ەسىل اۋدانى اكىمدىگىندە قر مەملەكەتتىك قىزمەت ىستەرى مينيسترلىگى استانا قالاسى بويىنشا دەپارتامەنتىنىڭ ۇيىمداستىرۋىمەن جيىن ءوتتى. «ازاماتتاردىڭ قۇقىقتارى مەن زاڭدى مۇددەلەرىن قورعاۋ قىزمەتىن جۇزەگە اسىرۋداعى قىزمەتتىك ەتيكا جانە جوعارى رۋحاني-ادامگەرشىلىك احۋال» تاقىرىبىندا وتكەن شاراعا قۇقىق قورعاۋ ورگاندارىنىڭ وكىلدەرى قاتىستى.
جيىن بارىسىندا قۇقىق قورعاۋ ورگاندارىنىڭ قوعامداعى ءرولى, سوت بيلىگى اراسىنداعى ادامگەرشىلىك احۋالدى قالىپتاستىرۋ, قۇقىق قورعاۋ ورگاندارىنىڭ ءيميدجى مەن ولارعا دەگەن ازاماتتاردىڭ سەنىمىن نىعايتۋ, سىبايلاس جەمقورلىقتىڭ الدىن الۋ ماسەلەلەرى قارالدى.
جيىندا ءسوز العان استانا قالاسى بويىنشا سوتتار اكىمشىسىنىڭ باسشىسى مىندەتىن اتقارۋشى ايبول يبراگيموۆ سوت بيلىگىن جەتىلدىرۋ بويىنشا اتقارىلىپ جاتقان جۇمىستارعا توقتالدى.
– بۇگىندە سوت جۇيەسىنىڭ الدىندا تۇرعان باستى مىندەت – سىبايلاس جەمقورلىقپەن كۇرەس جانە ونىڭ الدىن الۋ. مىڭداعان ادامنىڭ تاعدىرىنا جاۋاپ بەرەتىندىكتەن, قاتەلىك جاساۋعا جول جوق. وسى جۇمىستاردى جەتىلدىرۋگە بايلانىستى 2014 جىلى ىشكى قاۋىپسىزدىك قىزمەتى قۇرىلعان ەدى. قاۋىپسىزدىك قىزمەتى استانا سوتتارىندا سىبايلاس جەمقورلىقتىڭ الدىن الۋ ءۇشىن تۇراقتى تۇردە ءىس-شارالار وتكىزىپ كەلەدى. سوت جۇيەسىندە كەزدەسەتىن قۇقىق بۇزۋشىلىقتىڭ الدىن الۋدى كوزدەيدى, – دەدى استانا قالاسى بويىنشا سوتتار اكىمشىسىنىڭ باسشىسى مىندەتىن اتقارۋشى ا. يبراگيموۆ.
ونىڭ ايتۋىنشا, يننوۆاتسيالىق تەحنولوگيالاردى پايدالانۋ سوت جۇيەسىندە كورسەتىلەتىن قىزمەت تۇرلەرىن جەتىلدىرۋگە سەپتىگىن تيگىزدى. ماسەلەن, «سوت كابينەتى», «سوت قۇجاتتارىمەن تانىسۋ», «سوتقا شاقىرتۋلار», «سوت شەشىمدەرى» سەكىلدى تاعى باسقا قىزمەتتەر حالىققا قولجەتىمدى بولىپ كەلەدى. بۇل ءوز كەزەگىندە جۇمىستىڭ تيىمدىلىگىن كورسەتۋدە.
سونىمەن قاتار, كولىكتەگى ورتالىق ىشكى ىستەر دەپارتامەنتى قاۋىپسىزدىك قىزمەتى باسقارماسىنىڭ باسشىسى التىنبەك شۇيىنشاليەۆ قىزمەت بارىسىندا كەزدەسەتىن ادەپتىلىك ماسەلەلەرىنە نازار اۋداردى. ورگان قىزمەتكەرلەرىنىڭ مىنەز-قۇلىق قاعيدالارىن ودان ءارى جەتىلدىرۋ, قىزمەتشىلەردىڭ ادەپسىز ءمىنەز-قۇلىق جاعدايلارىنىڭ الدىن الۋعا, ولاردىڭ مىنەز قۇلقىنىڭ نەگىزگى ستاندارتتارىنا تولىق تۇسىنىكتەمە بەردى. سىبايلاس جەمقورلىققا قارسى زاڭناما تالاپتارىن قۇرمەتتەۋدى قالىپتاستىرۋ قاجەتتىگىن دە العا تارتتى.
گۇلميرا ايماعانبەت
