«مەن – قازاقستان ازاماتىمىن!»
ءانۇران – حالىق جۇرەگىنىڭ ءلۇپىلىن تۇيگەن اسقاق اۋەن. اۋەلەگەن ءانۇرانىمىز بۇكىل الەمگە جاڭا تاۋەلسىز مەملەكەتتىڭ كەلگەنىن ايگىلەدى. مەملەكەتتىك رامىزدەرىمىز ارقىلى ءبىزدى بۇكىل الەم تانىدى.
كوك بايراعىمىز جەلبىرەپ, ءانۇرانىمىز شارىقتاپ, قىرانىمىز قالىقتادى.ءانۇراندى ارداقتاۋ – قازاقستان حالقىنىڭ ابىرويلى مىندەتى. وسىعان وراي استاناداعى قازاق گۋمانيتارلىق زاڭ ۋنيۆەرسيتەتىنىڭ الاڭىندا «مەن -قازاقستان ازاماتىمىن!» اتتى پاتريوتتىق اكتسيا ءوتتى. ونىڭ بارىسىندا 3 مىڭعا جۋىق ادام ءبىر مەزگىلدە ەلىمىزدىڭ ءانۇرانىن ورىندادى. اكتسيا جاستاردى وتانسۇيگىشتىككە تاربيەلەۋ, مەملەكەتتىك نىشاندارعا قۇرمەت كورسەتۋ ماقساتىندا ۇيىمداستىرىلدى. ءانۇراندى شىرقاۋشىلار الدىندا قازاق گۋمانيتارلىق زاڭ ۋنيۆەرسيتەتىنىڭ پرەزيدەنتى, زاڭ عىلىمدارىنىڭ دوكتورى, پروفەسسور ماقسۇت نارىكباەۆ ءسوز سويلەدى. شارا سوڭىندا رەسپۋبليكالىق گۆارديانىڭ قۇرمەتتى قاراۋىلىنىڭ پلاتس-كونتسەرتى ءوتتى.
ەركەجان ساتىمبەك