كەشە ۇلى جەڭىس كۇنىنە وراي استانا قالاسى اكىمدىگىنىڭ باستاماسىمەن قالالىق ورتالىق قورىمداعى مايداننان ورالماعان جاۋىنگەرلەر مەن سوعىس قۇرباندارىنا ارنالعان ەسكەرتكىش باسىنا «اشەكەيلەنگەن داڭق گۇل تىزبەگى» مەن باسقا دا گۇل شوقتارىن قويۋ ءراسىمى ءوتتى.
ارنايى اۆتوشەرۋ ۇيىمداستىرىلىپ, سالتاناتپەن ساپ تۇزەگەن ءارتۇرلى اسكەري قىزمەتكەرلەر لەگى سىرنايلاتىپ-كەرنەيلەتە باستاپ جۇرگەن ەسكە الۋشىلار قاتارىندا ۇلى وتان سوعىسىنىڭ ارداگەرلەرى, جاۋىنگەر-ينتەرناتسيوناليستەر, جەرگىلىكتى مەملەكەتتىك ورگان باسشىلارى, ۇكىمەتتىك ەمەس جانە جاستار ۇيىمدارىنىڭ وكىلدەرى بولدى. ءداستۇر بويىنشا ءبىر مينۋت ۇنسىزدىك جاريالانىپ, ارۋاقتارعا قۇران باعىشتالدى. ودان كەيىن كەزەگىمەن ءسوز العان شاراعا قاتىسۋشىلار ارداگەرلەردى ۇلى جەڭىستىڭ 68 جىلدىعىمەن قۇتتىقتاپ, ولاردىڭ جانقيارلىق ەرلىكتەرى ءۇشىن العىستارىن ايتتى.
ە.بەيسەنوۆ
