Keşe Astana qalasy äkımdıgınıŋ janyndaǧy äielder ısterı jäne otbasylyq-demografiialyq saiasat jönındegı komissiiasynyŋ müşelerı «Zorlyq-zombylyqsyz 16 kün» nauqany aiasynda «Ana üiı» qoǧamdyq qory ortalyǧyna baryp, meiırımdılık şarasyn ötkızdı.
Is-şarany ūiymdastyruşylardyŋ aituynşa, būl üi bekerden-beker taŋdalǧan joq. Mūnda kışkentai balalary bar 7 jas ana tūrady. Komissiia müşelerı olardyŋ jaǧdaiyn sūrap, aqyl-keŋes berıp, syilyq ūsyndy. Sonymen qatar jas analarmen tūrmystyq zorlyq-zombylyqpen küresu şaralary men şarttary, sondai-aq ana bolu baqyty turaly äŋgımelestı.
– Sızder anasyzdar, qūşaǧyŋyzdaǧy balalar – sızge amanat. Ol – sızdıŋ qūşaǧyŋyzdaǧy baqyt. Ortalyqtan şyqqannan keiın qandai qiyndyq körseŋızder de, balalardyŋ aman-esen erjetuı öte maŋyzdy. Eger bızden qandai da bır kömek qajet bolsa, bız qol ūşyn beruge daiynbyz, – dedı äielder ısterı jäne otbasylyq-demografiialyq saiasat jönındegı komissiia töraǧasynyŋ orynbasary Nazgül Maqjan.
«Ana üiı» ortalyǧynyŋ ırgetasy 2013 jyly qalanǧan. Būl ortalyqta ömırlık jaǧdaiǧa bailanysty balalaryn tastap kete jazdaǧan, oida joqta aiaǧy auyr bolyp, taǧdyry tälkekke tüsken jas analarǧa kömek körsetıledı. Olar osy ortalyqta jarty jyl tūryp, psihologiialyq jaǧynan kömek alady, ortalyqtan şyqqannan keiın ömır süruge qajettı mamandyqtardy üirenedı. Tegın, aqşa tölemeidı. Ortalyq qoǧamdaǧy qaltaly, qaiyrymdy azamattardyŋ kömegımen qarjylandyrylady. Qazır bas şaharda «Ana üiınıŋ» 2 filialy bar. On jyldan berı būl ortalyqtan 500-ge juyq jas ana qajettı kömek alǧan.
