Bırde Facebook-ten mynadai jarnamany oqydym: «Qarjy akademiiasynyŋ studentterıne Dinara Sätjan şeşendık önerden därıs oqidy» dep jazypty. Oilanyp qaldym. Dinara hanym ne şeşendık önerdı tereŋ zerttegen ǧalym, ne bügıngınıŋ has şeşenı bolsa, äŋgıme basqa. Menıŋşe, ol jerge Dinara emes, qazaqtyŋ şeşendık önerın jyldar boiy zerttep jürgen Serık Negimov, änşı, qoǧam qairatkerı Bekbolat Tıleuhan barsa jön bolar edı.
Qazır kımnıŋ şyn tūlǧa nemese tūlǧa emestıgın aiyra almaityn boldyq. Sebebı jasöspırımder men jastar ömırdegı emes, Instagram-daǧy «tūlǧalarǧa» köbırek elıkteidı. Teledidar da şynaiy tūlǧadan görı estrada änşılerın körsetkendı qolai köredı. Halyqtyŋ aqşasyna kün köretın memlekettık telearnalar jalǧan qūndylyqtardy nasihattauda. Kün saiyn nasihat qūraldary jerdegı jūldyzdardyŋ ışıp-jegenın, jürıp-tūrǧanyn körsete bergen soŋ, balany qalai kınälaisyŋ?
Jastardyŋ denı Baian Esentaevany jazuşy, Dinara Sätjandy şeşen dep oilaidy. Bälkım, olar öz ömırınen kıtap jazyp, jūrtqa auzynyŋ suy qūryp äŋgımeleitın şyǧar. Bıraq ärkımge «jazuşy» degen sözdı tırkei beru dūrys pa? Ärkım öz ornynda otyruy kerek. Al bügın ekınıŋ bırı – jazuşy ne tūlǧa, saiasatker nemese qairatker. Olardyŋ barlyǧy ūltqa qyzmet etıp jür me? Mäsele – sonda.
Menıŋşe, ūltty dūrys jolǧa baǧyttaityn tūlǧa, ziialy qairatker özınıŋ qoǧamda önegelı ömırımen, aitqan sözderımen, jazǧan kıtaptarymen, ıstegen ısterımen jas ūrpaqqa ülgı boluy tiıs. Sonda olardy halyqtyŋ özı tūlǧa dep tanidy. Mysaly, Alaş ardaqtylary özderın tūlǧa, qairatker dep sanaǧan joq. Özderı taŋdaǧan mamandyqqa, memlekettık müddege ömırın arnady. Ūlttyŋ keleşegı üşın basyn qaterge tıktı. Söitıp kelte ǧūmyrynda elıne paidasyn tigızdı. Sondyqtan şyn tūlǧany tanu, moiyndau degendı eşqaşan esımızden şyǧarmaǧanymyz abzal.
