Auqymdy ekologiialyq aksiiasy aiasynda Astanada äl-Farabi eskertkışınıŋ aumaǧy abattandyryldy, dep habarlaidy astana-akshamy.kz
Memleket basşysynyŋ tapsyrmasy aiasynda respublika boiynşa «Taza Qazaqstan: Astana – tazalyq pen tärtıptıŋ ülgısı» auqymdy ekologiialyq aksiiasy ötıp jatyr. Bügın atalǧan ıs-şara barysynda Äl-Farabi atyndaǧy Oquşylar saraiynyŋ maŋaiy men ǧūlama ǧalymnyŋ eskertkışınıŋ ainalasy tazartylyp, abattandyryldy, dep habarlaidy elorda äkımdıgınıŋ resmi saity.
Astanada 117 eskertkış bar, onyŋ 46-sy memlekettık qorǧauǧa alynǧan. Olardyŋ üşeuı respublikalyq, qalǧan 44-ı qala deŋgeiınde, iaǧni jergılıktı maŋyzy bar eskertkışter bolyp sanalady. Aksiia bastalǧaly künıne 7-8 eskertkıştıŋ maŋaiyn qoqystan tazartyp, qalypqa keltıru josparlanǧan.
Bügıngı ekologiialyq aksiiaǧa Äl-Farabi atyndaǧy Oquşylar saraiy men Jastar saraiynyŋ 80-ge juyq qyzmetkerı qatysty. Olar eskertkış maŋaiy men ǧimarattyŋ ainalasyn sypyryp, qoqystardy jinady.
Aksiiaǧa qatysqan Äigerım Jienbaeva mūndai şaralardan eşqaşan şet qalmaitynyn aitty.
«Senbılık bolsyn, basqa da būqaralyq şaralar bolsyn ärdaiym belsendı qatysyp jüremın. Bügıngı aksiiaǧa keremet köŋıl-küimen keldık. Qala tūrǧyny retınde tūryp jatqan jerımızdıŋ tazalyǧyna, rettılıgıne üles qosyp jatyrmyn dep esepteimın. Aldaǧy tazalyq şaralaryna da mındettı türde qatysamyn», – dedı ol.
Astana qalasy äkımdıgınıŋ «Bırlesken mūrajailar direksiiasy» MKQK direktorynyŋ orynbasary Samat Tergembaevtyŋ aituynşa, aksiiaǧa qatysuşylar belgılengen oryndardy qoqystan tazartady. Al eskertkışterdı juumen tek arnaiy mamandar ainalysady. Öitkenı eskertkışterdı kütıp ūstaudyŋ, juudyŋ tärtıbı bar, ärı himiialyq zattardy qoldanudyŋ erekşelıkterı eskerıluı tiıs.
«Eskertkışter erekşe kütımdı qajet etedı, olardy sumen, basqa da himiialyq reaktivtı zattarmen juuǧa bolmaidy. Eskertkış jasalǧan materialdy qaraimyz. Mysaly, Äl-Farabi müsını mys aralas qoladan jasalǧan. Sondyqtan ony tek balauyzben tazartamyz. Şaŋ-tozaŋ qonbauy üşın mai da jaqpaidy. Ädette köktem men küzde mamandar eskertkışke balauyz jaǧyp, tiıstı şaralardy atqarady. Osyndai aksiialardy paidalanyp, qatysuşylarǧa eskertkıştıŋ tarihy jäne ony mamandar qalai kütıp ūstaityny turaly da aitylady. Ärı būl qasiettı oryn ekenın, oǧan qūrmetpen qarau qajettıgın tüsındıremız. Tazalyq aksiiasyna kelgen är adam üiıne oralǧanda elordamyzda osyndai körıktı oryndar bar ekenın, onyŋ mänı men maŋyzy turaly aityp jürse deimın», – dedı Samat Tergembaev.
Esterıŋızge salsaq, būǧan deiın «Taza Qazaqstan: Astana – tazalyq pen tärtıptıŋ ülgısı» aksiiasyna deputattar, şaǧyn jäne orta biznes subektılerı, ekınşı deŋgeilı bank qyzmetkerlerı , oqu oryndary studentterı, erıktıler men qala tazalyǧyna bei-jai qaramaityn azamattar qatysqan bolatyn.
Astanada auqymdy ekologiialyq nauqan jalǧasuda. Ol bes aptaǧa sozylady, olardyŋ ärqaisysy belgılı bır taqyrypqa arnalǧan. Būl apta «Kielı meken» dep atalady.
«Jasyl aimaq» dep atalatyn üşınşı apta aǧaş otyrǧyzu men köşetterdı äkteuge arnalady.
4 mamyrǧa deiıngı uaqyt – «Önegelı ūrpaq» dep atalady. Būl aptalyq ardagerler tūratyn aulalar men qarttar üiınıŋ aumaǧyn tazalauǧa jäne abattandyruǧa arnalǧan.
«Möldır būlaq» dep atalatyn soŋǧy besınşı aptada özen-kölderdıŋ maŋaiy qoqystan tazartylady.
