ەلورداداعى دوستىق ءۇيى – قازاقستان حالقى اسسامبلەياسىنىڭ ايناسى. قازاقستاننىڭ بارلىق ەتنوستارىن بىرىكتىرەتىن ورتاق ءۇي ەلوردانىڭ ەڭ كەڭ داڭعىلدارىنىڭ ءبىرى – باۋىرجان مومىشۇلىنىڭ بويىندا ورنالاسقان. استانانىڭ «جەرۇيىق» ساياباعىنا قاراما-قارسى «ساۋكەلە» ىسپەتتەس, ەرەكشە كوزتارتارلىق ساۋلەتى جاراسقان ءۇش قاباتتى عيمارات 4 مىڭ شارشى مەتر كەڭ اۋماقتى الىپ جاتىر. ىنتىماق پەن بىرلىكتىڭ ۇياسى سانالاتىن مەكەمە جۇمىسىمەن تانىسۋ ءۇشىن ءبىز دوستىق ۇيىنە ارنايى باردىق.
باس قالانىڭ 20 جىلدىعىنا وراي دوستىق ءۇيىن ماڭعىستاۋ وبلىسى سىيعا تارتقان ەدى. 2018 جىلدىڭ شىلدە ايىنان ءوز جۇمىسىن باستاعان دوستىق ۇيىندە بۇگىندە 23 ەتنومادەني بىرلەستىك, 11 جاستار قاناتى, عىلىمي-ساراپتامالىق توپ, اقساقالدار كەڭەسى, انالار كەڭەسى, «اسسامبلەيا جاستارى» ۇيىمىنىڭ قالالىق شتابى, «جىر ورتالىعى», «پاراسات» قايىرىمدىلىق قىزمەتىن ۇيلەستىرۋ ورتالىعى, «انالار اماناتى» قولونەر شىعارماشىلىعى ورتالىعى, «مامىلە» قازاق ءتىلى كلۋبى توپتاستىرىلعان. سونداي-اق مۇندا 56 شىعارماشىلىق ۇجىم بەلسەندى قىزمەت ەتەدى. 2019 جىلى ولاردىڭ بەسەۋى – «چەن ريۋ» كورەي حورى, «رازدولە» ورىس ءانسامبلى, ن.ليتوشكو اتىنداعى ۋكراين حورى, «ۆايناح» شەشەن-ينگۋش ءانسامبلى, «دۋسلىك» تاتار-باشقۇرت ءانسامبلى «حالىقتىق» اتاعىن الدى.
عيماراتقا كىرگەن بويدا «انالار اماناتى» كورمە-زالىنا بەتتەدىك. ۇلتتىق قۇندىلىقتارىمىزدى دارىپتەيتىن زالدا قويىلعان قوس ىشەكتى دومبىرا, تورسىق, دوربا, ماساتىدان قۇراقتالعان كورپەلەر ءار كەلۋشىنىڭ كوز جاۋىن الارى ءسوزسىز. بۇل زالدىڭ سىرتقى كەلبەتى كيىز ۇيگە ۇقساۋىنىڭ وزىندە دە ءمان بار. سەبەبى ەكىنشى قاباتتا وزگە دياسپورلاردىڭ كابينەتى ورنالاسىپ, وسىلايشا ۇلت وكىلدەرىنىڭ ءبارى ءبىر شاڭىراق استىندا – دوستىق ۇيىندە باس قوسقان. اسەم سارايدىڭ ءتىرى تابيعات بۇرىشىنداعى جايىلا وسكەن وسىمدىكتەر, ءبىر قاراعاندا, عاجايىپ ەرتەگى سارايىن ەلەستەتەدى. ءبىرىنشى قاباتتا سونداي-اق ءماجىلىس زالى, بي زالى, ستۋديا, كىتاپحانا, مەدياتسيا كابينەتى ورنالاسسا, ەكىنشى قاباتىندا كونفەرەنتسيا زالى مەن ەتنومادەني بىرلەستىكتەرگە ارنالعان كابينەتتەر بار. كونفەرەنتسيا زالى كوپشىلىك اراسىندا جاقسى تانىلعان, سەبەبى مۇندا كۇن سايىن ءتۇرلى تاقىرىپتاعى دوڭگەلەك ۇستەلدەر تۇراقتى تۇردە وتكىزىلەدى.
ال ءاربىر ەتنومادەني بىرلەستىكتىڭ كابينەتىندە ءار حالىققا ءتان وزىندىك رۋح سەزىلەدى. قويىلعان جيھاز بەن زاتتاردىڭ بەزەندىرىلۋى ارقىلى بەلگىلى ەتنوستىڭ تاريحى, مادەنيەتى مەن ءداستۇرى سىر شەرتىپ تۇر. ماسەلەن, ءبىز كورەي ەتنومادەني بىرلەستىگىنە باس سوعىپ, كورەيلەر مادەنيەتىن شولىپ شىققانداي بولدىق. ءبىزدى مۇندا ەتنومادەني بىرلەستىكتىڭ وقىتۋشىسى سۆەتلانا تەن جىلى قاباق تانىتىپ, قۇشاق جايا قارسى الدى. سوزىنشە, دوستىق ءۇيى – كەز كەلگەن ۋاقىتتا كەلۋگە ەسىگى ايقارا اشىق مەكەمە.
– كەلۋشىلەر مۇندا تەك ساباق وتكىزىپ قانا قويماي, جاي سىرلاسۋعا, پىكىر الماسۋعا, وزگە ۇلتتىڭ مادەنيەتىمەن تانىسۋعا كەلەدى. مۋزىكا, ۇلتتىق بي جانە كورەي ءتىلى بويىنشا ساباقتار وتكىزىلەدى. قازىردە 60 جاسقا دەيىنگى قاتىسۋشىلار توپتارعا ءبولىنىپ, كورەي ۇلتتىق ءبيىن ۇيرەنىپ ءجۇر. ولاردىڭ اراسىندا ەڭ كىشىسى – 5 جاستا, – دەدى س.تەن.
ەلورداداعى اسسامبلەيا ورتالىعى ءتۇرلى قالالىق قۇرىلىمدارمەن تىعىز بايلانىس ورناتىپ, قوعامدىق كەلىسىمدى ساقتاۋ جونىندە ءوزارا قارىم-قاتىناس ورناتقان. ايماقتارداعى قۇرىلىمدار ءۇشىن ۇلگىلىك ستاندارت بولاتىن دامۋ باعدارلاماسىن دا بەكىتتى. ونىڭ بولىمدەرىنىڭ ءبىرى – استانالىق قحا-نىڭ نەگىزگى رەسۋرسىنا اينالعان دوستىق ءۇيىنىڭ قىزمەتىنە ارنالادى. دوستىق ۇيىندە دوڭگەلەك ۇستەلدەر مەن كونتسەرتتىك باعدارلامالاردان باسقا الەۋمەتتىك قولداۋ, جاستارعا پاتريوتتىق تاربيە بەرۋ, ەتنوستاردىڭ مادەنيەتى مەن داستۇرلەرىن ساقتاۋعا باعىتتالعان ءىس-شارالار تۇراقتى تۇردە وتكىزىلىپ تۇرادى. انالار كەڭەسىندە تەگىن قىزمەت كورسەتەتىن ءتۇرلى كلۋبتار جۇمىس ىستەيدى. ولاردىڭ قاتارىندا «قازاق سالت-ءداستۇرىنىڭ قولونەرى» كلۋبى, «Fitness Gold» كلۋبى, الەم مەشىتتەرىن تىگۋ كلۋبى, توعىزقۇمالاق ويىنىنا ۇيرەتۋ كلۋبى, ات سپورتى كلۋبى بار. عيماراتتىڭ ەكىنشى قاباتىندا انك-Live تىكەلەي ەفير ستۋدياسى ورنالاسىپ, ءدال وسى جەردە ونلاين-بريفينگتەر وتكىزىلەدى. ستۋديا تولىعىمەن جاڭاشىل تەحنيكامەن جابدىقتالعان.
دوستىق ءۇيىنىڭ جۇمىسىمەن تولىعىراق استانا قالاسى اكىمدىگىنىڭ جانىنداعى «قوعامدىق كەلىسىم» كمم باسشىسى ءادىلحايىر مىرزاحانوۆ تانىستىردى.
– ەلوردالىق قازاقستان حالقى اسسامبلەياسىنىڭ الەۋەتىن دامىتۋ ماقساتىندا دوستىق ءۇيى قۇرىلىپ, قازىردە رەسۋرستىق جانە اقپاراتتىق-ادىستەمەلىك ورتالىققا اينالدى. دوستىق ۇيىندە تاتۋلاستىق, بەيبىتشىلىك پەن كەلىسىمدى ناسيحاتتايتىن ءارتۇرلى ءىس-شارالار جۇزەگە اسىرىلادى. جىل باسىنان بەرى 50-گە جۋىق حالىقارالىق, رەسپۋبليكالىق جانە قالالىق دەڭگەيدەگى ءتۇرلى باعىتتاعى ءىس-شارالار ءوتتى. ولاردىڭ ىشىندەگى اتاۋلىلارىن ايتساق, سلاۆيان حالقىنىڭ «ماسلەنيتسا» مەرەكەسى, شىعىس حالقىنىڭ ناۋرىز مەرەكەسى, العىس ايتۋ كۇنى سەكىلدى ماڭىزدى مەيرامدار ەلەۋسىز قالماي, دۋمانداتىپ تويلاندى, – دەدى ول.
مەكەمە باسشىسىنىڭ ايتۋىنشا, ەلوردالىق قازاقستان حالقى اسسامبلەياسىنىڭ نەگىزگى قىزمەت باعىتتارىنىڭ ءبىرى ءارى ماڭىزدىسى – قايىرىمدىلىق كورسەتۋ. 2021-2022 جىلى جالپى سوماسى 70 ميلليون تەڭگە كولەمىندە قايىرىمدىلىققا باعىتتالعان ءىس-شارالار ءوتتى. «پاراسات» قايىرىمدىلىق قىزمەتىن ۇيلەستىرۋ ورتالىعى قىزمەتى نەگىزىندە قوستاناي وڭىرىندە بولعان تابيعي اپات سالدارىنان زارداپ شەككەندەرگە 40 توننا گۋمانيتارلىق كومەك جىبەرىلدى.
قازاقستاننىڭ دامۋىنا, ءوز ورتاسىندا ازاماتتارىمىزدىڭ ءال-اۋقاتىنىڭ جاقسارۋىنا ۇلەس قوسىپ, ەڭبەگىمەن تانىلعان كوشباسشىلار, قوعامدا لايىقتى بەدەلگە يە بولعان وتانداستارىمىز دا مۇندا قىزمەت ەتەدى. ولاردىڭ باسىم بولىگى – ىنتاگەرلەر, ودان بولەك, ءوزىنىڭ نەگىزگى جۇمىسىمەن قاتار قوعامدىق نەگىزدە ەتنومادەني بىرلەستىكتەردى باسقارىپ, ءوز ارماندارىن جۇزەگە اسىراتىن بەلسەندى ازاماتتىق كوزقاراستاعى تۇلعالار. وعان قوسا ءوزىنىڭ قوعامدىق قىزمەتىمەن كوپكونفەسسيالى جانە كوپۇلتتى مەملەكەتىمىزدە جالپىۇلتتىق بىرلىگىمىز بەن كەلىسىمدى ساقتاۋعا مەيلىنشە ىقپال ەتەدى.
دوستىق ءۇيى جانىنداعى عىلىمي-ەكسپەرتتىك توپ – اسسامبلەيانىڭ كونسۋلتاتيۆتىك-اناليتيكالىق ورگانى. تۇراقتى تۇردە الەۋمەتتىك زەرتتەۋلەر جۇرگىزىپ, ەتنومادەني بىرلەستىكتەر مەن قالالىق اسسامبلەيانىڭ قىزمەتتەرىن زەرتتەۋگە نەگىزدەلگەن عىلىمي جۇمىستاردى جارىققا شىعارۋمەن اينالىسادى.
اسسامبلەيا نەگىزىندە انا ءتىلىن, مادەنيەتى مەن تاريحىن وقىپ-ۇيرەتەتىن 10 ەتنولينگۆيستيكالىق مەكتەپ جۇمىس ىستەيدى.
ءوز شاڭىراعىنىڭ استىنا كوپتەگەن ەتنومادەني بىرلەستىكتى جيناعان دوستىق ءۇيى – ءار مەرەكەدە قويان-قولتىق ارالاسىپ, ۇيىمداسا جونەلەتىن ەتنوس وكىلدەرىن ۇيىستىرىپ قانا قويماي, ولارعا ءبىر-ءبىرىنىڭ ءتىلىن, ءدىلىن, مادەنيەتىن ۇيرەتەتىن ورتالىق, شات-شادىمان ۇلتتار دوستىعىن پاش ەتەتىن بىرەگەي مەكەن.
