇرعىندارعا ناقتى, دۇرىس اقپارات جەتپەي جاتادى. ەڭ باستىسى, قۇزىرەتتى ورگاندار بەكىتكەن جەر تەلىمدەرىن بەرۋدىڭ قاتاڭ ءتارتىبى بار. ەكىنشىدەن, ەرەجە, ءتارتىپ بولعانىمەن, بەرىلەتىن بوس جەر تەلىمى جوق.
