الداعى 9 اقپاندا قازاق پوەزياسىنىڭ مۇزبالاعى اتانعان مۇقاعالي ماقاتاەۆتىڭ تۋعانىنا 88 جىل تولادى. كوزى تىرىسىندە قاسيەتتى قارا ولەڭمەن تۋعان حالقىن الديلەپ وتكەن اقىننىڭ تۋعان كۇنى قازىر ۇلكەن مەرەكەگە اينالعان. ءتۇرلى مادەني ورىندار مەن مەكتەپتەردە ادەبي كەشتەر ۇيىمداستىرىلىپ, شايىردىڭ جىرلارى وقىلىپ, ونىڭ سوزىنە جازىلعان اندەر شىرقالادى. بۇگىندە ەلورداداعى ۇلتتىق مۋزەيدە اقىن تۇتىنعان ءبىراز زاتتار بار ەكەنىن ءبىلىپ, سولاردىڭ تاريحىنا توقتالۋدى ءجون كورىپ وتىرمىز.
بۇل جادىگەرلەردى باس مۇراجايعا «ۇلتتىق مۋزەيگە سىي تارتۋ» شاراسى اياسىندا اقىننىڭ كەلىنى, حالىقارالىق م.ماقاتاەۆ اتىنداعى قوردىڭ ءتورايىمى باقىتگۇل ايداروۆا تاپسىرعان. بىزگە بۇل مالىمەتتى مۋزەي قىزمەتكەرى ءلايلا نوعايبەكقىزى ايتتى.
ەندى ول قانداي جادىگەرلەر؟ سوعان توقتالايىق. الدىمەن كوزى تىرىسىندە اقىننىڭ ءوزى ساتىپ الىپ كيگەن كوستيۋم-شالباردى كورىپ, ءبىراز اينالشىقتاپ تۇرىپ قالدىق.
اعامىزدان قالعان تاعى ءبىر قىمبات جادىگەر – 1954 جىلى ماسكەۋدەن شىققان «رۋسسكو-كازاحسكي سلوۆار» جيناعى. بۇل سوزدىكتى ا.يسقاقوۆ, ح.ماحمۋدوۆ, ع.مۇساباەۆ دەگەن اۆتورلار جاساعان. اقىن وسى جيناقتى جانىنان قالدىرماعان دەيدى. سونداي-اق, تالانتتى تۇلعا شاي ىشكەن كەسە مەن سابى گۇلمەن ورنەكتەلگەن قاسىق تا كوزىمىزگە جىلى ۇشىرادى. تۇيىندەي كەلگەندە, ۇلتتىق مۋزەيگە جولىڭىز تۇسە قالسا, اقىننان قالعان جادىگەرلەردى بارىپ كورۋىڭىزگە بولادى.
