حالىقارالىق قارتتار مەرەكەسى قارساڭىندا سارىارقا اۋدانىنا قاراستى كۇلاش بايسەيىتوۆا كوشەسىندەگى №126 ۇيدە ارداگەرلەر كلۋبىنىڭ اشىلۋ ءراسىمى ءوتتى. سالتاناتتى شاراعا اۋدان اكىمى ە.بولەكپاەۆ, رەسپۋبليكالىق ارداگەرلەر ۇيىمى ورتالىق كەڭەسىنىڭ توراعاسى ءو.وزعانباەۆ, قالالىق ارداگەرلەر كەڭەسىنىڭ توراعاسى ب.ءالىمجانوۆ, قالالىق ءماسليحاتتىڭ دەپۋتاتى ب.سولسانوۆ جانە اۋداندىق ارداگەرلەر كەڭەسىنىڭ توراعاسى ق.قوتىرەۆ قاتىستى.
ارداگەرلەردىڭ ەل دامۋىنا قوسقان ۇلەسى وراسان زور. سول ءۇشىن ولارعا العىس سەزىمىن بىلدىرە كەلە, اۋدان باسشىسى ەلباسى نۇرسۇلتان نازارباەۆتىڭ سارابدال ساياساتىنىڭ ارقاسىندا ءبىزدىڭ ەلدە ەڭبەكتەگەن بالادان ەڭكەيگەن قارتقا دەيىن قامقورلىققا بولەنگەنىن, بۇل باعىتتا اۋداندا يگى شارالار ۇيىمداستىرىلىپ جاتقانىن ايتتى.
اتالمىش ورتالىقتا اۋدان ارداگەرلەرىنە بوس ۋاقىتتارىن وتكىزۋگە بارلىق جاعداي قاراستىرىلعان. ءتىل ۇيرەنۋگە دە مۇمكىندىك بار.
شارا بارىسىندا حالىق قالاۋلىسى اتىنان ارداگەرلەرگە سىي-سياپات جاسالدى. ال, بۇكىل سانالى عۇمىرىن, قاجىر-قايراتىن ەل يگىلىگىنە, ۇرپاق تاربيەسىنە جۇمساعان زەينەتكەرلەر وزدەرىنە وسىنشالىقتى قامقور بولعان ازاماتتارعا العىستارىن جەتكىزدى.
