Şeneunıkterdıŋ jūmys kabinetın toruyldap, tabaldyryǧyn tozdyryp, jūrtşylyqtyŋ ärı-berı sabylmauy üşın memlekettık qyzmet körsetu järmeŋkesı elordada dästürlı türde ötkızılıp keledı. Osyndai igı şara keşe «Han şatyr» SOS ortalyǧynda öttı.
Järmeŋkede Jūmyspen qamtu jäne äleumettık qorǧau basqarmasy men Ädılet departamentınıŋ, «Azamattarǧa arnalǧan ükımet» memlekettık korporasiiasynyŋ, Esıl audany memlekettık kırıster basqarmasynyŋ jäne basqa da memlekettık mekemelerdıŋ mamandary tūrǧyndarǧa äleumettık kömek pen tūrǧyn üi, jer qatynastary, salyq jeŋıldıkterı tūrǧysynda keŋes berıp, qyzmet körsettı.
– Byltyr osyndai 12 järmeŋke ötkızıldı. Onda şamamen 600 adamǧa qyzmet körsetıldı. Jaqynda mūndai şara «Astanalyq bazary» men «Şapaǧat» sauda üilerınde de öttı. Kelesı järmeŋke säuır aiynda ūiymdastyrylady, – dedı QR Memlekettık qyzmet ısterı jäne sybailas jemqorlyqqa qarsy ıs-qimyl Agenttıgınıŋ Astana qalasy boiynşa Departament basşysy Jazira Jylqyşieva.
