بازار جايىن كورمەككە ەلورداداعى «شاپاعات», «ەۋرازيا» ساۋدا ورتالىعى ماڭايىن تاعى ارالادىم. «باياعى تاز قالپى» دەمەكشى, اشىق, شاشىراڭقى ازىق – تۇلىك زاتتارىنان كوز ءسۇرىندى. ساتۋشىلار جانىنا جاقىنداپ, نە سەبەپتى بۇل جەردە تۇرعاندارىن سۇراعانىم سول ەدى, نە شارۋاڭ بار دەپ ءوزىمدى سۇراقتىڭ استىنا العانى. – بۇلار تۋرالى الگى جۋرناليستەر سان مارتە جازىپ, تەلەارنادان كورسەتتى ەمەس پە؟ ءبارىبىر ناتيجە جوق. ايتتىڭ نە, ايتپادىڭ نە, ەستىر قۇلاق, ار – ۇيات بولماعاسىن, – دەپ ءبىر قاريا ماعان اراشا تۇردى.
اقساقال نەگىزىنەن ارعا قاتىستى ءسوزدى ساتۋشىلارعا ايتسا كەرەك. ايتپەسە, قوعامدىق ءتارتىپ ساقشىلارى ولارعا سان مارتە ەسكەرتۋ جاساعان.ەندى ءتارتىپ بۇزعان جۇرگىزۋشىلەرگە الدىمەن ايىپپۇل, قايتالانسا قاتاڭ شارا كورەتىن سەكىلدى, قالا سانىنە نۇسقان كەلتىرىپ تۇرعان جابايى بازار يەلەرىنىڭ دە اياعىن اڭداپ باستىرتاتىن كەز جەتتى. ولاردى ورىندارىنان قۋعانمەن, ءىس بىتپەيدى.
بىلتىر قىستىگۇنى «جاسىباي» قوناق ۇيىنەن شەتكىرەكتە كوكونىسپەن بىرگە ەت تە ساتىلدى. سوندا ازىق ۇستىنە جىلىمىق قاردىڭ سەبەلەگەنىن كورگەنبىز. جايباراقات بۇل كورىنىستىڭ بيىلعى قىستا قايتالانباسىنا كىم كەپىل؟ بۇل ماسەلەنى قايتا –قايتا قوزعاي, ۇياتتان ءبىزدىڭ دە بەتىمىز كۇيىپ بولدى عوي.
ءامىرحان الماعانبەتوۆ
