قالالىق جۇمىسپەن قامتۋ ورتالىعىنىڭ ۇيىمداستىرۋىمەن «Astana Mall» ساۋدا-ويىن-ساۋىق ورتالىعىندا بوس جۇمىس ورىندار جارمەڭكەسى ءوتتى.
جارمەڭكە ءتۇرلى سالانىڭ كادر قىزمەتكەرلەرى مەن كاسىپورىن باسشىلارىنىڭ باسىن قوستى. قۇرىلىس فيرمالارى, ەكىنشى دەڭگەيلى بانكتەر, مەيرامحانا, قوناقۇي بيزنەسى, ساۋدا جەلىلەرى سەكىلدى قىزمەت كورسەتۋ سالاسىنىڭ ماماندارى, سونداي-اق ىشكى ىستەر ورگاندارى, ءبىلىم بەرۋ مەكەمەلەرى مەن دەنساۋلىق ساقتاۋ ۇيىمدارىنان كەلگەن 40-تان اسا جۇمىس بەرۋشى 260-قا جۋىق بوس ورىن ۇسىندى. «بۇل – ۇسىنىس پەن سۇرانىستى قاناعاتتاندىراتىن ءتيىمدى الاڭ. بار-جوعى ءۇش ساعات ىشىندە ءبىر عانا جۇمىس بەرۋشى جۇزدەن كوپ تۇيىندەمە قابىلداپ, سول مەزەتتە كەلۋشىنى اڭگىمەلەسۋدەن وتكىزەدى. جۇمىسسىزدار دا كۇنى بويى بىرنەشە جەردى ارالاپ, اياق توزدىرىپ جۇرمەيدى. ەڭبەككە تالپىنعاندار ءۇشىن مۇمكىندىك كوپ. جىل باسىنان بەرى مۇنداي بوس جۇمىس ورىندار جارمەڭكەسىنىڭ تورتەۋى ءوتتى. بيىل تاعى 8-ءىن ۇيىمداستىرۋ جوسپارلانعان» دەيدى جۇمىسپەن قامتۋ ورتالىعىنىڭ ديرەكتورى ولجاس ومار. ونىڭ ايتۋىنشا, كوپ جاعدايدا بوس ورىندار يەسىن تاپپاي جاتادى. بۇگىنگى كۇننىڭ وزىندە جۇمىسپەن قامتۋ ورتالىعىنىڭ مالىمەتتەر بازاسىندا 3000-نان اسا ۆاكانسيا تىركەلگەن. ال جۇمىستى بەلسەنە ىزدەۋشىلەر سانى مىڭعا جۋىق. بۇنىڭ ءتۇرلى سەبەبى بار. كوبىنە جۇمىسسىزدار جالاقى سوماسىن مىسە تۇتپايدى, مەكەمەنىڭ مەكەنجايى ۇيدەن الىس دەپ جاتادى. وسى تۇرعىدا جارمەڭكەگە كەلۋشىلەردىڭ بىرسىپىراسىمەن تىلدەسىپ كوردىك. «7 جىل مەملەكەتتىك قىزمەتتە ءجۇردىم. جۇمىسسىز قالعانىما 7 ايدىڭ ءجۇزى بولدى. داعدارىستىڭ سالدارى شىعار. ينتەرنەتتەن تاپقان ورىندارعا حابارلاسقاندا «كىسى الىپ قويدىق», «فيرما جابىلىپ قالدى» دەگەن جاۋاپتاردى ءجيى ەستىدىم. كەشە عانا استانا اكىمدىگىنىڭ سايتىنان قالاداعى ءىس-شارالار كەستەسىن قاراپ وتىرىپ, جارمەڭكە جايلى ءبىلدىم. مۇندا ارحيتەكتور جۇمىسىن قاراستىرىپ ءجۇرمىن. ماماندىعىما ساي تەك ديزاينەر ورنىن تاپتىم. جۇمىس – كۇندەلىكتى قاجەتتىلىكتەردىڭ وتەۋى عوي. سوندىقتان تالعاپ جۇرەتىن ۋاقىت جوق. ديزاينەرلىككە قابىلداماسا, كەز كەلگەن ەڭبەك تۇرىنە ءازىرمىن» دەيدى قايرات جۇماباەۆ. تاربيەشى, ساتۋشى, ەلەكتريك, قۇرىلىسشى سياقتى ۆاكانسيا ۇسىنعان ۇستەلدەردە كىسى قاراسى كوپ جينالعان. ال, №1 قالالىق بالالار اۋرۋحاناسىنان كەلگەن كادر قىزمەتكەرىنىڭ الدىندا ءبىردى-ەكىلى رەزيۋمە عانا جاتىر ەكەن. «پەدياتر, انەستەزيولوگ, گەماتولوگ, كارديولوگ, اللەرگولوگ دارىگەرلەر قاجەت. بىراق, جارمەڭكە باستالعالى مەديتسينالىق ءبىلىمى, ەڭبەك ءوتىلى بار ماماندار جولىقپادى. ەكى-ءۇش مەيىربيكە عانا كەلدى» دەيدى اتالمىش مەكەمەنىڭ كادر قىزمەتكەرى. ال, №73 «اياۋلىم» بالاباقشاسى مەڭگەرۋشىسىنىڭ شارۋا ءىسى جونىندەگى ورىنباسارى «مۋزىكالىق جەتەكشى, تاربيەشى, تاربيەشىنىڭ كومەكشىسى, مەدبيكە سىندى 7 بوس جۇمىس ورنىنا جارتى ساعات ىشىندە 21 ادام ءۇمىت ءبىلدىردى. اڭگىمەلەسۋ بارىسىندا ولارعا جۇمىس كەستەسىن, ورنالاسقان جەرىن ءتۇسىندىرىپ, مەكەمە تالاپتارىمەن تانىستىردىم. 15 ادام وسى جەردەن شىعىپ, بىردەن بالاباقشانىڭ قابىلداۋ بولىمىنە تارتىپتى» دەيدى.
جارمەڭكە بارىسىندا جۇمىس ىزدەپ كەلگەن 1386 ادام تىركەلدى. شارا قورىتىندىسى بويىنشا 75 ادام جۇمىسقا ورنالاستىرىلدى.
ايتا كەتەيىك, جىل باسىنان بەرى استانا قالاسى اكىمدىگىنىڭ جۇمىسپەن قامتۋ ورتالىعىنا جۇگىنگەن 4810 استانالىقتىڭ تەڭ جارتىسى ەڭبەكپەن قامتىلدى. 63-ءى الەۋمەتتىك جۇمىس ورىندارىنا, 220 تۇلەك «جاستار تاجىريبەسىنە» جىبەرىلدى, 919 ادام قوعامدىق جۇمىستارعا قاتىسسا, 307 ازامات قايتا وقىتۋ كۋرستارىنان ءوتىپ ءجۇر.
ءمادينا جاقىپ
