استانا اۋەجايىندا ماس جولاۋشى بىردەن ءۇش باپپەن اكىمشىلىك جاۋاپكەرشىلىككە تارتىلدى, دەپ حابارلايدى astana-akshamy.kz
وقيعا استانا – الماتى باعىتىنداعى اۋە رەيسىنىڭ جولاۋشىلارىن تەكسەرۋ كەزىندە بولدى.
الماتى قالاسىنىڭ 38 جاستاعى تۇرعىنى ماساڭ كۇيدە قوعامدىق ورىندا بالاعات سوزدەر ايتىپ, تەكسەرۋ قىزمەتى قىزمەتكەرلەرىنىڭ ەسكەرتۋلەرىنە قۇلاق اسپاعان. ءمان-جايدى انىقتاۋ بارىسىندا ەر ادام بيلىك وكىلدەرىنىڭ زاڭدى تالاپتارىن ورىنداماعان.
الايدا, قارسىلىق تانىتقانىنا قاراماستان, قۇقىق بۇزۋشى ۇستالىپ, پوليتسيا بولمەسىنە جەتكىزىلدى.
ۇستالعان ازامات الكوگولدىك ىشىمدىكتەردى ىشكەنى نەمەسە قوعامدىق ورىندارعا ماساڭ كۇيىندە كەلگەنى ءۇشىن, ۇساق بۇزاقىلىق جاساپ, قۇقىق قورعاۋ ورگانى قىزمەتكەرىنىڭ زاڭدى وكىمىنە نەمەسە تالابىنا باعىنباعانى ءۇشىن بىردەن ءۇش باپپەن اكىمشىلىك جاۋاپكەرشىلىككە تارتىلىپ, وعان 5 اەك مولشەرىندە ايىپپۇل سالىندى. ۇساق بۇزاقىلىق پەن باعىنباۋ بويىنشا ماتەريالدار شەشىم شىعارۋ ءۇشىن سوتقا جولداندى. ايتا كەتۋ كەرەك, بۇل قۇقىق بۇزۋشى بۇعان دەيىن ءبىر جىل ىشىندە ۇساق بۇزاقىلىق جاساعانى ءۇشىن اكىمشىلىك جاۋاپكەرشىلىككە تارتىلعان بولاتىن.
ەستەرىڭىزگە سالا كەتەيىك, جىل باسىنان بەرى كولىكتەگى پوليتسيا دەپارتامەنتىنىڭ قىزمەتكەرلەرى ءتۇرلى اكىمشىلىك قۇقىق بۇزۋشىلىقتار جاساعانى ءۇشىن 26 330 قۇقىق بۇزۋشىنى انىقتاپ, جاۋاپقا تارتقان بولاتىن. ونىڭ ىشىندە قوعامدىق ورىندارعا ماساڭ كۇيىندە كەلگەنى ءۇشىن – 1 992, ۇساق بۇزاقىلىق ءۇشىن – 219, قۇقىق قورعاۋ ورگانى قىزمەتكەرىنىڭ زاڭدى تالابىنا باعىنباعانى ءۇشىن – 23.
