جۇمىسسىز جاتا بەرۋدەن جالىققان كوكەم ءبىر ورىن تاپتى. وعان ورنالاسايىن دەسە, اۋرۋ-سىرقاۋدان امان ەكەنىن ايعاقتايتىن مەديتسينالىق انىقتاما كەرەك. ال, ونى الۋ ءۇشىن ەمحانا ەسىكتەرىنىڭ بارىنە باس سۇعىپ شىقپاسا, بولمايدى. ەندى قايتپەك كەرەك؟!
ارينە, الدىن الا ءمورى باسىلىپ تۇرعان ءبىر جاپىراق قاعازعا كوزدى اشىپ-جۇمعانشا مەديك مامانداردىڭ «مۇباراك قولدارىن» قويدىرا سالاتىن مۇمكىندىك بار. استانانىڭ ستۋدەنتتىك ەمحاناسىندا. بىردەن بايان اتتى حانىمنىڭ «باياندى ءنومىرىن» تەرە باستادى. «تاااك… سەگىىىز… جەتى ءجۇز ءبىىىر… ءالوۋ, بۇگىن سروشنى انىقتاما الايىن دەپ ەدىم… ءاۋ؟.. ءساتىمجاننان الدىم ءنومىرىڭىزدى… ءيا, ءيا… ەكى مىڭ تەڭگە دەيسىز بە؟.. بولادى!.. احا… دا… محم… راحمەەەت, بايانجان!.. محم… قازىر-اق قۇستاي ۇشىپ جەتەمىن عوي!».
بار بولعانى وسى-اق! كوكەم توبەسىمەن كوك تىرەپ ءجۇر وسى كۇنى! باسىنىڭ ساقيناسى, كوزىنىڭ دابىلەنيەسى, تىزەسىنىڭ ءسال سىرقىراۋى بار دەمەسەڭ, قالتاسىندا – پورا-پورا اقشا! بىردە سول سىرقاتتارى ءبىر-اق كۇندە قاتارىنان مەڭدەپ, ۇيىنە جەدەل جاردەم شاقىرماسىنا قويمادى. «103»-ءتى تەرىپ كەپ جىبەردى, پاقىرىڭ! ارعى جاقتان كومپيۋتەر جاۋاپ بەرىپ جاتىر: «سالەمەتسىز بە؟ ءسىز جەدەل جاردەم بولىمىنە حابارلاستىڭىز. قازاق ءتىلىن تاڭداۋ ءۇشىن ءبىردى باسىڭىز…». «1» ءنومىرىن باستى. الگى تەحنيكالىق وڭدەۋ-جوندەۋدەن ءوتىپ, فونوگرامما جاساتىپ العان قوڭىر داۋىس قايتا سايرادى: «بۇل ءنومىر بويىنشا سويلەسۋ ازىرشە مۇمكىن ەمەس. ءنومىردى قايتا تەرۋ ءۇشىن توردى باسىڭىز نەمەسە وپەراتوردىڭ جاۋابىن كۇتە تۇرىڭىز». ەكى-ءۇش گۋدوكتان كەيىن كوپ كۇتتىرمەستەن ءبىر ايەلدىڭ داۋىسى شىقتى:
– اللو! سكورايا سلۋشاەت. چەم موگۋ پوموچ؟
– اللو! مەن قاتتى اۋىرىپ قالىپ ەدىم. قازىر جەدەل جاردەم جىبەرىڭىزدەرشى!
– يا ۆاس نە پونيمايۋ. گوۆوريتە پو رۋسسكي!
– يا جە كازاحسكي يازىك ۆىبرال…
– نۋ, گوۆوريتە پو رۋسسكي!
– كەتشى-ەي!
ترۋبكا تارس ەتە قالدى. ونى سابىرعا شاقىرا ءجۇرىپ, «تۇسىنىكتى تىلدە» قاتىنى حابارلاسقان جەدەل جاردەم جەدەل جەتپەدى. «پروبكادا تۇرىپ قالدىق» دەيدى. بەتى-اۋزىن تۇمشالاپ العان فەلدشەر (قىز با, كەلىنشەك پە, بىلمەدىم) ۋكول سالۋعا بولمايتىندىعىن العا تارتىپ, تەگىن كەڭەسىن تىڭداتۋدان باسقا ەشتەڭە دە ىستەگەن جوق. ول بەيباقتان مەديكتەن گورى ءتاپ-ءتاۋىر ءتاۋىپ شىعاتىن ءتارىزدى.
سونىمەن, كوكەم نە قىلدى دەيسىز عوي؟.. ستۋدەنتتىك ەمحانانىڭ ءنومىرىن ىزدەي باستادى:
– قوي, بايانعا ىزبانداپ, ءبالنيشنىي اشتىرتىپ الايىن ودان دا!..
ەركەعالي بەيسەنوۆ
