قر ۇلتتىق اكادەميالىق كىتاپحاناسىندا قازاقستاننىڭ حالىق جازۋشىسى, اقىن, اۋدارماشى, پۋبليتسيست حاميت ەرعاليەۆتى ەسكە الۋ كەشى ءوتتى. كەش قاسىم قايسەنوۆتىڭ قالامداسى حاميتكە ارناپ جازعان ولەڭ جولدارى بويىنشا «ومىردە دە, ونەردە دە قاھارمان» دەپ اتالدى. جيىندى اقىن, مەملەكەتتىك سىيلىقتىڭ يەگەرى نەسىپبەك ايتۇلى جۇرگىزدى.
حاميت ەرعاليەۆتى قاھارمان دەيتىنى, ول 1941-1945 جىلداردا سوعىسقا قاتىسقان. شىعارماشىلىعى ارقىلى قازاق حالقىنىڭ قازان توڭكەرىسىنەن كەيىنگى ءومىرىن, ۇلى وتان سوعىسى جىلدارىنداعى مايدان مەن تىلدىڭ بىرلىگىن, جاۋىنگەرلەردىڭ ەرلىگى مەن تىل ادامدارىنىڭ ەڭبەگىن, سوعىستان كەيىنگى حالىقتىڭ ءومىرىن قامتىعان. «اكە سىرى» پوەماسىندا كەڭەس زامانى ادامدارىنىڭ ۇلى وتان سوعىسى جىلدارىنداعى ەرەن ەرلىگىن, حالىقتىڭ بەيبىتشىلىك جولىنداعى جانقيارلىق كۇرەسىن جىرلادى.
جيىن ۇستىندە بەلگىلى ادەبيەت زەرتتەۋشىسى سەرىك نەگيموۆ ايتقانداي, ءبىرتۇتاس شىعارماشىلىعىنا ليريكا مەن ەپيكالىق جانردى قاتار سىيدىرعان قالامگەردىڭ قازاق ادەبيەتىنەن الار ورنى ايرىقشا. ونىڭ تۋىندىلارىنىڭ قاي-قايسىسىنان دا ۇلتتىق پاتريوتيزم, ازاماتتىق ۇستانىم, مىنەز بەن تالعام بيىكتىگى كورىنىپ تۇرادى.
قالامگەردىڭ ۇلى مۇرات حاميتۇلىنىڭ ءسوزى بويىنشا ەلورداداعى ۇلتتىق اكادەميالىق كىتاپحاناعا تۇلعانىڭ جەكە كىتاپحاناسىنداعى 1500-دەن استام كىتاپ تاپسىرىلعان. «اكەمنىڭ كىتاپحاناسى ءوزىنىڭ تالعامىنا ساي قۇرىلعان عوي. بىراق, بايقاساق, كەيبىرىن قاجەتتىلىكتەن, اۆتورىن قۇرمەتتەگەننەن دە جيناعان سياقتى. كىتاپتاردىڭ اراسىندا, مىسالى, لەنيننىڭ كىتاپتارى دا بولدى, – دەيدى ول.
1916 جىلى اتىراۋدا تۋىپ, 1997 جىلى دۇنيەدەن وتكەن حاميت ەرعاليەۆتىڭ ەسىمى بۇگىندە اتىراۋداعى ءوزى تۋعان اۋىلعا بەرىلگەن. قازىر سول وبلىستاعى مەكتەپكە اقىننىڭ ەسىمىن بەرىپ, ۇلىقتاپ جاتىر ەكەن. سوندىقتان قالامگەردىڭ سوڭىندا قالعان مۇرالارىنىڭ كەيبىرى استاناداعى كىتاپحاناعا تاپسىرىلسا, قولجازبالارى قاجەتىنە قاراي, ءوز اتىنداعى مەكتەپكە وتكىزىلىپ وتىر.
الەم ادەبيەتىنىڭ وزىق ۇلگىلەرىن قازاقشاعا اۋدارعان قالامگەر ەليزاۆەتا حانشايىمنىڭ قولىنان العىس حات العان جالعىز قازاق جازۋشىسى. بۇل ماراپاتتى ول ۋ.شەكسپير شىعارمالارىن اۋدارعانى ءۇشىن 1995 جىلى العان ەدى. ياندەكس
