«بايتەرەك» حالىقارالىق ءباسپاسوز ورتالىعىندا قۇربان ايت مەرەكەسىنە ارنالعان ءباسپاسوز ءماسليحاتى ءوتىپ, وندا «نۇر استانا» ورتالىق مەشىتىنىڭ باس يمامى ناۋرىزباي وتپەنوۆ پەن «ءال عاني» مەشىتىنىڭ باس يمامى نۇرلان باقباساروۆ سانيتاريالىق-ەپيدەميولوگيالىق تالاپتاردى ساقتاۋ ماقساتىندا قۇرباندىققا شالىناتىن مالدى ساتۋ جانە سويۋ, تاراتۋ شارالارى استانا قالاسى اكىمدىگى رۇقسات ەتكەن ارناۋ-لى الاڭداردا وتكىزىلەتىندىگىن ءمالىم ەتتى.
«قۇربان ايت – بارشا الەمنىڭ مۇسىلماندارىن ءبىرىكتىرىپ, اللا تاعالانىڭ ريزاشىلىعى ءۇشىن قۇرباندىق شالاتىن قاسيەتتى مەرەكە. بيىل بۇل مەرەكە 15-17 قازان ارالىعىندا ءوتىپ, 3 كۇنگە جالعاسادى. ال, ايت نامازى
استانا ۋاقىتى بويىنشا 8.10-دا وقىلادى. بۇل رەتتە, ءاربىر مۇسىلمان تاڭەرتەڭ تۇرىپ, تازالانىپ, تازا كيىمدەرىن كيىپ, مەشىتكە بارىپ, قۇربان ايت نامازىن جاماعاتپەن بىرگە اللاعا ءمىناجات ەتىپ, قۇلشىلىقپەن باستايدى» دەدى «نۇر استانا» ورتالىق مەشىتىنىڭ باس يمامى ناۋرىزباي وتپەنوۆ.
سونداي-اق, 16-18 قازاندا ۇلىق مەرەكەنىڭ قۇرمەتىنە استانا مەشىتتەرى ءجانە قمدب «زەكەت» قورىنىڭ ۇيىمداستىرۋىمەن «قۇربان شال!» ساۋاپتى اكتسياسى وتكىزىلمەك. ءىس-شارا بارىسىندا بىرنەشە باس ءىرى قارا مال قۇرباندىققا شالىنىپ, ولاردىڭ ەتى استانا قالاسى مەن اقمولا وبلىسىنداعى مۇقتاج جاندارعا تاراتىلادى. ەلوردالىق ءدىنباسىلار «التىن تاعا» بازارىندا ۇيىمداستىرىلاتىن بۇل ساۋاپتى ىسكە جاعدايى جەتەتىن بارشا مۇسىلمان باۋىرلاردى شاقىرىپ وتىر.
ە.بولاتۇلى
