ەلوردادا 1 ماۋسىم – حالىقارالىق بالالاردى قورعاۋ كۇنى بارلىق ءسان-سالتاناتىمەن اتالىپ ءوتتى. اسىرەسە, «الاۋ» مۇز ايدىنى سارايىندا وتكەن اۋقىمدى شارادا بالداي ءتاتتى بالدىرعاندارعا قىزىققا تولى سىي ۇسىندى.
حالقىمىز «بالا – باۋىر ەتىڭ» دەپ بەكەر ايتپاعان. كەيىنگى ۇرپاعىنا ۇلاعاتتى ءىز قالدىرۋدى مۇرات ەتكەن ۇلتىمىزدىڭ بولمىسىندا بوبەككە دەگەن مەيىرىمدىلىكتىڭ ورنى بولەك. سوندىقتان دا ايتۋلى مەرەكەگە اتالعان سپورت سارايىنىڭ ۇجىمى مۇقيات دايىندالعان. اسىرەسە, يگىلىكتى شاراعا قاتىسۋعا كەلگەن جەتكىنشەكتەردىڭ قاراسى مول. ءبىر تاراپتا بالالار روليكتەرىمەن ىزعىپ جۇرسە, كەلەسى بەتكەيدە شاعىن حوككەي الاڭىنداعى ويىن قىزا تۇسكەن. ەكىنشى لەكتە – ۇلتتىق ويىنداردىڭ باسەكەسى وتۋدە. ۇلتتىق كيىم كيگەن جاس ورەندەردىڭ ونەرلەرى دە ەشكىمدى بەي-جاي قالدىرمايدى. قايدا بۇرىلساڭ دا, بالالاردىڭ شات كۇلكىسى ساراي ءىشىن نۇرعا تولتىرىپ, عاجايىپ كۇيگە بولەيدى.
– بۇگىن ءبىز ءۇشىن ەرەكشە كۇن دەسەك بولادى. حالىقارالىق بالالاردى قورعاۋ كۇنىنە وراي ءتۇرلى سپورتتىق شارالار ۇيىمداستىرىپ وتىرمىز. وعان كەلۋشىلەر سانى اجەپتاۋىر. ەڭ باستىسى, بالعىندارعا ۇناسا بولدى. ايتالىق, قالالىق ءبىلىم باسقارماسىمەن بىرلەسە وتىرىپ, بالالاردىڭ جازعى دەمالىسىن قىزىقتى, تارتىمدى وتكىزۋلەرىنە جاعداي جاساماقشىمىز. ءبىزدىڭ سپورت سارايى جاز بويى بالالارعا ارناپ ءتۇرلى سپورتتىق شارالاردى ۇيىمداستىرماق. دەمەك, بالاعا كومپيۋتەر الدىندا سارىلىپ وتىرعاننان گورى, ءبىر ءسات سپورتپەن شۇعىلدانعاننىڭ پايداسى كوبىرەك ەكەنى راس. سوندىقتان, جازعى كانيكۋلدا جاسوسپىرىمدەرگە ەسىگىمىز اشىق. كىرۋ باعاسى دا قىمبات ەمەس. بار بولعانى – 500 تەڭگە. وسى تولەممەن بالالار جارتى كۇن بويى ەمىن-ەركىن ءتۇرلى سپورتتىق ويىندارمەن شۇعىلدانا الادى, – دەيدى «الاۋ» مۇز ايدىنى سارايىنىڭ ديرەكتورى نايل نۋروۆ.
ازامات ەسەنجول
