كەشە ورتالىق كوممۋنيكاتسيالار قىزمەتىنىڭ الاڭىنا كەلگەن «استانا ەكسپو-2017» ۇلتتىق كومپانياسى باسقارما توراعاسىنىڭ كەڭەسشىسى قاناعات تىلەمىسوۆ كورمە كەشەنىنىڭ قۇرىلىسى الداعى شىلدە ايىندا باستالاتىنىن مالىمدەدى.
ونىڭ ايتۋىنشا, قازىرگى تاڭدا قۇرىلىسقا قاجەت قۇجاتتار دايىندالىپ, ساراپتامادان وتكىزىلۋدە. «قۇرىلىستىڭ نەگىزگى قۇرىلىمدارى ەكى بولىكتەن تۇرادى. ءبىرىنشىسى – 25 گەكتار اۋماقتى الاتىن كورمە وتەتىن الاڭ. ونىڭ جالپى اۋدانى 240-250 مىڭ شارشى مەتر. بۇنىڭ سىرتىندا 750 مىڭداي شارشى مەترگە قوسالقى قۇرىلىمدار سالىنادى. مىسالى, كورمە قاتىسۋشىلارىنا تۇرعىزىلاتىن تۇرعىن ءۇي, مەيمانحانا وزگە دە تۇرمىسقا قاجەت عيماراتتار» دەدى ول.
سونىمەن بىرگە ق. تىلەمىسوۆ كورمەگە قاتىسۋشى ەلدەردىڭ سانى مەن اتاۋى 2015 جىلدىڭ ەكىنشى جارتىسىندا بەلگىلى بولاتىنىن, حالىقارالىق كورمەلەر بيۋروسىنىڭ تالاپتارىنا سايكەس ءار ەل 250 شارشى مەتردەن 1000 شارشى مەترگە دەيىن اۋماققا تاپسىرىس بەرە الاتىنىن ايتتى.
ەكسپو قالاشىعىندا كورمە قاتىسۋشىلارىنا ارنالعان كوپ قاباتتى ۇيلەردى ينۆەستورلار سالاتىنىن, ازىرگە 4 مىڭ پاتەرلىك ۇيلەردى سالۋ جوسپارلانعانىن, كورمە كەشەنىنىڭ قۇرىلىسى 2016 جىلدىڭ 31 جەلتوقسانىنا دەيىن اياقتالۋ كەرەكتىگىن اتاپ ءوتتى.
كورمە كەشەنى جوباسىنا ارنالعان كونكۋرسقا 20-دان استام ەلدەن 50-گە جۋىق كومپانيا قاتىسقان. ونىڭ قورىتىندىسىندا اقش-تىڭ Adrian Smith+Gordon Gill Architecture ارحيتەكتۋرالىق كومپانياسى جەڭىسكە جەتكەن. مۇنداي مالىمەتتى ساۋلەت دەپارتامەنتىنىڭ ديرەكتورى قانات مۇقاشەۆ كەلتىردى. كورمەنىڭ سيمۆولى ديامەترى – 80 مەتر, بيىكتىگى – 100 مەتر بولاتىن سفەرا تەكتەس قۇرىلىس ەكەنىن ايتقان ول كورمەنىڭ جالپى اۋدانى 173,4 گەكتاردى الاتىنىن جەتكىزدى.
بەلگىلى مەتسەنات ساپار ىسقاقوۆ تاياۋدا الەمنىڭ 27 مەملەكەتىن ارالاپ كەلگەن ەكەن. 120 كۇندىك ساپارىندا ول قازاقستاندى جانە «استانا ەكسپو-2017» كورمەسىن ناسيحاتتاپ ءجۇرىپتى. بريفينگتە سول ساپارلاردان العان اسەرلەرمەن بولىسكەن ول ەكسپو ارقىلى بىزدەر كىم ەكەنىمىزدى الەمگە تانىتۋىمىز كەرەك» دەدى. «تىلەپ قوبىز» سارايىندا ورنالاسقان, 29 قازاق ۇلتتىق اسپاپتارىندا وينايتىن انسامبل دە كورمە كەزىندە ەلىمىزدىڭ ونەرىن تانىتۋعا اتسالىساتىنىن ايتىپ, كومپانيا وكىلدەرىنە شەتەل ازاماتتارىنىڭ قولى قويىلعان ەكسپو جالاۋىن تابىس ەتتى.
امانعالي قالجانوۆ
