Keşe elordalyq jūrtşylyq äkımdıkte IPO halyqtyq baǧdarlamasyna bailanysty keŋeitılgen mälımet aldy. Mūndai mümkındıktı äkımdık öz tarapynan ūiymdastyryp, qala aktivı arasynda da osy baǧdarlamaǧa qatysuǧa jol aşyq ekendıgın körsettı. Jinalǧan qauym arasynda mektepterdıŋ, JOO-nyŋ, kolledjderdıŋ, balabaqşalardyŋ qyzmetkerlerı jäne BAQ ökılderı boldy.
Aqordada Elbasy Nūrsūltan Nazarbaev elımızge resmi saparmen kelgen Koreia Respublikasynyŋ prezidentı Li Mion Bakpen kezdestı. Qos taraptyŋ jüzdesuı ekı el arasyndaǧy yntymaqtastyqty odan ärı arttyratyn kelıssözderge ūiytqy boldy.
Biyl elımızdıŋ Oŋtüstık Koreia Respublikasymen diplomatiialyq bailanys ornatqanyna 20 jyl tolyp otyr. Osy uaqyt aralyǧynda Qazaqstan men Koreianyŋ özara yntymaqtasyǧy artpasa, kemıgen joq. Ekı el basşysynyŋ soŋǧy tört jyl ışınde jetı ret kezdesuı – sonyŋ aiqyn dälelı bolsa kerek.
Elımız ben Koreianyŋ tauar ainalymy byltyr 900 million dollardy qūraǧan. Osy jyldyŋ alǧaşqy jartyjyldyǧynyŋ özınde ol 600 million dollardan, al bırlesken ıskerlık jobalar boiynşa oŋtüstıkkoreialyq investisiialyq qorjyny 8 milliard dollardan asqan. Olardyŋ ışındegı ırısı – Balqaş jylu elektr stansasy.
Ärıptestıkke ärqaşan äzır ekendıgın baiqatqan qos tarap kezdesude būǧan deiıngı özara saparlar barysynda qol jetkızgen kelısımderdıŋ oryndaluy men nätijelerıne barlau jasap qana qoimai, halyqaralyq kün tärtıbın, sauda-ekonomikalyq, investisiialyq, ǧylymi-tehnologiialyq, mädeni-gumanitarlyq, energetika, turizm men auyl şaruaşylyǧy salalaryndaǧy qarym-qatynas mäselelerın keŋınen talqylady. Sondai-aq, ekı jaqtyŋ alys-berısın keleşekte de jandandyrudy niet etken Qazaqstan men Koreia osy sapar aiasynda şaǧyn jäne orta biznes aiasyndaǧy bailanysty nyǧaituǧa, Nazarbaev universitetı janynan qūrylatyn ǧylymi-tehnikalyq park jobasyn jüzege asyruǧa, temırjol salasynda joǧary jyldamdyqta jüitkitın poiyzdar öndırısı töŋıregınde bailamdar jasasty.
Äsırese, symsyz internettı oilap tapqan koreialyqtardyŋ ozyq aqparattyq tehnologiiasy qazaq halqy üşın asa maŋyzdy ekenı tüsınıktı. Būl turaly jurnalisterge arnalǧan brifingte aitqan Elbasy Nūrsūltan Nazarbaev:
– Oŋtüstık Koreia medisina, farmasevtika salasynda ozyq tehnologiiaǧa ie. Özderıŋız bılesızder, Almatyda oŋtüstıkkoreialyq därıgerlerdıŋ kömegımen bır adamǧa ekı organdy auystyryp salu boiynşa operasiia jasaldy. Mūndai tehnologiia elımızge zor paida äkelgen bolar edı, – dep atap körsettı.
Kezdesu barysynda taraptar keleşekte de strategiialyq serıktestıktı odan ärı nyǧaita tüsetınıne senım bıldırdı.
Sol künı Memleket basşysy Nūrsūltan Nazarbaev pen Koreia Respublikasynyŋ prezidentı Li Mion Bak Balqaş JES qūrylysyn ıske qosuǧa arnalǧan saltanatty räsımge qatysty.
Elımız üşın maŋyzdy strategiialyq mänge ie būl joba elektr energiiasyn qosymşa köbeituge mümkındık berıp, onyŋ tapşylyǧyn tömendetetın bolady.
«Balqaş» jylu energiia stansasynyŋ qūrylysyn salu kezınde 3,5 myŋ jūmys orny aşylady dep kütılıp otyr. Al joba ıske qosylǧannan keiın 900 adam jūmyspen qamtylmaq.
Qymbat NŪRǦALİ
