Adam balasynyŋ boiynan tek jaqsyny körumen ǧana tynbai, özi de ainalasyndaǧylarǧa izgilik nūryn seuip, jaqsylyq jasauǧa daiyn tūratyn jandar bolady. Astanalyq Äpriza Qūsaiynqyzy solardyŋ qatarynan.
Negizi, Astananyŋ baiyrǧy tūrǧyndary Äprizany jaqsy tanidy. Öitkeni, ol – osy jerdiŋ tumasy. Qyzmet babymen, basqa da maqsattarmen elordaǧa bertinde kelgen köpşilikke de onyŋ esimi taŋsyq emes. Sebebi, ol ünemi qalanyŋ mädeni ömirine qatysty oqiǧalardyŋ basy-qasynda jüredi. Sondyqtan, būl qalada Äprizany tanymaityn adam kemde-kem. Degenmen, maǧynaly ǧūmyryn mädeniet salasynda eŋbek etuge arnaǧan adamnyŋ ömirin, jürip ötken jolyn bilmeitinder de bar şyǧar degen nietpen onyŋ önegeli isterine az-kem toqtalǧandy jön kördik.
Ūstazdardyŋ otbasynda tärbielengen qyz jasynan alǧyr bolyp ösedi. Alǧaşqy eŋbek jolyn bastauyş synyptarynda mūǧalim bolyp qyzmet etuden bastaǧan ol köp uaqyt ötpei-aq, belsendiligimen közge tüsedi. Söitip, sol kezeŋderdegi pioner, komsomol ūiymdaryna jetekşilik etedi. Keiinnen Selinograd audandyq komsomol komitetiniŋ hatşysy, Selinograd oblystyq komsomol komitetiniŋ mädeniet jūmystaryn nasihattau salasynda eŋbek etedi. Būdan keiin audandyq partiia komitetiniŋ ügit-nasihat böliminiŋ meŋgeruşisi mindetin abyroimen atqar-ǧan Äpriza Qūsaiynqyzy elimizde ekonomikalyq aiaqtan tūru dep tanylǧan 1990 jyldardyŋ bas kezeŋinde qalalyq mädeniet böliminiŋ jetekşisi qyzmetine taǧaiyndalady. Osy salany basqara jürip, el üşin eŋ jauapty, auyr kezeŋderde ruhani salanyŋ qūldyrap ketpeuin qadaǧalap, kitaphanalardaǧy kitap qorynyŋ saqtaluy men tolyqtyryluyn, kitaphana jelisindegi materialdyq-tehnikalyq bazanyŋ nyǧaiuyna üles qosty.
1992 jyldan beri qalamyzda elorda küni şeŋberinde ötkizilip jürgen dästürli folklorlyq-etnografiialyq «Qymyzmūryndyq» merekesin ūiymdastyruşylardyŋ biri de – osy apamyz. Būl şaraǧa Elbasynyŋ özi qatysyp, kezinde ülken baǧa bergeni bar.
Araǧa alty jyl salyp Äpriza Qūsaiynqyzy «İspat-karmet» mekemesimen birlese otyryp, qalalyq mädeniet saiabaǧynyŋ aşyluyna mūryndyq boldy. Küni büginge deiin halyq igiligi üşin qyzmet etip kele jatqan Mä-deniet jäne demalys saiabaǧynyŋ direktory qyzmetin atqara jürip, ol qala köleminde ūiymdastyrylatyn qoǧamdyq jūmystardan da qol üzgen joq.
1997 jyly respublikalyq mädeniet qyzmetkerleriniŋ käsibi biliktiligin arttyru institutyn «ekonomist-menedjer» mamandyǧy boiynşa bitirip şyqqan Äpriza Qūsaiynqyzy 2001jyldan bastap Qazaqstan Respublikasynyŋ «IýNESKO» jäne «İSESKO» ūlttyq komissiiasynyŋ qūrmetti müşesi, Resei Federasiiasynyŋ Halyqaralyq psihologiialyq ǧylym akademiiasynyŋ qūrmetti müşesi, «Astana-Bäiterek» äielder klubynyŋ vise-prezidenti, «Nūr Otan» partiiasynyŋ müşesi. Elordadaǧy M.Gorkii atyndaǧy orys drama teatrynyŋ direktory qyzmetine taǧaiyndalǧan kezeŋde de ol öziniŋ qandai iste bolmasyn ūiymdastyruşylyǧymen erekşelenetindigin körsete bildi. Sol kezde teatr alǧaş ret Mäskeu, Mordoviia, Sankt-Peterburg, İspaniia jäne Qazaqstan aumaǧyndaǧy Aqtau, Petropavl, Qyzylorda, Qaraǧandy jäne t.b. qalalarǧa birqatar gastroldik saparlarǧa şyqty. «Aljir» mūra-jaiynyŋ direktory bolyp qyzmet atqardy.
– Qazaq äieli qaşannan qasterli. Olar osy künde otbasy berekesin saqtaumen birge el täuelsizdiginiŋ nyǧaiuyna da sübeli üles qosyp keledi. Ūlan-ǧaiyr dalada ūrpaq maqtanyşyna ainalǧan talai ūlaǧatty analar ötkeni belgili. El men erge syn bolǧan kezeŋde äielder qoǧam jügin qaiyspai kötere bildi. Älemdegi äsemdik pen sūlulyq äiel körki men ana meiiriminen när alatyny da sondyqtan bolar, – deidi Ä.Qūsaiynqyzy.
Rasynda adamzat ömiriniŋ irgetasy äiel qolymen qalanatynyn eskersek, tirşiliktiŋ şyraiy da, otbasynyŋ şyraǧy da – äiel qolynda. Osy qaǧidany berik ūstanǧan Ä.Qūsaiynqyzy otbasynda süiikti jar, eki ūlyna ardaqty ana, nemerelerine aiauly äje atanyp otyr. Qala köleminde qaiyrymdylyq şaralar ötkizudi de dästürge ainaldyrǧan ol būl künde Astanadaǧy Beibitşilik jäne kelisim saraiynyŋ işinen aşylǧan türik muzeiiniŋ direktory qyzmetin atqaryp jür.
Gülbarşyn ÖKEŞQYZY
