«استانا – 2013» شاقىرادى
ەرتەڭ «استانا-2013» حالىقارالىق اۆتورلىق ءان فەستيۆالىنىڭ شامدارى كەزەكتى رەت ەلوردا تورىندە جاعىلادى. ءۇش كۇن بويى تمد جانە ەلىمىزدىڭ اۋماعىنان جينالاتىن باردتار وسىناۋ ونەرگە قىزىعاتىن جۇرتتى ءوز اندەرىمەن سۋسىنداتپاق. كەشە وتكەن ءباسپاسوز ءماسليحاتىندا وسى ءجانە باسقا دا فەستيۆال اياسىنداعى شارالار تۋرالى فەستيۆالدى ۇيىمداستىرۋ كوميتەتىنىڭ توراعاسى ماقسات ءسارسەنبەكوۆ پەن فەستيۆالدىڭ تەحنيكالىق ديرەكتورى يليا لوگۆينەنكو باياندادى.
استانا – قازاقستاننىڭ باس قالاسى اتانعالى وسىمەن 15-رەت وتەتىن فەستيۆالگە اۆتورلىق ءان ونەرىندە مويىندالعان ۆالەري جانە ۆاديم ميششۋكتەر, اندرەي كوزلوۆسكي, ليديا چەبوكساروۆا, ەۆگەني بىكوۆ, الەكساندر رودوۆسكي قاتىسادى دەپ كۇتىلۋدە. ولاردىڭ ءبارى رەسەي استاناسىنان كەلمەك. ماسكەۋدە تۇراتىن قانداسىمىز, فەستيۆالدەن بىردە-ءبىر رەت قالماعان جەڭىس ىسقاقوۆ مۋزىكالىق شارانى اشىپ بەرەدى. ءارى قاراي فەستيۆالگە ارنايى شاقىرىلعان 200-دەي بارد پەن بۇل ونەرگە تالاسى بار, ءوز ەركىمەن كەلگەن وزگە اۆتورلار ءاندەرىن كوپشىلىكتىڭ نازارىنا ۇسىنادى.
بۇرىن فەستيۆال شەڭبەرىندە ەكى كەزەڭنەن تۇراتىن بايقاۋ ۇيىمداستىرىلسا, بيىل ول ءوتكىزىلمەيتىن بولدى. وسى جىلعى فەستيۆالدىڭ ءبىر ەرەكشەلىگى سول. تەك قانا شەبەرلىك ساباقتارىن, شىعارماشىلىق شەبەرحانالاردى وتكىزۋ ارقىلى دەڭگەيى جوعارىراق ساماراداعى ۆالەري گرۋشين اتىنداعى جانە سانكت-پەتەربۋرگتەگى «پيتەر اككوردى» فەستيۆالدەرىنە ىرىكتەۋ ءجۇرگىزىلمەك.
ۇيىمداستىرۋشىلاردىڭ ايتۋىنشا, بيىل ون بەسىنشى رەت وتكىزىلەتىندىكتەن, فەستيۆال باعدارلاماسى قىزىقتارعا تولى بولماق. قازىرگى تاڭدا ونىڭ وتەتىن ورنى – قاراعاندى تاس جولىنىڭ 17 شاقىرىمىنداعى «پريچال» قوناق ءۇيى اۋماعىندا دايىندىق جۇمىستارى ءجۇرۋدە. ول جەر اباتتاندىرىلىپ, ساحنا ورناتىلۋدا. سونداي-اق, قوناقتارعا ارنالعان 200-دەي شاتىر تىگىلۋدە. ءبىر سوزبەن ايتقاندا, فەستيۆالگە قاتىسۋشىلار مەن ونى تاماشالاۋشىلار ءۇشىن بارلىق جاعدايلار جاسالىپ جاتىر.
امانعالي شميتۇلى