Ūly Otan soǧysynyŋ maidangerı Jandarbek Kärbekov on jetı jasynda-aq maidanǧa sūranǧan edı.
Aqmola oblysynyŋ Qorǧaljyn audanyna qarasty Sonaly auylynan attanǧan jap-jas jıgıt aldymen Aşhabad qalasyndaǧy snaiperler mektebınde oqidy. On segız jasqa tolysymen soǧysqa kırısedı. Maidandaǧy joryǧy ataqty 55-gvardiialyq diviziianyŋ Ekınşı Belorussiia maidanynda bastalady. Äskeri basşylyqtan bırneşe alǧys alǧan gvardiia aǧa serjanty Jandarbek Kärbekov Belorussiia, Batys Prussiia jäne Pribaltikanyŋ eldı mekenderın faşisterden azat etuge qatysady. Kennigsberg qalasy üşın bolǧan qiian-keskı ūrysta sol qolynan jaralanady.
Qaisar mınezdı qazaq jauyngerınıŋ soǧys kezındegı eŋ bır este qalǧan oqiǧasy 1945 jyldyŋ 29 säuırı künı Şyǧys Prussiianyŋ «Kosy Friş Nerung» aimaǧyn basqynşylardan azat etu üşın bolǧan şaiqas eken. Ekı jaqtan artilleriia, minomet jäne pulemetten oq boraǧan atys barysynda vzvod komandirı auyr jaralanyp, basşylyq jasauǧa jaramai qalady. Osy taǧdyrly tūsta Jandarbek Kärbekov basşylyqty öz qolyna alyp, vzvod jauyngerlerın şabuylǧa bastaidy.
Sol qyrǧynda 27 faşistıŋ közı joiylady. Jandarbektıŋ özı jau jasyrynǧan blindajdy granatamen jairatady. Osy şaiqastaǧy erlıgı üşın Jandarbek Kärbekovtyŋ keudesıne 1945 jyly 9 mamyr künı «Qyzyl Jūldyz» ordenı qadalady.
Keudesınde orden-medaldary jarqyrap elge oralǧan Jandarbek Qaidauylūly eŋbek maidanynda da maitalman atandy. Ūzaq jyldar Qorǧaljyn audanynyŋ şaruaşylyqtarynda, Krasnoznamen audanynyŋ Abai atyndaǧy keŋşarda zootehnik bolyp eŋbek ettı. Qūdai qosqan qosaǧy Dämejan ekeuı bes ūl, bes qyz tärbielep ösırdı. Ūldary ūiaǧa, qyzdary qiiaǧa qondy. Maidangerdıŋ äuletınen 21 nemere, 11 şöbere ördı. Bügınde olardyŋ bärı «Batyr Ana» atanǧan Dämejan äjelerınıŋ äldiımen terbelıp, adamzatqa beibıt ömır syilaǧan Ūly Jeŋıske üles qosqan Jandarbektei jauynger atalarynyŋ ruhyna taǧzym etıp jür.
Ǧalym QOJABEKOV
