Astana qalalyq Ardagerler ortalyǧynda jurnalist, jazuşy, halyqaralyq «Alaş» ädebi syilyǧynyŋ laureaty Örıs Iаşükırqyzynyŋ 75 jas mereitoiyna orai qalamgermen kezdesu men är janrdaǧy şyǧarmalaryn qamtyǧan tört tomdyǧynyŋ tanystyrylymy öttı. Kezdesude qalamgerdıŋ ömır jolyna şolu jasaldy.
Örıs Iаşükırqyzy – Qazaq memlekettık universitetı jurnalistika fakultetınıŋ tülegı. Eŋbek jolyn Almaty oblysy Şelek audandyq «Eŋbek tuy» gazetınen bastady. Özı tuyp-ösken Qyzylorda oblysy Syrdariia audandyq «Syrdariia» gazetınde ädebi qyzmetker boldy. 21 jyl boiy Torǧai oblystyq teleradiokorporasiiasynda kommentator, telejurnalist bolyp eŋbektendı. «Astana aqşamy» basylymynda da qoltaŋbasy qaldy. Aqmola astanaǧa ainalǧanda, astanalyq gazettıŋ äleumettık sala bölımınıŋ meŋgeruşısı qyzmetın abyroimen atqardy. 10 jyl Mädeniet jäne aqparat ministrlıgı Aqparat jäne mūraǧat komitetınıŋ bas sarapşysy boldy. Osylaişa, jurnalistika salasynda üzbei 33 jyl, memlekettık qyzmette 12 jyl eŋbektendı. Jalpy eŋbek ötılı 45 jyldy qūraidy. Qai qyzmette jürse de şyǧarmaşylyq jūmyspen tynbai ainalysty. Sonyŋ jemısı – är jyldary memlekettık tapsyryspen şyqqan kıtaptary. Kıtaptarynyŋ arasynda osydan tura 30 jyl būryn «Qazaq tılı» qoǧamynyŋ «Qazaq äielderı» baǧdarlamasymen «Aina köŋıl», «Qaraşa qazdyŋ qaŋqyly», «Sekseuıldıŋ şoǧy» öleŋder jinaqtaryn atap ötuge bolady. Onyŋ öleŋderıne belgılı kompozitor Baqytjan Säuekenov bırneşe än jazdy.
Jaŋadan jaryq körgen tört tomdyǧynda poeziia, proza, satira, detektiv janrlaryndaǧy şyǧarmalary toptastyrylǧan. «Jan saraiym – öleŋım» atty bırınşı tomynda öleŋderı, «Eskı qonystaǧy el» atty ekınşı tomynda proza şyǧarmalary, «Ūşyq pen pūşyq» atty üşınşı tomynda satiralary, al «Qūldyqtaǧy qylmys» atty törtınşı tomynda detektiv janryndaǧy tuyndylary jinaqtalǧan.
Kezdesude örısı keŋ qalamgerdıŋ jalpy şyǧarmaşylyǧy men şyǧarmalary turaly äŋgıme örbıp, avtormen sūhbat jürgızıldı. Öleŋderı oqylyp, «Esıl tolqyndary» halyq ardagerler ansamblınıŋ oryndauynda äsem änder äueledı. Is-şarany ūiymdastyruşy Astana qalasy Esıl audany äkımdıgı, Esıl audany ardagerler keŋesı jäne Esıl audandyq belsendı ūzaq ömır süru ortalyǧy atynan mereitoi iesıne syi-qūrmet körsetıldı.
